Prime part – Un sît impuartant e pôc considerât pe biodiversitât
I l Lât di Cjavaç al è il plui grant lât naturâl dal Friûl e al è, insiemi cun chel di Ruvigne, un dai rescj di un antîc bacin postglaciâl. Intal timp la zone dal lât e je lade incuintri a une antropizazion che le à modificade in particolâr dai agns ‘50 dal secul passât, cu la costruzion de centrâl idroeletriche di Somplât che e à causât la riduzion de aree ocupade dal lât e lu à fat deventâ un bacin par scjamâ la aghe doprade par fâ eletricitât. Dopo, e je tacade la urbanizazion ancje de aree dapît dal lât e un viadot de autostrade “Alpe Adria” al à interessât il setôr setentrionâl.
◆ Pe sô posizion, il lât al è impuartant par un insiemi di speciis vegjetâls e animâls: par chestis ultimis la aree e je rilevante ancje par chês che no son leadis in maniere particolâr ai ambients caraterizâts de aghe.
◆ I studis puartâts indevant di cui che al scrîf inte zone dal lât a àn permtût di contâ passe 250 speciis di uciei, che di lôr passe 100 a son leadis ae aghe, a nidifichin, a doprin il lât par fermâsi vie pai moviments stagjonâi e par passâ l’Invier. I studis a àn ancje permetût di aciertâ la prime nidificazion intal setôr setentrionâl dal Friûl di une piçule specie di uciel di palût (Locustella luscinioides) dal ordin dai Passeriformes e inte famee Locustellidae, dal penacjin (Aythya fuligula), dal morgul (Podiceps nigricollis), dal cauròs (Aythya ferina) e dal maiàs (Netta rufina). Par chestis speciis il Lât di Cjavaç al rapresente il sît plui setentrionâl (o un dai plui setentrionâi) in Italie dulà che si son riprodusudis. Intal câs dal morgul, cheste nidificazion e je la prime intes Alps orientâls e in Friûl. Pal maiàs, vie pal Invier 2022-2023, e je stade aciertade la prime migrazion complete inte zone montane furlane. Ancje pal pescjecrots (Botaurus stellaris) la aree fra il lât e i palûts di Vasinis e à regjistrât la prime migrazion inte aree prealpine furlane. Ancjemò: la aree dal lât e je la uniche cussì a Nord là che si è podude verificâ la presince di dôs cualitâts di ocjis (Anser anser e Anser fabalis) vie pal Invier.
◆ Su la fonde di chestis e di altris osservazions fatis in desenis di agns, si è podût stabilî che il Lât di Cjavaç al è une vore impuartant pe avifaune leade ae aghe, sedi tant che sît di soste vie pes migrazions, sedi parcè che al è, come che o vin viodût, fra i plui (o il plui) setentrionâi dal setôr meridionâl des Alps là che a nifidichin e/o a passin l’Invier ciertis speciis. Cun di plui, al è l’unic lûc inte mont furlane, adun cul palût Vuarbis, là che si riprodusin e/o a migrin in maniere regolâr ciertis speciis. Duncje il lât e i siei palûts a son fra lis areis internis plui impuartantis de regjon pai uciei di aghe e a son rilevants ancje a nivel di arc alpin orientâl.
◆ Fevelant di uciei, la zone dal lât e je impuartante ancje par altris grups di animâi, par esempli pai anfibis, difat a son stadis cjatadis cuatri speciis di crots (Pelophylax kl. esculentus/lessonae, Rana dalmatina, Rana latastei, Rana temporaria) e ancje il muc (Bombina variegata).
Cun di plui, desenis di speciis di animâi che si cjatin inte zone dal lât a son di interès comunitari e la Union Europeane e previôt misuris particolârs di protezion par lôr e pai habitats leâts ae lôr presince.
Il lât al à ancje fra i cjanêts plui grancj de mont furlane e, graciis al stât di “bandon” de aree, un dai vencjarêts di palût plui struturâts de regjon.
◆ Chei sore a son elements che a puartin viers misuris di tutele parcè che sîts cussì, in dì di vuê, al è dificil cjatâju. Invezit inte ultime trentine di agns il lât al à subît un efiet sinergjic dât de cussì clamade “valorizazion” e dal disinterès pe conservazion di habitats e speciis. Ator dal lât a son stâts fats sù fabricâts e infrastruturis: dilunc la rive Est e je stade fate une strade, e je stade disfate une part dal cjanêt che al è dapît dal lât, e je stade sfaltade une strade che e coleghe la SR 512 al setôr meridionâl dal lât, a son stâts taiâts arbui autoctons e plantâts arbui di speciis esotichis di fassis altitudinâls diviersis di chê dal lât e v.i.
◆ Dut chest al à vût consecuencis diviersis. Vuê si pues cori cun bicicletis e mieçs a motôr suntune part dal cjanêt e dal bosc di rive che prin dai intervents no jerin acessibii. Chescj a son puescj là che prin si rivave dome a pît. In cheste maniere, e je cressude la visibilitât dentri dai cjanêts e dai boscs di rive, eliminant porzions di habitat idonis aes speciis animâls.
◆ In particolâr, intal setôr meridionâl il sfrutament par finalitâts ricreativis e i intervents di modifiche ambientâl peâts a chest (presentâts tant che “compatibii” cul ambient e tant che sistemazions e mioraments dal stes) a àn denaturalizât e semplificât i habitats in maniere graduâl, vint efiets sostanziâi su la biodiversitât. Dut câs, a restin habitats che a son di tutelâ, massime in ambit di mont, tant che i cjanêts.
◆ Lis alterazions ambientâls a àn fat diminuî in mût marcât la frecuentazion des rivis interessadis dai intervents e de fasse dongje di lât di bande di bande di diviersis speciis di uciei che lis dopravin intes variis fasis dal lôr cicli vitâl. Intes zonis di cjanêt distrut vuê al è impussibil vivi par cetantis speciis e al è probabil che chest al vedi causât il bandon dal sît dal cuarin (Porzana porzana), une des speciis plui raris di uciei des nestris zonis che e je ancje di interès comunitari. Si è duncje incidût in mût sostanziâl su la pussibilitât di riproduzion ancje di speciis prioritariis pe conservazion a nivel european. Ancjemò, e je incressude la mortalitât, cause sfracaiament, di animâi tant che anfibis e retii.
◆ Ancje la vegjetazion e à patît la foghe dal om, par colpe di intervents aprossimatîfs dal pont di viste selviculturâl cul tai di tantis plantis (ancje di dimension impuartante) in buinis cundizions di salût che no son stadis sostituidis. Par vie di chescj intervents, si son formadis busis inte cuvierture dal bosc come chê circolâr (il “cercli magjic”) che e je su la rive Est, là che al tache il toc di strade improibide aes machinis. Cheste si pues calcolâ rapresentative di une mentalitât che e smire ae antropizazion de aree, no vint nissune altre finalitât se no chê di fâ rivâ int in chel puest e fâle restâ alì a fâ dut ce che i ven intal cjâf. Il spiticâsi cuintri lis plantis al fâs in maniere che ogni ocasion a sedi buine par eliminâlis, come intal câs dal tai di pôi vecjos (Populus nigra) in ocasion dai intervents che a àn interessât lis struturis a servizi dal cjamp sportîf che al è sot dal lât. ❚
La seconde part e sarà publicade sul numar di Avost.
