Classe 1930, il cjasarsês al à viodût nassi e cressi cun la maiute verde e zalecetancj zovins che a àn fat la storie dal sodalizi di là da la aghe
La SAS Cjasarse, societât sportive di balon dal paîs di là de aghe, e finìs intal 2024 cent agns di vite. E un dai personaçs plui biei e positîfs dal ambient ator de scuadre dal president Andrea Brait al è, par sigûr, Mario Muccin. Il prin tifôs, il fotograf uficiâl de societât par cetancj agns, une memorie storiche di no crodi. Dai agns Cuarante, in timps di vuere e lant indenant, Mario al è simpri lât daûr de scuadre e chest an, a 94 agns, al è un dai plui contents dai travuarts dal sodalizi zâl e vert.
_
Mario, cemût ise tacade la tô passion pal Cjasarse?
“Inta chei agns, cuant che o jeri frutut, i zuiadôrs de Sas si cambiavin intune stanzie de locande dal Leon di Aur e, daspò, a cjaminavin fin al cjamp sportîf, di là de ferovie. Ae fin de gare, mi davin lis scarpis e o lavi a lavâlis inte roie. Si scugnive paiâ il biliet par viodi la partide: jo no paiavi nuie, propit parcè che o mateavi cun chel lavôr di netâ e ducj a jerin contents. Di zovenut, finide la vuere, o ai tacât a zuiâ ancje jo: o rivavi a jessi sedi difensôr, sedi atacant. Dome che un scuintri une vore fuart cuntun aversari mi à causât un infortuni cetant grâf e o ai molât subit di zuiâ. Cussì, di bot, par no savê ce fâ, o soi deventât il fotograf de societât sportive”.
_
Tropis fotografiis âstu fat?
“Une vore. Ogni an, cuant che o lavi intal cjamp sportîf, ducj mi domandavin une. Intal 1951, tornât incà di Davian, indulà che o vevi tacât a mateâ come barbîr, invezit che partî militâr, o soi restât cjase. Si che duncje, stant che no rivavi a zuiâ, o ai scomençât a dâ une man come autist, par menâ i atletis ator pal Friûl aes partidis e ai alenaments. Di bot, la Sas Cjasarse e je deventade la mê cjase”.
_
Soredut une fotografie e je cetant preseade: Mario frutut, in bande di Pasolini…
“Chel dì, o vevi viodût il gno amì Vigji Pasqualini cu la machine fotografiche parcè che al veve di cjapâ il grup, cun Pasolini e tancj altris amîs che a zuiavin. Jo o jeri intal mieç de incuadradure. “Bocia, pariti in bande!”, mi veve dit Pasqualini. Jo mi soi movût juste un tic, ma cuant che al jere pront par scliçâ il boton e fâ la fotografie, o soi tornât indulà che o jeri. E cussì, jo, zovenut, o soi te fotografie storiche di Pier Paolo Pasolini che al zuie a Cjasarse, juste daûr di lui, cualchi metri indaûr”.
_
Cuâi sono stâts i zuiadôrs plui fuarts in cent agns di balon a Cjasarse?
“La miôr scuadre, par gno cont, e je stade chê dal 1949-50. Come zuiadôr ugnul, o dîs Ezio Vendrame. Un an, mi à clamât par dîmi che al rivave cun Paolo Rossi pe inaugurazion dal cjamp sportîf dedicât a “Titti Della Negra”. O ai fat une vore di fotografiis, cun cetante sodisfazion”.
_
Pasolini?
“Nol jere un zuiadôr cussà ce… al coreve une vore, chel sì. E i plaseve zuiâ cul Cjasarse! Chel al contave. Cuant che al tornave in Friûl, al vignive in buteghe par fâsi fâ la barbe, cundut che no le veve. Une zornade, al è vignût e mi à domandât se i davi la buteghe par zirâ lis senis di un film che al veve in produzion. O sin lâts dacuardi, ma vincj dîs dopo lu àn copât. A Cjasarse no lu cognosseve masse int: forsit uns dîs di lôr e vonde. Il paîs al tignive ae glesie, il plevan al contave. E lui al jere reazionari. O fasevin ancje teatri insiemi, in place, dongje de glesie, ma cuant che il predi al à scuviert dut, nol à lassât plui la licence par doprâlu. Si che duncje, o ai molât chê compagnie e o ai tacât a seguî la sportive”.
_
Vendrame?
“Di zovenut, cuant che al zuiave fûr de mê buteghe, i disevi simpri di cjapâ la bale cul cjâf laterâl, no dret. E lui al sberlave “goool”, dutis lis voltis che al cjapave un porton. Al è lât vie subit di Cjasarse a Udin, e daspò al è deventât professionist. Un zovin une vore inteligjent: nol meretave di jessi scualificât”.
_
Cualchi risultât di tignî iniment?
“Dispès, la societât e à scugnût no lâ indenant intes categoriis plui ad alt, parcè che no jerin bêçs. Se no si rivave, al jere di bant insisti e riscjâ di molâ dut. O vin vût dirigjents straordenaris, Brait par dî dome un. Intal 2023-24 o vevi dit che o varessin vinçût la finâl par 2-1 e invezit le vin pierdude par 2-1. O speri, cun dut il cûr, che pal prossim an o rivedin a meti adun une scuadre une vore fuarte.
_
Un insium dal Mario tifôs?
“Mi plasarès che, cuant che la scuadre e ven fûr dai camarins dal stadi, prime che l’arbitri al sivili il principi de partide, ducj i zuiadôrs si metessin dongje, par dî insiemi lis peraulis “Un par ducj e ducj pal Cjasarse”. ❚
:::::::::::::::::::::::::::::::::::::::::::::::::::::::::::::::::::::::::::
No dome balon: personaçs di stature e cognossûts pardut, peâts al paîs
Lis figuris plui famosis che a àn zuiât cu la SAS Cjasarse: Ezio Vendrame e Bryan Cristante
Nassût a Cjasarse intal 1947, Ezio Vendrame al è stât un dai zuiadôrs furlans e talians cun plui çucje de sô gjenerazion. Estrôs, tant dispès fûr dai schemis, spetacolâr e amât di ducj i siei compagns, al è passât in serie A cul Vicence e cul Napoli. Intal 1979 al à puartât il Pordenon in serie C2 e, plui tart, intal 1980/81 al à zuiât a Cjasarse. In chê anade al è stât scualificât par vê cuistionât cuntun arbitri che lu veve butât fûr dal cjamp. Radiât dal balon talian a vite, al jere rivât a ridusi la scualifiche a 5 agns, dopo de amnistie rivade in graciis de vitorie de Italie di Enzo Bearzot al Mondiâl in Spagne tal 1982. Al à molât il balon zuiât intal 1986 cu la maiute verde e zale dal Cjasarse, prime di fâ l’alenadôr, propit intal so paîs.
◆ Bryan Cristante al è di San Zuan di Cjasarse e al è partît de SAS di zovenut par lâ ae Liventina a La Mote e daspò al Milan, indulà che al à vinçût il titul talian dai under 15 intal 2009. Cuant che al jere ae Liventine, al è stât il prin zovin tesserât par une societât di diletants a jessi clamât inte selezion under 15 te storie dal balon talian.
◆ A sintî ducj chei che a àn cjalât il balon zuiât a Cjasarse, a son Vendrame e Cristante i zuiadôrs plui fuarts che a àn vistût la maiute de societât centenarie di di là da la aghe. Si ben che in cent agns di storie a son une vore i atletis che a meretin di jessi te liste dai plui preseâts de SAS.S.❚
::::::::::::::::::::::::::::::::::::::::::::::::::::::::::::::::::::::
1924 – 2024: events par fâ fieste pai 100 agns de SAS
Il grant finâl intal mês di Otubar, al teatri Pasolini
Le SAS al è l’acronim di “Societât Artistiche Sportive”. Di fat, a Cjasarse, tal 1924, si fevelave no dome di sport. Art, culture, teritori… al è dut cjapât dentri inte ativitât dal sodalizi che, ore presint, al à Andrea Brait su la cjadree di president.
◆ Scomençant dal mês di Març di chest an, intal paîs di bot di là da la aghe, a àn tacât a fâ fieste, cun torneus, manifestazions, partidis cun zuiadôrs dal passât, mostris e events dentri de fiere dal vin.
◆ Insom, intal mês di Otubar, e vignarà une grande fieste intal teatri dedicât a Pier Paolo Pasolini, indulà che si contarà dute la storie e a fevelaran dutis lis figuris che a àn puartât ad alt il non de societât sportive verde e zale intai agns.
◆ Lis fotografiis di Mario Muccin, clâr, a saran une part cetant impuartante di dut ce che al vignarà metût sot dai rifletôrs. ❚
