“Anciuti Festival”: une fieste dai struments a flât, in non di Giovanni Maria Anciuti, te sô Tiere a For Disore

Giovanni Maria Anciuti al è stât descrit di Antonio Vivaldi come il “Stradivari dal oboe”. For Disore, il paîs là che al è nassût, ogni Istât i fâs omaç cuntun festival unic in Italie: si trate dal Anciuti Music Festival.
Rivât ae sô otave edizion, l’Anciuti Music Festival al anime no dome l’Istât di For Disore e dai paîs ator, ma dut il Friûl-Vignesie Julie, la Slovenie e la Austrie cun concierts, spetacui e cors di perfezionament, deventant un riferiment internazionâl par oboiscj e fagotiscj, sei professionâi che zovins students.
◆ Cu la direzion artistiche di Paolo Pollastri e chê organizative di Enrico Cossio, l’event di For al à il merit di meti in lûs i struments a doplis pivis midiant di un cicli di concierts. I events a son ancjemò plui speciâi in graciis dai curtîi maraveôs dulà che a vegnin organizâts e ancje pe ecelence dai artiscj internazionâi clamâts a esibîsi intun cartelon che al tache cun Zenâr e al finìs in Novembar. Tai concierts si cjate sei la miôr musiche classiche che chê popolâr e contemporanie, e a chestis si zonte ancje une propueste didatiche.
◆ I prins events di chest Istât dulà che dut il public al pues partecipâ, a saran i Concierts al Tramont: 3 apontaments che a presentaran i struments a flât in declinazions trasversâls.
Si tacarà ai 12 di Lui, cuant che il Sestet di Iacopo Teolis al presentarà il progjet clamât “The moving forest”. Fondint sonoritâts e struments tipics, a proponin di creâ un puint imagjinari tra il jazz moderni e la musiche classiche.
Ai 27 di Lui al parteciparà il fagotist Andrea Bressan che cul “Hana Ensemble” al presentarà un incuintri tra il mont musicâl classic e etnic di diviersis culturis.
Ai 9 di Avost si fasarà invezit un salt te alte Ete di Mieç cul “Ensemble MusiCanti Potestatis”, che armâts di bombardis, cjalamelis e pivis, trombis, trombons e percussions, nus acompagnaran intun viaç tes corts talianis e europeanis.
◆ Un dai apontaments clâf dal festival si tignarà a For, te glesie di Sante Marie Assunte ai 23 di Avost: il Conciert celebratîf pai tresinte agns de nassite di Giovan Battista Cirri.
◆ Une altre pagjine di rimarc a son lis diviersis zornadis di formazion e didatiche proponudis dilunc dal festival. In program dai 25 ai 29 di Avost, si fasarà la “Anciuti Academy”, articolade intun cicli di masterclass che ancje chest an e ten dongje students che a rivin di ogni bande de Italie – oltri che dal Friûl-Vignesie Julie, ancje de Sicilie e de Lombardie – e de Austrie. Insegnants di ecezion par ducj i arlêfs a saran il stes diretôr artistic Paolo Pollastri, prin oboe de Academie Nazionâl di Sante Cecilie di Rome; Fabien Thouand, prin oboe dal Teatri “Alla Scala” di Milan; Serge Herrig, docent di oboe al Conservatori di Metz e Enrico Cossio, prin oboe de Orchestre Regjonâl dal Friûl-Vignesie Julie e docent di oboe tal liceu Musicâl “C. Percoto” di Udin.
◆ Il Festival al propon ancje alc pai apassionâts plui piçui di struments a flât: dai 28 di Avost si tignaran i cors pai plui zovins oboiscj e fagotiscj, vere sperance pal mont musicâl dal avignî. Une cunvigne internazionâl pai piçui talents dai struments a pive dople e je organizade in colaborazion cul Glasbeni Center Edgar Willems di Lubiane direzût di Mateja Tomac Calligaris.
Dedicât ae didatiche par oboe e fagot, il cors al à otignût chest an plui di 30 adesions di arlêfs dai nûf ai disesiet agns che a vegnin des scuelis di musiche e liceus musicâi di dute Italie e dal forest.
◆ Doi apontaments, che a sierin il percors di formazion des dôs “Acedemies”, si tignaran joibe ai 29 e sabide ai 31 di Avost inte frazion di Cele, te “Cjasa dai Fornês”. Joibe, des 6 sot sere indenant, si esibiran i arlêfs de “Anciuti Academy” acompagnâts de pianiste Rossella Fracaros, invezit te sabide al sarà il conciert finâl di ducj i arlêfs di “Anciuti Young” e “Reeds ‘n Kids”.
◆ Par sierâ il festival, si tignaran ancje altris doi apontaments di no pierdi: ai 28 di Setembar tal Istitût regjonâl par vuarps Rittmeyer di Triest, si proponarà un viaç imagjinari in tren di Napoli fin a Triest intitulât “800 km alla ricerca della felicità“ scrit de musiciste e musicoterapeute Antonella Grusovin, cul coment musicâl dal Istitût Fano di Spilimberc e la direzion dal mestri Enrico Cossio, cuntune interazion che e rindarà ducj protagoniscj.
◆ Un ultin viaç al puartarà il festival ai 21 Novembar al Mozarteum di Salispurc, dulà che i mestris Alfredo Bernardini e Paolo Pollastri ai obois barocs, la violonceliste Claudia Cecchinato e il clavicembalist Alberto Busettini, a eseguiran un program di sonatis a trê talianis.
◆ No nus reste che conseâus di lâ a lei di plui e di discjamâ il program sul sît anciutimusicfestival.it, augurant un bon viaç musicâl cul ricuart dal miôr oboist dal mont che al è di cjase in Friûl. ❚