“La cooperative e je nassude tal 1927 tant che circul ricreatîf. – Al conte il president e rapresentant legâl de cooperative Italo Stefani – Tal ‘48 e je deventade Cooperative di Consum cun finalitât mutualistiche e e je stade vierte la buteghe di alimentârs e la ostarie. Cul timp la buteghe e à vût di sierâ stant che no veve plui zîr par vie de concorence des grandis buteghis, e al è restât viert dome il barut.”
La struture di chest edifici e je grandone e e je stade fate de int dal paîs e dai socis de cooperative. Si scuen dî che vuê la sô gjestion e dificile se no altri pal mantigniment e lis tantis spesis fissis di sostignî ogni an.
“O vin dât in afit la ostarie, e l’apartament che al jere nassût come ricet pai dipendents de ostarie e de buteghe lu vin furnît e vuê al è deventât il “B&B Il Riçûl”: une maniere par recuperâ e mantignî a nivel finanziari ce che al è stât fat dai vecjos.”
◆ Un timp dute la int dal paîs si associave e, a man a man che cualchi soci al murive, la famee e decideve se tignî ative la adesion proponint un altri component de famee o lassâ pierdi. Tal timp il numar dai socis al è calât. Vuê a Muine a vivin 117 personis e i socis de Cooperative a son 66.
“Cul passaç des liris al euro – al marche il president – e je stade fate une biele tamesade di socis. La cuote prin e jere di 10 mil liris. Cuant che i conseîrs a àn decidût di passâ dentri di une altre cooperative plui grande, la cuote e je passade a 25 euros. Cualchidun al à acetât e altris a àn molât.
La ostarie e je un lûc fondamentâl par cjatâsi e se e ves di sierâ, il paîs al murirès. E je sierade dome il lunis, e il martars e je vierte fin a misdì. In chescj dîs e je vierte des 10.00 aes 14.00 e di sere des 16.30 indenant fin cuant che al è cualchidun. Dispès cui zovins o organizìn fiestis par creâ un pôc di plui moviment e duncje staronzâ lis jentradis.
◆ Di bon che di un pôc di timp tra i socis o vin ancje la Associazion “Chei da Muina” che nus da une grande man.
Cul fitâ lis cjamaris o vin aderît a Booking.com par cirî di jessi agjevolâts e cognossûts. E cussì o vin vût a fânus visite polacs, slovacs, rumens; i unics dal Stât talian a jerin di Bressanon, se di no… ducj forescj.
◆ Nol è tant che si sin associâts ae Confcooperative Alpe Adria par podê vê un supuart impuartant: nus curin l’aspiet burocratic comercialiscj e consulents, e par cualsisedi ativitât si poìn su lôr. Gracie a cheste adesion, cirche un mês indaûr o vin vût in visite une zovine laureade argjentine cun lidrîs di Glemone che e à curât il progjet publicitari dal B&B (comissionât de Confcooperative Alpe Adria). E cussì par 15 dîs e à vivût a Muine e e à zirât dute la zone par cognossi ben il puest, cun chê di ocupâsi de publicitât de nestre realtât su FB e Instagram. Ogni setemane e vignarà metude cheste publicitât su lis rêts sociâls.
◆ Al è impegnatîf stâ daûr a dut; – al siere Italo – la ativitât e je partide intai agns de miserie e cumò che o sin te bondance o stentìn a mantignî impins dut, ma o cirìn di tignî dûr. La femine che e gjestìs la ostarie e stente a rivâ ae fin dal mês e forsit cuant che e je cualchi fieste e rive a incassâ alc di plui, se di no e devente une mission plui che un lavôr, cun chei cuatri che ogni dì a van a bevi alc. E je une mission cetant impuarte. Se e ves di mancjâ chest pont di riferiment, al sarès pardabon grâf. Nus tocje tignî dûr.” ❚
“Chei di Muine” che a tegnin vîf il paîs dant acet ai turiscj
Marta Vezzi
