“Memorabilia”: Louis Armato e un progjet che al conte la musiche di une gjenerazion interie

Une iniziative cuintri corint, parcè che si à miôr il contat diret e personâl invezit che la condivision gjeneralizade che si sin usâts midiant dai social media.
◆ Il cjantautôr glemonàs Louis Armato sal impensìn ben tant che leader storic de band punk rock “Mercenary God”, tai agns subit dopo il taramot dal ‘76, e pai siei tancj lavôrs cun diviersis formazions come “Carillon!”, “Cleverness”, “Rejoice”, “Bad Memory”, “Angelica Lubian band”, “Louis Armato band”, “Acoustic Songbook duo” e tancj altris.
◆ Tai agns al è ancje stât responsabil dal sît www.rocknotes.it e al a condusût la trasmission radiofoniche Rocknotes.it su Radio Onde Furlane e scrit articui su lis propuestis artistichis furlanis tes pagjinis di Il Friuli.
Cu la etichete discografiche AUA Records al a publicât diviers albums che, tacant di “Blang!” dal 2011 e passant aes compilations dal “Circolo Acustico”, a tegnin dongje ducj i tocs in studi, ma ancje chei acustics e dal vîf scrits dal 1981 indenant.
◆ Armato, oltri a ducj i concierts e progjets che al organize, al è ancje impegnât te scuele Gemusica di Glemone, come insegnant di ghitare.
Tal 2022, pal centenari dedicât a Pier Paolo Pasolini, adun cul so grup storic “Mercenary God” al à regjistrât un gnûf toc punk cul titul “Hey Boy” pal progjet P.P.P “I Punks Tal Friûl”. (Lait a lei il toc che o vin dedicât al teme:
https://www.lapatriedalfriul.org/i-punks-tal-friul-e-la-voie-di-fa-rumor-in-non-di-p-p-p-punk-punk-punksolini/ ). L’artist nol piert ocasion par realizâ gnûfs progjets e incentivâ chei mancul gnûfs che a tegnin dongje tancj artiscj de sene musicâl furlane come il “Circolo acustico”, che al è stât il so ideadôr. Al colabore cun tancj musiciscj furlans e forescj, ancje di gjenars diviers, e in ogni sô esibizion dal vîf al propon un repertori acustic cun tocs origjinâi ma ancje covers internazionâls.
◆ Cun chest spirt, nol podeve mancjâ un progjet che al tegni dongje dute la sô esperience e storie musicâl. Cussì e je tacade in maniere uficiâl ai 27 di Otubar dal 2021 la distribuzion digjitâl indipendente de produzion musicâl di Louis Armato, cul non memorabil di “Memorabilia”.
Un grup selezionât di personis al à ricevût in mût periodic, vie WhatsApp, un file audio mp3 acompagnât di un messaç esplicatîf. In dut fin cumò plui di 20 tocs selezionâts tra produzions vecjis e gnovis, demos e remix.
◆ I doi ultins tocs jessûts tra Jugn e Lui, a sintetizin mai tant ben la varietât musicâl di chest progjet. Il toc che il so video al è za jessût su YouTube, ai 14 di Jugn stât, al è il numar cutuardis e si intitule “Gente di città”. Al è un toc cjantautorâl, dulà che Louis Armato al conte di se stes midiant de musiche, ma ancje de sô gjenerazion in cuarante agns di cjançons. Lu fâs cul power trê glemonàs de “Louis Armato band”, cul bassist Luciano Silei e il baterist Armando Palese.
Metût dongje, rangjât e regjistrât in cualchi mês, il toc al conte in mût ironic la contraposizion tra chei che a vivin in citât e chei che a rivin di difûr, tra une superficialitât aparente e un bisugn di rivendicazion, tra vite mondane e une sorevivence fadiose, dut cuinçât di snobisim (vêr o presumût) e prejudizis.
◆ La publicazion numar cuindis e je il toc “Per grazia parzialmente ricevuta”. Test di Matteo Bosco (Teo Ho) e musiche di Louis Armato, la cjançon e je stade creade pal disc “Collaborazione ingiustificata” di Teo Ho & Louis Armato e e viôt Teo a la armoniche, Louis ae vôs oltri che aes ghitaris e al bas, e Matteo Dainese ae baterie, ma ancje al lavôr di remix.
◆ Ducj i tocs a son stâts daspò masterizâts e publicâts ogni mês ancje su Spotify, YouTube, Deezer, Apple Music e altris plateformis digjitâls. Al baste cirî “Louis Armato” e o cjatais un grum di buine musiche.
Stait daûr al artist e a ducj i siei progjets sui siei canâi sociâi, ma soredut sul sît www.rocknotes.it. Chest Istât lu cjatais tes miôr sagris, bars, festivai e concierts dal Friûl. ❚