Di trente agns e va indevant une scuele di Istât cence cunfins, ancje par furlan
Une scuele cence confins, li che i students a puedin cjatâsi e fevelâ in diviersis lenghis. Al è chest l’intindiment de Scuele di Istât di Pleç, la summer school che aromai di 30 agns e insiore la ufierte formative di cetantis universitâts de Alpe Adria, ven a stâi di chê aree a cjaval tra mont furlan, talian, sloven, cravuat e todesc.
◆ Nassude intal 1994 tant che progjet di pâs di bande de Universitât di Clanfurt, la “Poletna Šola Bovec” (chest il non par sloven) si è slargjade fin a cjapâ dentri ancje la Cravuazie, cu la colaborazion des universitâts di Lubiane, Cjaudistrie, Flum, Osijek, Triest e Udin.
I students di chescj ateneus a àn la pussibilitât di iscrivisi a un percors di dôs setemanis vie pal mês di Lui, li che a podaran frecuentâ un cors di lenghe, a sielte tra cravuat, furlan, sloven, talian e todesc, par passe 40 oris di lezion (dutis lis buinoris, di lunis a sabide). Cun di plui, a son in program ancje conferencis, laboratoris, dibatiments, escursions e moments di condivision, propit cun chê di stiçâ i fantats a fevelâ tra di lôr e “contaminâ” i lôr savês (e ancje lis lenghis
◆ Intal imprin, il progjet al veve une dimension soredut storiche, po dopo, si è slargjât a tocjâ diviers argoments, fin a rivâ al teme di chest an, o ben “culture, societât e ambient: concets e pratichis transfrontalieris par une sostignibilitât culturâl”, cuntune atenzion al aspiet ecologjic (une vore interessante la visite ae Hydrogen Valley a Triest, par cure dal ateneu de citât), cence dut câs dismenteâ lis relazions tra diviersis culturis e il concet di acetazion dal altri.
◆ Vie pal incuintri, par ricuardâ i trente agns di ativitât, di fat, e je intervignude ancje Anna Baar, autore austriache ma nassude a Zagabrie tal 1973, che e à contade la sô esperience personâl e il rapuart ancje cruziât cu lis lenghis feveladis (il todesc, tant che lenghe di espression te scriture, aben che al vignìs imponût par cidinâ chês altris lenghis balcanichis “impuris”).
Sul cont de lenghe furlane (di là de invidie par chei che a son saltâts fûr di chês lezions fin al 2018, stant che il docent al jere il professôr Franco Finco), o podìn contâus che, di là des regulis di grafie e gramatiche, i fantats a imparin a cognossi i imprescj informatics, i ents di promozion (la ARLeF, la Societât Filologjiche Furlane, il CIRF), Radio Onde Furlane, il canâl 810 (Rai 3 bis) e… si lei ancje La Patrie dal Friûl! Di cualchi an, cun di plui, e ven sielzude une cjançon peade al teme de scuele, che i fantats a fasin cognossi a chei altris students vie pe cerimonie finâl di consegne dai atestâts.
◆ Par cumò, la Universitât dal Friûl e à risiervade la pussibilitât di partecipâ ae scuele di Pleç dome ai students dal DILL, ma al pues jessi che la ufierte e vignedi slargjade ancje a chei altris dipartiments. Se o cognossês cualchi zovin interessât, stiçaitlu a partecipâ, che une svuacarade intes aghis dal Lusinç/Soča e vâl pardabon il viaç! ❚
