In Gjermanie, i furlans, ae prime esperience intal torneu pes scuadris des minorancis nazionâls autoctonis, a son stâts i plui bulos. Cetante sodisfazion pal president de ASF Daniele Puntel e par dute la scuadre. Il svant di dute la Furlanie.
Miôr di cussì, nissun al pensave. Ae sô prime partecipazion ae Europeada, il torneu continentâl pes scuadris in rapresentance des minorancis nazionâls autoctonis, la selezion dal Friûl e à vinçût il titul de edizion 2024. La clape, metude dongje de Associazion Sportive Furlane dal president Daniele Puntel, cui alenadôrs Mauro Lizzi e Devid Trangoni, si je rimpinade fin ae finâl cuintri de scuadre de Ocitanie, indulà che il cjapitani Nicola Tonizzo al à infin tirât su il trofeu.
_
President Puntel, di indulà vino di tacâ, par contâ la Europeada 2024?
“Dal principi, o ai simpri pensât di meti adun une robe che e ledi parsore dal sport. Plui come une iniziative di coinvolziment di personis che i tegnin ae identitât furlane. A viodi cemût che e je lade, dut al à cjapât une dimension une vore plui grande di ce che o pensavin. Daspò dal torneu, mi àn scrit e fevelât cetancj di lôr. Ancje int che, par solit, no si interesse di sport e di balon e che, impen e dut câs, e à intal cûr il jessi e il sintîsi furlans. Dute cheste laude e je une sodisfazion di no crodi”.
_
E dal mont dal sport?
“Tante int une vore presinte. Dirigjents, alenadôrs, zuiadôrs, tifôs… a son stâts daûr dal nestri percors cun passion e sportivitât. Nus àn sburtât a lâ indenant, cuntun entusiasim simpri plui grant. Vê cjapât dentri tante int in mût trasversâl al è ce che mi insumiavi prime e che al è vignût fûr ancjemò plui di ce che o pensavi. O sin lâts pardabon fûr par fûr e o vin viertis puartis che, cumò, al è just passâlis, par viodi indulà che si rive a lâ. Sintî trasmissions, par television e par radio, fevelâ par furlan di sport e di balon mi è plasût une vore. Intal principi o pensavi che e fos une limitazion e invezit al è stât un sucès”.
_
Bulos a meti adun une scuadre vincente in pôc timp.
“O sin stâts brâfs a impostâ lis robis, dal principi, cun concets clârs di subit. I tecnics e i zuiadôrs a àn savût cjapâju sù inte maniere juste. Plui di cualchidun al veve dit di jessi vignût dongje cence masse spietis e, impen, cul lâ indenant si è inacuart che la mission e jere impuartante. Si è dade dongje une clape penze, ducj a àn metude serietât e impegn e i risultâts a son rivâts. Fondamentâl e je stade la prime partide, vinçude cuintri dai Slovens in Italie, in rimonte dopo jessi stâts sot par 2-0. O vin fat intindi a ducj i nestris zuiadôrs che no si zuiave dome par un torneu: si zuiave pal onôr di un popul che al sburtave, e di une identitât. E cheste robe le àn capide ancje i aversaris. Pense che mi àn domandât la maiute de Selezion dal Friûl ancje emigrants e fîs di emigrants, di seconde o tierce gjenerazion, che a san la marilenghe e a tignivin par nô”.
_
Trop biel isal stât vinci un “derby” ae prime partide?
“O sin lâts sot subite par 0-2 e no jerin masse sigûrs. Intal secont timp, dut câs, i Slovens in Italie a son calâts e noaltris o vevin plui snait e tancj zuiadôrs frescs, pronts a lâ dentri e zirâ la gare. Il destin al à mateât parcè che il tîr di rigôr dal 4-2 al è capitât de bande indulà che al jere il nestri unic tifôs, Rizzardo Piani. Une persone che e à fat 1380 chilometris, in machine, par jessi cun nô, puartant là sù ducj i materiâi, il formadi montâs, la bire e il vin. Di chê volte, dopo de grande fieste cun Rizzardo, o vin tacât a cori e, partide dopo partide, la scuadre e à fat viodi di jessi une vore competitive”.
_
Cualchi moment dificil?
“Intun torneu come la Europeada al è simpri dificil dâ un judizi su lis scuadris, zuiant ogni dì cun int che forsit no je simpri usade, contant infortunis, scualifichis. Pense ai Slovens: a àn metût il 100 par cent cuintri di nô e, intes partidis seguitivis, no àn vude la fuarce par tirâsi sù. Al è just contâ che, cuntun calendari ribaltât, forsit al varès vinçût cualchidun altri. Vê vude une scuadre lungje e je stade une des nestris fuarcis”.
_
La partide decisive?
“Intai cuarts di finâl, la vitorie par 2-1 cuintri la Slesie, i Todescs in Polonie, forsit la scuadre miôr che o vin frontât. Une partide tirade fin insom, puartade fûr. Inte semifinâl, cuintri i parons di cjase – e o vevi un tic di pôre -, o vin metût dentri vot zuiadôrs gnûfs e frescs. I aversaris a jerin stracs e a àn paiât. La finâl, cuintri la Ocitanie, e je stade une fieste”.
_
Vinçude la prime, cumò si fevele de Europeada 2028 di inmaneâ in Friûl…
“Bielzà prime di tacà a zuiâ, cui Slovens o vevin la idee di cirî di puartâ il torneu in regjon. Par sigûr o vin di fevelâ cu lis istituzions: si pues scomençâ a pensâle. O pensi che une robe dal gjenar, buine di cjapâ dentri tantis animis dal nestri teritori regjonâl, e cjatarà spazi par movisi. O vin struturis bielis e ben metudis, o vin dut par jessi protagoniscj di une Europeada. O sin ancje intal mieç dal continent e par ducj al sarès facil rivâ chi di nô. Cuatri agns a son une biele dade di timp. Dut câs, o provarìn a vierzi ancje a altris dissiplinis, bale tal zei, bale a svol, balon feminin… par stiçâ il moviment. Viodarìn”.
_
Par curiositât, vêso fat l’esam di furlan a ducj i zuiadôrs?
“No, ma o pues confermâ che il 60 par cent di lôr a fevelin furlan in cjase, il 20 par cent nol è usât, ma a stiçâlu alc al rive a tabaiâ, l’ultin 20 par cent cuasi nuie. Dut câs, lant indenant intal torneu, ducj a tiravin fûr cualchi peraule o sproc furlans”. ❚
:::::::::::::::::::::::::::::::::::::::::::::::::::::::::::::::::::::::::::::::::::
LA SCUADRE E I NUMARS. Zuiadôrs e Risultâts
Francesco Costa, Omar Clarini D’Angelo, Mattia Specogna, Alessandro Rigo, Manuel e Simone Lizzi, Antonio Cucchiaro, Luca Vettoretto, Enrico Ruffo, Matteo Almberger, Mattia Solari, Davide Fiorenzo, Andrea Osso Armellino, Luca Lascala, Carlo e Mattia Alessio, il cjapitani Nicola Tonizzo, Davide Tosolini, Luca Trevisan, Luca Durat, Gabriele Biolino, Alessandro Galasso, Leonardo Campana e Morris Nagostinis.
Inseride intal grup di cualificazion D, la Selezion dal Friûl e à simpri vinçût: 4-2 cuintri i Slovens in Italie (doi goi di Osso Armellino, rigôr di Ruffo e un autogol dai aversaris); 4-1 cuintri i Ongjarês in Romanie (doi goi di Costa e un di Ruffo); 8-3 cuintri dai Ongjarês in Gjermanie (trê goi di Costa, un di Simone Lizzi, un di Tosolini, un di Solari, un di Vettoretto e un di Campana).
Intai cuarts di finâl, 2-1 cuintri dai Todescs in Polonie (goi di Clarini D’Angelo e Nagostinis). In semifinâl, 3-0 cuintri dai Danês in Gjermanie (goi di Lascala, Campana e Ruffo). In finâl, 2-0 cuintri de Ocitanie, cui goi di Nicola Tonizzo e Francesco Costa. ❚
:::::::::::::::::::::::::::::::::::::::::::::::::::::::::::::::::::::::::::::::::::
Mauro Lizzi: il record di 800 bancjutis di alenadôr tocjât intant de Europeada
Il tecnic furlan al à festezât in Gjermanie il grant travuart . O vevin sintût Mauro Lizzi dôi mês indaûr, par une interviste su La Patrie dal Friûl di Mai dal 2024, prime di scomençâ la aventure cu la Selezion dal Friûl. Chê volte, il “mister” al veve dit che al pensave di vê une scuadre competitive e che al partive par rivâ insom. Dit e fat!
“O savevin ce che e je la Europeada e o vin fat il miôr che o podevin par meti adun une scuadre competitive. Dut câs, no pensavin di rivâ a vinci e, soredut, di rivâ a tirâ sù un consens di interès, di int, di tifôs cussì. Puartâ il non dal Friûl ator pe Europe e tirâ dongje la simpatie di dut il mont al è lât parsore di ogni ambit sportîf. Baste viodi ce che al è sucedût tal aeropuart, cuant che o sin rivâts a cjase, inte nestre Patrie: di no crodi”. ❚
::::::::::::::::::::::::::::::::::::::::::::::::::::::::::::::::::::::::::::::::
Nicola Tonizzo: cûr di cjapitani, svant di furlan
Origjinari di San Martin di Codroip e cumò resident a Buri, il zuiadôr plui rapresentatîf de Selezion dal Friûl al è Nicola Tonizzo, classe 1990. In cariere, al à zuiât in serie D a Monfalcon, Fontanefrede, tal Cjarlins Muçane, a Montebelluna, par contâ dome cualchi passaç. Cumò al è al Codroip in Ecelence e al à vût l’onôr di jessi il cjapitani de clape dai Furlans ae Europeada 2024.
◆”O ai vinçût campionâts – al conte -, dut câs cheste e je stade la mê prime volte a tirâ sù un trofeu come cjapitani: un svant che o tignarai intal cûr. A 34 agns e je une sodisfazion no di pôc. Zornade dopo zornade, la clape di zuiadôrs si è rinsaldade e ducj a àn savût lâ inte direzion juste. Il nivel tecnic de Selezion al jere alt e o sin rivâts a imponi il nestri zûc. I sucès a àn dade convinzion e il risultât finâl al è la consecuence di dut. Al è ancje stât biel ancje viodi zovins cirî di fevelâ par furlan, ancje se no jerin usâts: la identitât de scuadre e je vignude fûr. Restâ cjapitani ancje intal 2028? Masse adore par savê: o varài 38 agns in chê volte e cuissà se o zuiarai ancjemò! Disìn che al sarès un biel sium e che, lant indenant, o viodarìn ce fâ. Par sigûr, cheste esperience cu la Selezion, intal 2024, no pues dismenteâle”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::
Un popul daûr de selezion dal Friûl a sburtâ i zuiadôrs di Lizzi e Trangoni
Il spetacul di Pinte & Spalti, Rizzardo Piani e ducj chei che a àn vude la pussibilitât di stâ daûr dal torneu. Inte prime partide de storie de Selezion dal Friûl, a Martignà, intune gare di alenament cuintri de Selezion Under 19 dal balon dai diletants dal Friûl – Vignesie Julie, la clape “Pinte & Spalti” e jere bielzà sul puest par meti adun un biel spetacul di bandieris, côrs, stombladis, colôrs e musiche.
Cuant che la Selezion e je rivade al aeropuart di Roncjis di Monfalcon, l’acet al è stât ancjemò plui cjalt. Si à fat fieste pai nestris campions, che in Gjermanie a àn vût il sburt di Rizzardo Piani, un om che di bessôl al è rivât a tignî simpri alt il nivel di incitament. Un ricuart che al restarà segnât intal ricuart di ducj chei che a jerin presints.
◆ Di meti in evidence ancje l’impegn di Rizzardo par puartâ sù intal nord de Gjermanie, sul confin cu la Danimarcje, i prodots furlans di ecelence: il formadi, il vin, il frico, il persut dai sponsors dal nestri teritori. Une figure bielissime, fra une fieste di sport e di condivisions di valôrs. ❚
