Fin ai 15 di Setembar cuarante concierts
tra Cjargne, Valcjanâl e Cjanâl dal Fier
A son trentetrê agns che il festival musicâl de mont furlane, manifestazion che e met in rêt Cjargne, Valcjanâl e Cjanâl dal Fier, e pant musiche, di chê antighe ae classiche, passant pal jazz, pes musichis dal mont e pe contemporanie, intai lûcs plui biei dal Friûl de Alte.
Cumò, e za di un biel toc aromai, chê tiere lontane dai centris plui grancj e des citâts, dificile inmò vuê di jonzile, e je deventade une mete golose par tantis organizazions culturâls, tant che ancje fin là sù, ma dome di Istât, si slungjin par meti la çate e organizâ alc. Che al sedi biel o no biel, util o no util, nol impuarte, baste fâ. E che i contribûts regjonâi ricevûts, ancje par vie de decentralitât des propuestis, a vegnin spindûts come che i bants de culture ur domande.
◆ Al è invezit di savê, e di dî, e di ricuardâ, cui che a son stâts i prins a inmaneâ une schirie di ativitâts culturâls vivarosis, cuant che i bants de Regjon Friûl – Vignesie Julie inmò no domandavin dute une liste di carateristichis par vê un bon risultât di ponts, come il fat di pandi ator, di ca e di là, par sù e par jù, la programazion dai events. Al vûl savût che a jerin propit chei di Carniarmonie che par prins a àn inviât dute une schirie di concierts in cetancj comuns de Cjargne, vie par dut l’Istât.
Al jere il 1991 cuant che la rassegne e à tacât, fasint sul imprin juste une grampe di concierts intun pâr di comuns, progredint an par an, cuntun sucès di public simpri plui grant e proponint a ogni edizion ospits e programs musicâi simpri di plui nivel alt. Altri nol jere in chê volte, no come cumò.
◆ Di cualchi timp, di fat, ancje a là sù e no dome intai centris grancj dal Friûl, ogni dì, di Jugn a Setembar, a ’nd è tantis di chês propuestis, di ogni sorte, e no dome sagris (che invezit a son cuasi daûr a sparî), che no si sa cemût parâsi. In chê volte, se no fos stade Carniarmonie, la musiche classiche, o culte come che si dîs, no si sarès nancje cercjade, se no a Paulâr in graciis dal mestri compositôr Giovanni Canciani inte sô Mozartine.
◆ Di trente agns Carniarmonie e à come diretôr artistic il clarinetist furlan Claudio Mansutti, un che al à viodût ben e prin di ducj, e savût ben e miôr di ducj, meti adun une operazion di cheste fate, par nuie semplice di inmaneâ. Di tancj agns la rassegne e je sot de ale de Fondazion Luigi Bon di Culugne e gjolt dal supuart di tancj ents regjonâi e sponsors privâts, e e reste la realtât di propuestis musicâls plui fuarte e funzionâl de mont furlane.
◆ Chest an a son cuarante i concierts in cartelon, cjapant dentri vincjesiet comuns e no dome de Cjargne, metint in rêt cetantis altris realtâts, tant che museus, associazions, altris festivai e lûcs une vore variis, come plêfs e glesiis, palaçs, auditoriums e teatris, salis polifunzionâls, parcs e zardins. Lis propuestis dal mês di Lui a son ladis in grant, tirant dongje come simpri l’interès di tante int, e no dome dai fidelizâts che a cjapin feriis par assisti a plui concierts pussibii. Tant public al ven dal forest, di Austrie e Slovenie in particolâr, ma ancje de France e de Gjermanie, cence contâ i emigrants ator pal mont che, cuant che a tornin, no si pierdin un biel conciert intal lôr paîs di nassite.
◆ Une des novitâts di chest an, che e dimostre ancje il voli internazionâl di Carniarmonie che l’an passât e à pontât a creâ une rêt cu la Cechie, al è ancje il zimulament in vore cu la Spagne. A son une vore i apontaments che a àn tant che protagoniscj artiscj dal mont iberic. Altre novitât al è il leam cul program “Biblioteche dai libris vivents” de associazion Melius, un ent che al nas dentri de cooperative Cramârs par ufrî no dome musiche ma ancje la leture di libris di variis autôrs midiant di moments teatralizâts, par dutis lis etâts.
◆ Lant sul sît carniarmonie.it si pues lei ben dut il program, lis datis, i ospits, lis propuestis di itineraris di fâ ae scuvierte des plui bielis valadis, gjitis ae cognossince des maraveis naturalistichis de nestre mont e tant altri di no pierdi. Clâr che a son i concierts che a paronin, e in chest sens il festival si è slargjât dant acet no dome ae grande musiche classiche, che e reste la sô peculiaritât. Di fat dongje di jê o vin ancje chê de Ete di Mieç fin al Baroc, ma ancje lis musichis dal mont, chê crossover tra jazz, blues, e folk. No si fâs mancjâ nancje il supuart aes gnovis produzions de musiche contemporanie, ven a stâi chê che e ven scrite in di di vuê di compositôrs e compositoris dal nestri timp.
Fin ai 15 di Setembar la Cjargne, e lis valadis dongje, Valcjanâl e Cjanâl dal Fier, a deventin une grande sinfonie, indulà che la orchestre e je fate sedi dai musiciscj ospits, soliscj e orchestris, passant pe musiche di cjamare, chê corâl, i grups musicâi di categoriis variis, ma ancje de int, alogjene e foreste, che e jemple, simpri cuntun grant sens dal rispiet, i lûcs clamâts a fâ di teatri a cheste grande manifestazion, mari di dutis lis manifestazions cjargnelis dal dì di vuê. ❚
