Il funerâl ros plui bastiancontrari e braurôs che i libris di scuele no san o no vuelin contâ

Bielzà a Pierie a jerin centenârs di feminis e di oms de valade che a spietavin la casse, intun cidinôr cussì pesant che al podeve ancje someâ un berli. A jerin vignûts jù di Crôs e di Sostâs, jessûts des puaris cjasis di Davausse, cualchidun altri di Prî, Predumbli e ancje Dasaiis, adiriture di Truie, pestant a fadie i trois, in trop, vignint jù des cretis che a spachin. E je une joibe di vore. Cussì a àn lassât jenfri i stai lis sesulis e i falcets, e i martiei dentri dai laboratoris. Cualchidun invezit al à decidût di puartâju cun se, tant che un simbul di lote e di fadie. Cuant che la bare e je rivade di Vile, in sîs di lôr le àn tirade sù pes palis e a àn tacat a cjaminâ a pas lent in direzion di Pesariis. Al è tacât cussì il funerâl ros plui bastiancontrari e braurôs de Storie, che purtrop i libris di scuele no san o pluitost no vuelin contâ. Ancje se ce che al è sucedût in chê dì al à un alc di maraveôs e di straordenari. Dilunc dal cjaminâ, la procession e devente un flum di popul, comot e cidin. Nol mancje nissun. Se nol fos pe musiche profonde e comovente sunade de Bande dal “Dopolavoro”, che e ten il ritmi dal pas, si sintarès dome che il rumôr dai scarpons su la strade. Doi chilometris a son luncs e il muart al pese, no dome fisichementri. Cualchidun si sint in imbaraç. Ma par chei che lu compagnin al è cuasi un berli di riviel che al monte adalt sù pai monts e di là al rondole jù a Rome Al fâs cjalt e la strade e je strente, e monte vie pai borcs di une mont dure e ruspiose, puare e biele come che e je dute la Cjargne. Cuant che la procession e rive sul puint de Fuine, propit sul principi di Pesariis, il popul al è cussì fis che cualchidun si ingrimpigne sù pai murets di piere dai orts, cualchidun altri si strenç cuintri lis cjasis, altris adiriture a montin su pes spalis di chei che a son in prime file, par cjalâ miôr. Dute int puare e braurose, che e cognòs une vore ben la fadie e la fam, ma che no je usade a pleâ il cjâf. Nissun nol vûl mancjâ e la vôs si è pandude intes malghis, intes ostariis, intes placis, sui lavadôrs. La peraule di ordin e je simpri chê: no bisugne mancjâ. A son rivâts ancje tancj forescj, ma soredut e je la int de mont che e vûl fâ at di presince par onorâ un dai siei fîs plui coragjôs, tornât muart de migrance francese. Il predi al à tignude sierade la puarte de glesie par dispreseâ la cerimonie. La int e à fat savê che no jere la intenzion di bati il muart cu la aghe sante. Ma il messaç al è clâr: nissun perdon par chei che no crodin, in mût speciâl pai anarchics cence Diu, nemîs de Fede e de Patrie. Devant da cimitieri, in tiere sconsacrade, a saran plui di un miâr di personis, la metât di ducj i abitants dal cjanâl. Mai viodude tante int dute intun colp, di chestis bandis. Il businâ di chel mâr si ferme dome cuant che la casse e ven poiade par tiere. Pugns sierâts e bandieris dai lavoradôrs si alcin insiemi come un bosc in riviel cuintri di un cîl lontan e nemì, par dâ l’ultin salût a Zuan Casali, il Paluçan, pont di riferiment pai tancj migrants de Cjargne in France, peâts aes ideis dal Socialisim e de Anarchie. Lui al difint i lôr dirits, al organize siopars e ocupazions, al coordene lis azions di solidarietât a bon pro dai plui puars. Al è muart a Parîs un an prime, tirât sot di un tram. Ma cualchidun al dîs che nol è stât un incident. La sô compagne, Marie Solari, e à volût che lui al tornàs a cjase, in chê tiere mari e madrigne, amade e dure, che ti sgjave dentri a colps di pale e di pic. “Oh, cetantis robis che o varès voie di dîti, ma no si pues”, al dîs Osvaldo Fabian, comunist, che al vierç i discors. Al fevele ancje Luigi D’Agaro, anarchic. Chest funerâl straordenari, di popul, laic, di lote, rivoluzionari e rabiôs, al cole intun moment de Storie particolâr. Il prin di Jugn dal 1933: undis agns de rivoluzion fassiste, e l’an che Hitler al cjape il podê in Gjermanie. Mighe robe di pôc, no mo? In chel an si scree ancje il cjamp di Dachau par depuartâ i dissidents politics. Il prin muart al è un furlan, un zovin di San Denêl, Eugenio Narduzzi, migrant in Baviere e soversîf. Ma chi in Cjargne o sin in tiere di bandîts! E la autoritât, ancje se arogante, e à pôre di dute chê int determinade. I viliacs a intervegnin dopo doi dîs. A sepulture za fate, cuant che aromai il popul si è dispierdût. I “Regi Carabinieri” di Davâr a metaran lis cjadenis a Luigi D’Agaro, Osvaldo Fabian, Italo Cristofoli, Guido Cimador e Edoardo Monaci, colpevui di vê organizât un funerâl antifassist. Pecjât che il muart no si lu podeve meti dentri! Il Duce in persone al domandarà une pene esemplâr: cinc agns di confin su la isole di Ponze. Ma stin a scoltâ jê. Nus mancje dome che la sô vôs. Maria Solari. La Paluçane: (“sj” si lei come “sh” di “shock” ndr) No ti podevi mighe lasjâ di besôl, lontan da me, cjâr compagn gno, di lotes e di vite. Tu veves ben di tornâ a cjase, une dì, su chesjtes monts dulà che tu seis nasjût, come che tu mi veves prometût cuant che tu seis lât. I vin simpri crodût, jo e te, che a vâl la pene di consjumâ la vite fint insomp, cence sparagnâ nencje un respîr, par che il mont al podi deventâ un puesjt miôr. Un mont plui jusjt, i disjevin, cence i sjiôrs in caroce e i biâts cul cjapiel in man. Las compagnes e i compagns emigrâts, tornâts a cjase, tas nots a disjcuti di politiche e di libertât, ta Cjase dal Popul di Pieria, ti impensisjtu? A nus contavin che sù pas Gjermanies l’operari al ere risjpetât. Al veve la sô dignitât, garantide dal contrat di lavôr. E se las roubes a lavin malamenti, a si sjioperave, ducj, sacramentant cuintre i crumiros. Cumò tu tornes come che no varès mai vulût, puartât ta sjpale da int che a ti vûl bon. Za a Pieria a son in centenârs las femines e i omps da valade che a sjpietin che a rivi la bare intun cidinôr tant pesant che al samee cuasi une blesjteme: a son disjmontâts da Crôsj e da Sostâs, a son lâts fûr das biades cjases di Davaussa, âtisj di Prî, di Pradumbli e di Dasaia, a son rivâts parfint da Truia, vignint jù a fadie pai trois, in grups, das sôs cretes che a siein las neules. E je une joibe di lavôr: e pûr a àn lasjât tai stai i falcets, tas piçules buteghes i marcjei. Cualchidun invezit sai è puartâts daûr, come simbul da lote e da fadie. Come a dî: no. Chest bocon no lu mandìn jù. E denti a dutes las peraules che no vin det, encje il cidinôr al à vuei il sberli da libertât! ❚