“Mistîrs” a Paulâr, un sucès rivât a 30 agns di storie

Ai 23, 24 e 25 di Avost dal 2024 la fieste “Mistîrs” di Paulâr e celebrarà la sô edizion numar trente. La manifestazion e cjape dentri dutis lis frazions dal paîs, invidant miârs di personis a fâ fieste e a aprofondî la cognossince de identitât storiche dal paîs.
◆ Cheste zone e svante di fat un passât impuartant par ce che al tocje il disvilup dai mistîrs, cjapant dentri nons di une cierte altece tant che, par esempli, Jacopo Linussio, nassût a Paulâr e a vuê calcolât tant che il prin imprenditôr de Cjargne e prin imprenditôr in Europe a concepî il lavôr feminin a domicili. Linussio al à vût il merit di fondâ trê grancj implants tessii (a Tumieç, a Mueç e a San Vît dal Tiliment).
◆ Cun di plui, si à ancje di memoreâ il passât leât a chei che ur disin “menaus”, che a àn ideât un sisteme tant zovevul di traspuart dal len, che il so funzionament al previodeve un acompagnament (ancje par distancis une vore lungjis) dai troncs dilunc dai cors di aghe, cun recupar sucessîf intai ponts di lavorazion e di vendite.
In ocasion di “Mistîrs”, lis stradis di Paulâr si jemplaran cu lis rapresentazions di chei che, vie pai secui, a son stâts i mistîrs plui carateristics dal paîs e, plui in gjenerâl, di dut il Cjanâl di Incjaroi (boscadôrs, intaiadôrs, faris, guis, pastôrs, marangons, muredôrs).
◆ Intes seradis di cheste edizion speciâl si fasaran animazions cul fûc che a riclamaran cierts rituâi tradizionâi di origjin pagane leâts a chest element, vâl a dî la “Femenate” (ricorence che e je divierse dal plui innomenât “Pignarûl” prin di dut parcè che si fâs il dì prime de Epifanie, e dopo parcè che, impen che un pignarûl sempliç,  al ven impiât un grant pipinot metût suntune base a forme di romp) e il “Tîr des Cidules” (dopo dal amont i paisans a impiin un grant pignarûl che cun chel i dan fûc aes cidulis, ogjets di len di forme taronde che a vegnin butâts a man, e ogni lanç al ven acompagnât par solit cuntune filastrocje o cjançon di significât simbolic).
◆ Sedi la “Femenate” che il “Tîr des Cidules” a àn lidrîs pardabon antighis, probabil celtichis, e a son dôs des ricorencis plui carateristichis dal cjanâl. “Mistirs” al rapresente dal sigûr une ocasion ideâl par ricuardâsi di lôr e par trasmeti la cognossince ai miârs di visitadôrs che a assistaran.
“A son passâts aromai trente agns di cuant che, adun cun cualchi paisan, o ai decidût di dâ vite a un avigniment smicjât a valorizâ i mistîrs antîcs carateristics dal nestri cjanâl”, al conte Mario Revelant, ex Sindic di Paulâr.
“Mi visi ben che la idee e à cjatât di subite un bon sucès, calcolant ancje il fat che o vevin cjapât dentri lis variis regjons dal arc alpin, otignint di vê di ognidune di chestis regjons un rapresentant che al vignìs a Paulâr par rapresentâ apont un mistîr tradizionâl.
◆ E je une sodisfazion no di pôc chê di celebrâ la trentesime edizion: il sucès simpri in cressite di cheste manifestazion (che e rive a clamâ in medie tra dîs e dodis mil partecipants) al è il simbul dal amôr de nestre int pai nestris valôrs identitaris.
“Mistîrs” e pues jessi calcolade a plen tant che la fieste dai abitants dal Cjanâl di Incjaroi, che in cheste ocasion speciâl a vierzin lis lôr cjasis e a van fûr pes stradis puartant cun se i imprescj di epoche carateristics de storie dal nestri cjanâl. Cun chei imprescj, la int e fâs tornâ a vivi i mistîrs vecjos, mostrant l’inzen e la culture dal lavôr che la nestre int e à simpri vût vie pai secui, e che nô o volìn conservâ no dome tant che memorie ma ancje come memorie.
◆ Chest an, in particolâr, o volaressin tornâ a mostrâ lis rapresentazions dai lavôrs dai muredôrs, e clamâ ospits avonde cognossûts leâts ae nestre culture enogastronomiche.
Par gno cont, “Mistîrs” e rapresente pardabon il mût miôr, pai paularins, di acetâ i visitadôrs e di presentâsi a lôr rimarcant chê che e je la lôr identitât storiche e plui autentiche.
Mi displâs però scugnî ameti che, massime intes ultimis edizions, l’avigniment al à cjapât une plee in cualchi maniere masse comerciâl, cul risultât di vê in part pierdût chel che al jere il so spirt origjinari. Par chest, o intint impegnâmi par tornâ a vê chel spirt che al è la vere essence de manifestazion.” ❚