La fuartece, che e jude a jessi salts intai moments dulà che no bisugne molâ

Ai 30 di Lui dal 2004. I vevi prometût a mê fie, di disenûf agns a pene finîts, di puartâle fin su la spice dal Colians, la mont plui alte dal Friûl. La imprese e jere avonde impegnative par me che, a 48 agns, o soi inrusinît e fûr di alenament. Je vevi imprometude e o vevi di mantignî la peraule. E je une escursion za fate di fantat, ai timps dal liceu, cui amîs dal paîs e un compagn di scuele cjargnel tant che vuide. No son passaçs masse pericolôs, dome che a son une vore di chilometris e un grum di disnivel pal gno flât. O vevi alore organizât di fâle in doi dîs: la prime dì rivâ cu la machine al Tolazzi, che al è a cuote 1370 e montâ sù a pît fin al ripâr Marinelli a 2120 metris. Te dì daspò, frontâ la cleve fin ae cime.
◆ Cumò o soi tal jet. Ta chel parsore di me e je mê fie, che e sclope di contentece pe aventure. No i àn pesât nuie i 710 metris di disnivel dal Tolazzi al Marinelli, intant che jo ju sint, e ben, tes gjambis. Ce po, jê e je zovine e atlete in plene forme, jo un impleât che la vore plui penze che o fâs al è svangjâ l’ort. Bodifate che il Marinelli al è une vore ospitâl, plui che un ripâr di mont al somee un albierc. La doce perfete, la cene buinone, polente e frico, il jet comut. E buine ancje la sgnape che mi jude a cjapâ sium.
◆ Dopo de svee sul cricâ dal dì, la gulizion nus scjalde par frontâ l’aiarin frêt che, a chê altece, al beche la muse. Si inviìn. Prime, però, une voglade panoramiche viers la Cjargne, il Crostis, il cjanâl Grant, chel dal Cjaule, la crete di Tamau e, in face sot dal Tierç, la biele malghe Lavareit, lûc che nus à simpri dât un bon acet. Si va sù pai prâts dal Pic Cjadin, par un troi segnât te jerbe di un vert che no si rive a descrivi. I voi si jemplin di chel vert. Sù a zigzag fin dongje la cime dal Pic, dopo si cjamine par une creste fine e lungje che a fâs strani, cu la rive che e va injù ripide sei a drete sei a çampe. E je un pocje di fumatele e al somee di cjaminâ tal aiar. Di bon che il troi al è avonde larc. Lu àn fat sù i soldâts te prime orende vuere mondiâl. Al è ancjemò cualchi tocut di mûr a sec che al ten sù il troi pai mui. O pensi a gno nono, che de Sicilie al à passât doi Inviers achì dongje, sul Pal Piçul, a trope int muarte dibant, dome pai interès di pôcs e pal “nazionalisim”, struc di violencis.
◆ Mê fie e je incjantade des rosis che a dan fûr des fressuris dal cret e e fâs une foto daûr chê altre. A son lis rosis de Jerbe di Balsem zale blancjite, de Jerbe di S. Jacum zale come l’aur, de Minutuartie blancje e cu lis fueis a forme di falçut.
Rivâts al jôf dai Monuments (2307 m), si volte a çampe e si jentre tal cret blanc di calcâr dal Colians. Par traviersâ une plache grande di piere dute fressurade de aghe de ploie, si à di tignîsi par une cuarde di açâl. Al è forsit il toc plui di inzirli de esperience ma la cuarde nus da la sigurece che e covente. Dut câs, passât il toc ferât, si sentìn par une piçule polse. Il soreli al è za alt, o sfladassi e o bêf aghe. Mê fie, invezit, come nuie, e tache a fevelâ.
“Pai, di cuant che o ai vinçût la cope dal mont, tancj a disin che o soi fuarte. Tu ce disistu?”
“Jessi fuarte al vûl dî vê fuarce, e tu tu ‘nd âs sigûr – o cjapi flât – ma forsit cui che ti cognòs al intint fevelâ de tô fuartece.” “Ce diference ise?” “La fuarce e je chê fisiche, clâr. Vê fuartece invezit al vûl dî jessi salts, convints e tignî dûr tal fâ ce che si crôt bon e just. Al è come in cheste escursion che o sin daûr a fâ. O soi za strac e za mi jere vignude la tentazion di molâ e tornâ indaûr. Si sin dâts un obietîf, chel di rivâ insom dal Colians. Cun calme e prudence si pues fâ. O soi strac, o varìn di fâ ancjemò un grum di fature. Vê fuartece al è no molâ mai, no bandonâ il nestri fin par pôre, par pegrece, pe comoditât. E nô no molarìn, come che no tu âs mai molât nancje tu, cundut che tu ‘nd âs vudis di sconfitis e delusions. Cheste e je la fuartece. Cumò tornìn a rimpinâsi che al ven il toc plui dûr.”
◆ O vin denant il grant lavinâl dal Ploto, glerie e clapons, dut grîs, desolât e desert. O sin di joibe e, fûr di cuatri zovins partîts prime di nô e doi viei che ju vin lassâts indaûr, nol è nissun. Si monte sù cun fature sul glereon ripit. I pîts si infondin te glerie e si va sù planc a plan. La fantate e je simpri indenant e, di trat in trat, si ferme a spietâmi. O rivìn, biadelore, a un salt di cret, che si passe facil. Di chi si va sù pai crets a gjat, cence pericul ma si à di tignîsi cu lis mans fin a une altre cleve ripide di glerein cedevul e faturôs. Scuasit ae fin dal canalon a son i segnâi di lâ a çampe par une parêt di crep curte ma impegnative.
◆ Une piçule polse i permet a mê fie di cjapâ in man la machine fotografiche. Cun dut che l’ ambient al è inospitâl, a sflorissin ca sù la Linarie di mont viole e rosse, il Rasponçul turchin e il Confenon zâl. Maglis di colôr vivarosis tal grisum dal cret.
Nus reste l’ultin toc, dut cret e pieris grisis e, insom, si vualme la cjampanute dal Colians e, dopo un trat di creste, la crôs de spice (m 2870). Je vin fate! Un abraç e si strenzìn a fuart. Foto ricuart, firmis, e si sentìn cidins dongje de crôs.
◆ Denant di un panorame inmagant, cence nûi, cul soreli a plomp, si sta cidins. O sin parsore di dut il Friûl. No rivi a viodi Cjarlins ma o soi sigûr di dulà che al è, parcè che di Cjarlins o viôt la spice dal Colians e de Cjanevate.
Dopo di un pôc di cidin, par lassâ fevelâ i voi e il cûr, o profiti dal moment magjic par lâ dilunc cul discors che mi à stiçât: “Fie, ogni viaç al à une partence e une rivade, lis sôs fermadis, lis polsis, lis dificoltâts. L’impuartant al è vê i segnâi che ti mostrin la strade. Pe nestre escursion o vevin i segnâi dal CAI, o vin passadis lis dificoltâts e, cun fature, o sin rivâts ae cime. Te vite al è compagn. Si à di vê i segnâi che ti mostrin la strade, si à di savê dulà lâ. Al sarès za tant ma nol è avonde. Ognidun al à ancje di jessi fedêl al so progjet e tignî dûr tes dificoltâts, si ben se al covente cetante fature. Dome cussì si pues rivâ a viodi ce che o viodìn cumò. Un spetacul maraveôs che i spiete dome a chel che nol mole e al ten dûr fin ca sù!”
“Se o ai capît ben, vûstu dî che cussì al è ancje te vite?”
“Sì, dome che te vite al è plui complicât. No simpri si rive te spice bramade, par une vore di motîfs che no son simpri colpe nestre. Cundut achel si à di ve indurance, resisti, vê coraç e tignî dûr istès. E se ancje no si rive insom, si à dut câs fate la robe juste, si à la cussience a puest e si pues gjoldi di une vite spindude ben. Cheste e je la fuartece, fie!”
Juste vincj agns dopo, ai 30 di Lui dal 2024, dopo cetantis delusions e sodisfazions, mê fie e je rivade ancje su la spice de sô cariere sportive. ❚