Puedie nassi une gnove zornade pe Glesie?

No podìn passâ i 50 agns di Glesie Furlane, cence fermâsi e fâ une polse a Cjampei di Ravasclêt par ricuardâ la date dal 13 di Setembar dal 1988. In chê dì, 20 di lôr fra predis, laics e laichis a firmavin il document: “Ai Furlans ch’a crodin: Puedje nassi une gnove sornade pe Glesie?”
◆ Ai 23 di chel mês un gruput di nô al leve li dal vescul par presentâi la opare, ma il vescul Battisti al jere za stât informât dai servizis segrets e nus ricevè malementri. Al jere fûr di se. In chê dì, se o fossin stâts cualchi secul indaûr, il document al sarès stât brusât in place Contarene a Udin e forsit o saressin stâts brusâts vîfs ancje nô. Dopo, tal passâ dal timp, il vescul al clamà i firmataris un par un (no ducj) par domandâ spiegazions e in pratiche par fâ ritirâ la firme che a vevin metût.
Aromai o vin di cjalâ “Puedje nassi…” cui voi di vuê e o capìn subit che no si tratave di chel babau che a fasevin viodi. E je vere: ciertis peraulis a jerin crudis, ma la sostance si le sintive tal aiar e altris, in chei agns, predis e bonsignôrs, a disevin, cence scrivi, ce che noaltris o vevin scrit.
◆ Ma din une cjalade di scjampon ai tituluts di chest document di 150 riis, no plui di un sfuei e mieç.
Une muse gnove di glesie
O disevin che “no si trate di fondâ une altre glesie, ma di riscjâ une leture gnove de glesie di Crist”. Chest lu varès proferît ancje bons. Rinaldo Fabris, grant studiôs de Bibie e professôr in seminari. Intune interviste dal Otubar 2014 al Centri Balducci al diseve: “Per questa chiesa così come è, non c’è futuro … non c’è clero… non ci sono preti…, la chiesa clericale di fatto è finita”.
La distribuzion dal clericât
Al vignive frontât il probleme dal plan regoladôr diocesan li che un predi, date la scjarsetât, al varès vût di tignî simpri plui paîs. I firmataris no jerin dacuardi. Su chest pont il document, de bande dai sorestants, nol è stât nancje cjalât: escludût subit e vonde. Di fat vuê tu âs plevans responsabii di sîs, vot, dîs parochiis. Cemût che a fasin, no sai.
La fonde de juste spiritualitât dal pastôr
Si tacave la regule di chei timps: par puartâ in miôr la comunitât, al è di trasferî il plevan ogni nûf agns. Si diseve: “Alore ancje pal ben de famee, al è just cambiâ partner ogni tot di agns”.
Fiducie te int
Glesie Furlane e je simpri stade acusade di jessi populiste, di vê masse considerazion pe int. La sostance de nestre mentalitât in proposit, le cjati intune peraule di bons. Dino Pezzetta, predi une vore stimât sei de bande eclesiastiche che di chê laiche. Lui al diseve: “Per me che cos’è il modello Friuli? Modello che vede protagonisti il popolo normale, non i politici, non i preti, non le istituzioni, ma il popolo” (interviste dai 2 di Mai dal 2016).
La sielte preferenziâl dai paîs piçui
Pe pastorâl diocesane i paîs piçui – i ultins – a varessin vût di zirâ ator dai centris citadins che par impuartance a restavin i prins. Al contrari di ce che al veve za predicjât il vescul: “La Chiesa italiana ha fatto questa scelta, la prima: Ripartire dagli ultimi, che sono il segno drammatico della crisi del nostro tempo” (Scree dal Sinodi Diocesan dal 1983).
Predis gnûfs – Comunitâts gnovis
Il document al dîs: “Dâ responsabilitât ai predis che si son sposâts… Che si scomenci a pensâ ai zovins che a desiderin deventâ predis sposâts…” Forsit al jere chest, pe autoritât, il cjapitulut plui contestât, proibît, scandalôs, dissacrant. Ma o leìn tal document uficiâl dal “Sinodo dei Vescovi, Assemblea speciale per la Regione Panamazzonica” dal Jugn dal 2019: “Si studi la possibilità di ordinazione sacerdotale di anziani, preferibilmente indigeni, rispettati e acettati dalle loro comunità, sebbene possano avere già una famiglia costituita e stabile…”
La glesie in Friûl e pues vê un avignî
In chestis riis si viodeve un troi pe rinassite de glesie in Friûl. No mi somee che il document al fos il boboròs che la autoritât diocesane e faseve viodi. A son passâts trentesîs agns di chel 13 di Setembar dal 1988. Rivâts al 2024 il document, ancje se a son cambiâts timps e circostancis, al reste simpri atuâl, ma soredut al reste ancjemò cence rispuestis. Intant si dîs che la int si slontane simpri di plui de Glesie e par chest, e va indenant, e reste vive, vere e colme di marum simpri la stesse domande: In Friûl “Puedje nassi une gnove sornade pe Glesie ?” ❚