“Une sisile intal cîl a svolarà,
come un agnul la sô vôs ti clamarà.”
(dal toc “Torne”)
Vididule project a son une band furlane di musiche folk e neo folk che e nas tal 2009. Il non dal grup al ven de vididule, une plante rampighine e infestante, che si fâs strade ancje tai lûcs rimpinîts par puartâ il so bielissim flôr blanc.
La lôr ativitât e tache come grup che al fas teatri e cjançon, fasint scoltâ al public la musiche furlane, cirint di valorizâ la lenghe e metint lis poesiis in musiche e puartant ancje cjançons gnovis scritis dal grup.
◆ La formazion dai prins timps e jere di siet musiciscj. Doprant tastieris, struments a flât come l’oboe e percussions si esibivin sunant in events diviers e festivai e colaborant cun spetacui culturâi come “Fûc su lis culinis” e “La gnot dal agaçon”.
Tal 2019, dopo dîs agns dal lôr esordi, a publichin il lôr prin album cul titul “Antesi”, che a puartin ancje tal festival “SUNS Europe”.
◆ Tai ultins agns la formazion si strenç par cjatâ un grup plui in linie cun la “direzion musicâl plui neo folk che i Vididule a àn cjapat” come che nus conte un dai fondadôrs e musiciscj, Daniele Ursella. “Il prin disc al jere une prove, par decidi ce direzion musicâl cjapâ. Si sin cjatâts cuntun grup di cuatri, cun mancul tastieris, plui struments de tradizion popolâr come struments a cuarde e flauts.”
◆ La lôr musiche e il lôr repertori a van de musiche furlane tradizionâl, ma ancje taliane e internazionâl, ae magjie de musiche celtiche e folk irlandese, proponint ancje ritmis e sonoritâts modernis des covers di cjançons come “Il cielo d’Irlanda”, “Volta la carta”, “Il pescatore”, “Scarborough fair”, e v.i.
Indispensabii par chest gjenar musicâl e je propit la strumentazion: il flaut traviers e il tin whistle, lis percussions, la ghitare, il bas e il bouzouki irlandês.
I membris dal grup a son i fradis Daniele e Fabrizio Ursella, la flautiste Marina Ferro e la vôs incredibile di Gianna Saccomano.
Chest Istât al è jessût il secont album intitulât “Torne”. Un imni ae libertât, e ae vite.
L’album però al e ancje deventât une dediche a chê che e je stade une des fondadoris dal grup e che e à dât la vôs e la sô anime pe musiche: Gianna, che purtrop e je mancjade par un brut mâl e à scombatût fin ae fin.
◆ «Di jê al reste chest disc, dulà che a son tancj i tocs scrits di jê.» Une ocasion par ricuardâ la sô voie di vivi, di cjantâ e di fâ musiche. Il disc “Torne” al jere stât volût a fuart di Gianna. Al ten dongje cinc tocs: “Il to vistît”, “Torne”, “Prove a lâ”, “Nô o sarìn” e “Il timp al cor”.
◆ Ancje la custodie dal CD dai Vididule al à une dediche a Gianna su la cuvierte e nus puarte a scuvierzi un mont cuasi di flabe. Tal librut si puedin lei i tescj dai tocs par furlan e ancje la traduzion par talian, par cjantâ insiemi a Gianna lis sôs cjançons.
Nô o sarìn li tal clâr, dulà che la vite a scor / e si svualarà come uciei che a stan par migrâ.
(dal toc “Nô o sarìn”)
◆ “Il toc che i tignìn plui di ducj al è “Nô o sarìn”, parcè che e je la prime cjançon scrite di Gianna, e e conte de sô esperience: vite e voie di imagjinâ il futûr.”
E je une cjançon di sperance che e rapresente ancje un auspici pal avignî dal grup che Gianna e à tant volut e che i Vididule project, insiemi ae vôs di Dania Lascialfari, si son prometûts di puartâ indenant.
◆ Lait a scuvierzi di plui su chest bielissim grup. O cjatais lis cjançons ancje su Youtube, Instagram, ma soredut dutis lis novitâts cu lis datis e i lûcs là che a saran in conciert, ma ancje i contats direts sul lôr sît:
https://vididule.altervista.org/ ❚
