A curâlu il musicolic Alessio Screm.
Tancj i ospits par un ritrat inedit
dal mestri di Adorgnan
Daspò de scree dal Museu permanent Luigi Garzoni, che o vin seguît cuntun articul dedicât tal numar di Avrîl, museu che si pues visitâ a Cjassà (dutis lis informazion si cjatin sul gnûf sît internet www.museogarzoni.it), al è in vore un altri progjet ambiziôs dedicât al “Cjantôr dal Friûl”. Nuie di mancul che un documentari: un document audiovisîf ben struturât che al sarà componût a pontadis, une par ogni teme che al sarà tratât, e che al larà a incressi la part multimediâl dal Museu. No dome, al varà ancje une sô vieste integrâl, e al vignarà presentât in cetantis proiezions ator pal Friûl, a partî dal mês di Dicembar.
◆ E je la prime volte che si realize, come pal museu, un progjet di chest gjenar, cun chê di fâ cognossi in maniere plui aprofondide, e in clâf inovative, la vite e la opare dal mestri Luigi Gazoni, nassût a Tresesin tal 1890 e muart a Cjassà tal 1972, un dai autôrs plui amâts e eseguîts inte nestre tiere e ancje intal forest, par chel che al tocje soredut il cjant corâl.
◆ Regjist e senegjatôr dal documentari al è il musicolic, nestri colaboradôr, Alessio Screm, fra l’altri diretôr artistic e curadôr de mostre permanente Luigi Garzoni, studiôs e autôr che si è bielzà confrontât cu lis videocjamaris, come tal documentari “Caro Maestro” che al à curât, dedicât al compositôr paularin Giovanni Canciani (1936 – 2018), e pai contignûts video de sô iniziative “Syntagma – itineraris di art musicâl”, ae scuvierte de iconografie musicâl inte citât di Udin.
◆ «O soi pardabon content di podê dâ il gno contribût a cheste iniziative une vore interessante e stimolante», nus conte Screm. «Si varà mût di cognossi un Garzoni inedit, oltri ae sô grande innomine di vilotâr e compositôr di tante biele musiche corâl, come che al è pe plui part cognossût. Si darà lustri ancje ae sô ativitât poetiche, educative, pedagogjiche, critiche di gjornalist, e musicâl culte, stant che al à scrit ancje tante bielissime musiche strumentâl, sacre e profane, come serenadis, romanzis, cuartets, musiche par orchestre, messis, litaniis, imnis, motets, e al sarà pussibil viodi documents inedits, che fin cumò a son restâts come platâts intes tantis, ma tantis cjartis de biblioteche privade dal mestri».
◆ La intenzion e je chê di fâ cognossi Garzoni a un public larc, di mût di stiçâ ancje i zovins, che a àn grande confidence cui schermis e i videos in gjenar. Il lavôr tecnic al viôt impegnade une scuadre di professioniscj, risultât di une coproduzion cun Summergō Lab e Organic Audio, cul bisnevôt dal mestri, Dino Garzoni, responsabil de fotografie e dal video editing. Neysa Rivadineira e sarà incargade de produzion, Andrea Peluso in cualitât di fonic di prese direte e di post produzion, Emanuele Pertoldi come inzegnîr dal mixing e responsabil de post produzion.
◆ «Diviers a son i lûcs e diviersis lis personis intervistadis par disvelâ chest Garzoni inedit», nus spieghe Alessio Screm. «Fondamentâls lis testemoneancis dal nevôt Daniele Garzoni, memorie storiche, lui che lu à cognossût come nissun altri e che nus darà un profîl familiâr di so nono. Come lis testemoneancis di trê personis cumò anzianis che a son stadis arlevis di Luigi Garzoni cuant che a jerin zovenutis. Tra i ospits, cun significatîfs e resonaments su la sô figure e su la sô opare, i musicolics Marco Maria Tosolini e David Giovanni Leonardi, l’antropolic Valter Colle, il president de Societât Filologjiche Furlane Federico Vicario, la musiciste Luisa Sello, il cjantautôr Lino Straulino e la cjantante Anastasia Fabbro, oltri che la sindiche di Cjassà Ornella Baiutti, i Cjantôrs dal Friûl direzûts di Francesco Zorzini, la Bande di Cjassà e, inte esecuzion di composizions di caratar cult dal mestri Garzoni, pôc o par nuie cognossudis, la Fvg Orchestra».
◆ La sindiche di Cjassà Roberta Baiutti e comente che «cu la divulgazion di chest progjet culturâl di grant valôr, o vin la ambizion di slargjâ i confins de cognossince dal om e dal artist, no dome a nivel locâl, ma ancje di là dai confins talians. Une realizazion che e pues rivâ aes comunitâts furlanis tal mont, in maniere podê tornâ il just lustri e la juste impuartance a chest personaç tant cjâr a Cjassà». Il documentari al varà ancje i sottitui par furlan, in graciis ae colaborazion cu la Agjenzie Regjonâl pe Lenghe Furlane. ❚
