“Putridambur” dai LaipNessLess;
“l’ultin album restât sul nestri planet”
“Putridambur”, il gnûf album dai LaipNessLess, e je une opare ambiziose che e ten dongje une vision apocalitiche dal futûr e le riflet intun viaç sonôr intens, cence polse, distribuît in dîs tocs cence une continuitât.
Publicat in vinîl e disponibil in digjitâl dai 21 di Setembar, “Putridambur” al rapresente no dome un progjet musicâl, ma ancje une esperience sensoriâl e concetuâl che e cjape dentri fin in font cui che al scolte.
◆ Sui lôr profîi social il grup dai LaipNessLess, che za o cognossìn e o vin vût il plasê di intervistâ tai agns passâts, a presentin il lôr gnûf album cussì:
«“Putridambur” al è un disc des bestiis pes bestiis, di cjan a cjan, di grison in grison, di invertebrât a invertebrât. Atenzion parcè che jessi foropâts dai carûi al è sempliç, ma distirpâju al è impussibil. Al nas intune suaze di disasi sociâl grâf. Assistence sociâl, cumulament seriâl, magjie nere, redit di citadinance, cjasis popolârs e vedranisim furlan.
Situazions degjenerantis che a puartin l’om a jessi simil ae bestie. Un disc par sborfâ la “Schadenfreude” e peiorâ la empatie.»
◆ Il concet di “Putridambur” si disvilupe intune narazion musicâl che e travane i secui, partint dal 1980 fin al 2324. Il disc al tache intun timp seren e cuasi romantic cul toc “Bidonville” e “Al plôf a Marghera”, che a riclamin un passât aromai lontan, ma ancjemò presint te memorie coletive. Chescj tocs a crein imagjinis poetichis di une epoche mancul contaminade, dulà che la vite, pûr tai siei contrascj, si disvilupe intun mont ancjemò avonde intat.
◆ Dut câs, il viaç musicâl si môf svelt su senaris plui neris e distrutîfs. Cun “Le salate di Cˇernobyl’”, o jentrìn te ete des primis catastrofis nucleârs, intun passaç fondamentâl che al anticipe la ruvine dal planet.
La espansion incontrolade des megalopolis e ven evocade in “N abitants”, dulà che la umanitât si piert intune corse mate viers la cressite urbane, alienade e ben lontane de nature.
Lis cjançons che a vegnin daspò a esplorin i cambiaments psicologjics e sociâi che a vegnin dopo di dute cheste distruzion.“El meteopatic” e “Animalist di apartament” a piturin une umanitât ae derive, sclave di paranoiis e maniis ossessivis. In chescj tocs si percepìs une calade progressive viers l’autoanulament.
La colme de oscuritât e rive cun “Adelchi Phalloide”, “RnRnd (radon a random)” e “I cais”, che a rafigurin une nature in rivolte cuintri la umanitât.
La musiche culì si fâs plui scure e framentade, cuasi caotiche, rifletint un mont aromai al colàs. La devastazion e je tant grande che il destin de Tiere al pâr segnât in mût ireparabil.
E sì che l’album si siere cuntun fîl di sperance. “Pinesh (il dio onnibevente)”, l’ultin toc, al rapresente une preiere coletive indreçade a un diu misteriôs. Cheste preiere e ven invocade par fâ tornâ a nassi l’ultin album restât sul nestri planet: il Putridambur. Al è un at di disperazion e, tal stes timp, di resistence, un riclam a ce che al podarès ancjemò jessi salvât.
◆ I LaipNessLess no son dome origjinâi te lôr musiche, ma ancje tal mût che a decidin di distribuîle. Cuntune clare critiche al marcjât musicâl contemporani, il grup al sielç di dâ fûr sore nuie il lôr gnûf album in formât digjitâl su dutis lis plateformis, refudant cussì lis logjichis comerciâls che spes a svilissin la creativitât.
Tal stes timp, lis tresinte copiis in vinîl unichis e numeradis, a saran vendudis dome intant dai concierts. Un vêr at di resistence e valorizazion de musiche fisiche.
Il disc al à ancje une confezion pardabon speciâl e in linie cul album: ogni disc al è involuçât intun sac des scovacis, simbul dal lassit finâl dal ultin om restât in vite.
Chest detai al ven acompagnât di une letare par furlan miscliçât al inglês. In plui a son ancje ogjets simbolics come claps, semencis di forment e un manuâl di un contadôr Geiger, li par amplificâ il messaç di desolazion e sperance che al travane dut l’album. Si trate di un at concetuâl fuart, un invît a rifleti su la cundizion umane e su lis consecuencis des nestris azions sul planet.
La grafiche dal vinîl, realizade dal artist Emanuele Bertossi, e je ancjetant significative.
Cence scritis o riferiments direts al grup, l’artist al à creat “petroglifs neoprimitîfs” suntun font di ciment colôr vert petroli, evocant une estetiche post apocalitiche e primitive. Il vinîl trasparent al riclame la materie plastiche che e incuine, invezit lis etichetis cence nons a rapresentin i simbui antîcs che une volte i oms incidevin sul clap. Ogni element visîf al è pensat par completâ la esperience di scolte, dant une dimension simboliche che e inricjìs il messaç dal album.
◆ “Putridambur” al è stât realizât graciis aes colaborazions artistichis cun Paolo Forte ae armoniche, Leo Virgili al theremin e Nico Pavan al trombon. Chescj artiscj a àn contribuît a fâ cualchi toc (“Al plôf a Marghera”, “Le salate di Cˇernobyl’” e “Animalist di apartament”) ancjemò plui intens e sugjestîf, zontant sfumaduris sonoris che a amplifichin l’impat emotîf dal disc.
◆ I LaipNessLess no si limitin ae dimension musicâl. Cui che ur stâ daûr al sa che ogni volte a organizin veris performance dilunc dai lôr concierts. Il conciert dai 21 di Setembar a Sant Andrât dal Cormôr, dulà che a àn presentât il gnûf album, al è stât une esperience infondade. Il public al è stât invidât a partecipâ, e il conciert si e trasformât intun mont post apocalitic imagjinât e cjantât dal grup.
Come che a scrivin ancje sul invît al conciert: «al larà in sene un mont incuinât, industriâl, scanât, apocalitic cun zombis urbans e i ultins dal gjenar uman…»
◆ “Putridambur” al è tant di plui di un sempliç album: al è un viaç concetuâl che al esplore i confins de nestre realtât puartant chel che al scolte intun futûr distopic dulà che la umanitât e je clamade a fâ i conts cun lis sieltis che a son stadis fatis. La musiche, la grafiche e dut il progjet a rifletin une critiche fuarte al nestri presint, ma a ufrissin tal stes timp une sperance fragjile, ma persistente. Une opare uniche che e merete atenzion, soredut par cui che al cîr esperiencis musicâls che a van oltri al sempliç intratigniment.
I LaipNessLess, «un grup dissacrant e cu la lenghe sclete che e disvele i cantins dal mont che la int no viôt e no à voie di viodi.» Cun Rudy Citossi ae vôs, Jacopo Casadio ae ghitare e Davide Sciacchitano al bas, a son la plui grande band “interviuçâl” di Muçane.
Ce dî… Se no ju cognossês ancjemò, si sês pierdûts tante robe!
Scuvierzêt di plui su: http://laipnessless.blogspot.com/ e sui lôr canâi social. ❚
