………………………………………………………..
I TRÊ PROVERBIS
Novembar di fumate, bon timp al lasse
❋❋❋
Novembar ploiôs cjamp frutuôs, Novembar glaçât mandi semenât
❋❋❋
A Sant Martin (11-XI) ogni most al devente vin
………………………………………………………..
LA CUSINE
Mignestre di rîs e verzis
Sopis, ‘sufs, paparots, meste, panadis e altris boboets
Polente cuinçade
Paste, rîs o vuardi cun salam o luianie
Mignestre di rîs e râfs
Mignestre di favis
Mignestrons di coce, fasûi o patatis
Fasûi cul muset
Articjocs farsîts
Fasûi e panzete
Foncs gratinâts
Verduris cuetis a vapôr o lessadis e passadis te fersorie
Ufiei in umit (te fersorie cu la spongje)
Patatis (tal for, lessis, marinadis, con cevole e asêt, te fersorie, in torte, e v.i.)
Patatis e tocuts di speck (in tecje)
Macarons di patatis o di coce cun ragù di ocje
Fertaie cun salam o luianie a tocuts
Ocje in rost o in padiele
Salam di ocje
Cjavrûl tal vin o in salmì
Luianie cuete te morcje di vin o di lat
Salam tal asêt
Salam o luianie o muset sot lis boris
Cjars purcinis cun broade, crauts o altris verduris garbis
Talpin di purcit cu la verze
Raze in rost o in padiele
Rost di purcit al lat
Salvadi
Fasan farsît
Cjamoç in umit o rustît
Pes di mâr in umit
Klotzen di Tarvis
Strucul di miluçs
Torte di carotis e mandulis
Favis di Triest
Cacos, gnespui e miluçs ingranâts
………………………………………………………….
IL SANT DAL MÊS – I Sants (Ducj i Sants)
La solenitât cristiane che e ricuarde ducj i sants e cole il prin di Novembar. E nassè ae fin dal secul VIII, cuant che i vescui francês le inventarin par scancelâ il Samhain (Cjadalan dal calendari celtic), ancje se la tradizion di venerâ i Sants e va indaûr ai prins secui cristians, cuant che si començà a onorâ i martars. A coventarin però cetancj secui par che la fieste si slargjàs in dute Europe e dome intal 1475 pape Sist IV le fasè obligatorie pe glesie universâl. Pe liturgjie, e rapresente la fieste dai redents cognossûts e no cognossûts, calcolâts beâts; in altris peraulis e je la fieste dal Paradîs. La grande fortune di cheste fieste e rive, oltri che dal so valôr religjôs, ancje de sô colocazion particolâr intal calendari di metât Autun, dulà che ancjemò prin i Celtis a fasevin la lôr plui grande fieste dal an, il Samhain, e dulà che si siere il calendari dal cicli agrari e di chel de nature. La tradizion religjose cristiane za tal secul X e previodeve i jespui doplis (“pai vîfs e pai muarts”), cuant che si preave ancje pai defonts in glesie e intal cimitieri; usance conservade ancje in dì di vuê. Pe ocasion, la tradizion dal popul e celebrave une schirie di usancis a pro des animis, come la distribuzion dal “pagnut dai muarts” ai puars (che a rispuindevin cuntune preiere pai lôr muarts di famee) e la consumazion di mangjâts fats cu la farine gnove e cul vin gnûf (ma, plui dongje di nô, ancje dolçs come il pan dai muarts, la pinze, e lis favis dai muarts). E jere tradizion ancje lassâ part de mangjative su la taule parecjade cul fin ideâl che i muarts a podessin servîsi, intant che i seglots de aghe a vignivin jemplâts par che lis animis a podessin parâ vie la sêt. Intal cûr de gnot dal prin di Novembar, lis feminis no vevin di “stâ in file”, par vie che si veve di passâle preant, intant che lis cjampanis a sunavin dute la gnot. ❚
………………………………………………………….
LA FIESTE DAL MÊS – La fieste dal Ringraciament
Inte tradizion furlane e jere la fieste dal apuestul Simon (clamât Zelote o Cananeu par diferenziâlu di Sant Pieri) che e sierave dal dut la anade agrarie (par chel la stagjon si clame Sierade) cu la racuelte dai râfs e la metude in bande dai imprescj di lavôr. Ancje i proverbis a confermavin il moment e la vore: par Sant Simon si gjave il râf e il raviçon e Sant Simon i imprescj tal cason. Cussì la fieste di Sant Simon e meteve il sigjîl operatîf a un cicli agrari e e vierzeve il timp de polse dal Invier, tant che in cualchi vile si faseve sagre e si tignive marcjât dulà che si vendevin i plui biei prodots de tiere e i imprescj di lavôr pe anade seguitive (vuê e je restade dome la sagre di Codroip). Cu la fieste di Sant Simon dut al veve di jessi finît e sistemât parcè che ae fin di Otubar dabon al començave il frêt. Ancjemò une volte i proverbis meteorologjics furlans cu la lôr antighe sapience a confermavin il particolâr moment: Sant Simon, manie e scufon, par Sant Simon si tire sù la cjalce e il scufon e S. Simon passât, Invier jentrât. ❚
……………………………………………………
FRIÛL CONTADIN. Lis voris dal mês
Prin mês dal Autun, Otubar al siere lis vendemis de ue e di ducj i prodots de tiere che a àn puartât davoi e ligrie sui cueis e su la plane e po dopo intai curtîi dulà che une volte a rivavin i cjars, tirâts dai cjavai e dai bûs, plens di ue, panolis e patatis e di miluçs, piruçs, coculis e cjastinis e pardut si sintive il bonodôr dai moscj e des trapis intant che borcs e andronis a jerin profumâts di polente fate cu la farine gnove. La fieste de Madone dal Rosari (ai 7 di Otubar) e segnave dapardut la colme des vendemis. Puartâts a cjase i prodots de tiere, dopo vê semenât pe gnove anade, il cicli agrari si sierave. La fieste di Sant Simon (ai 28 di Otubar) e jere chê che e meteve il sigjîl su ogni vore de campagne. Al jere rivât il timp umit dai foncs e dai gnespui, dai uciei di pas che une volte si butavin jù su lis bressanis e sui rocui intant che a svualavin ad alt viers lis tieris cjaldis dal meridion. ❚
…………………………………………………
LA TRADIZION DAL MÊS – Fâ Sant Martin
Ancje in Friûl la fieste di Sant Martin e deventà il segnâl de fin dal cicli agrari e duncje une zornade di grande fieste, stant che e rapresentave la tierce e ultime fiestone dal an dopo dal Carnevâl e des feriis di Avost. Plui che mai, ae conclusion de anade agrarie, cuant che ducj i prodots de tiere a son za cjapâts sù e puartâts dongje, si veve di fâ un grant licôf (Ocjis, cjastinis e vin a son plats di San Martin). Ma no dome: la date di Sant Martin, pe sô posizion strategjiche tal calendari, e cjapà sù ancje riferiments meteorologjics, tant che e podeve segnalâ il periodi des ultimis zornadis clipis (Istât di Sant Martin, trê dîs e un freghenin), ma ancje il rivâ dal prin frêt e duncje e jere calcolade tant che “puarte dal Invier”. In ultin, la fieste di Sant Martin (11 di Novembar) tal calendari rurâl e cjapà sù ancje conotazions di caratar juridic. Di fat, ancje tal nestri mont contadin, dentri di cheste date impuartante si paiavin lis fitancis e lis locazions, si regolavin lis metadiis, si rispietavin i pats colonics, si rinovavin i contrats agraris e tal câs che no si podessin tornâ a inviâ, il colon al veve di lassâ libar il cjasâl e la tiere e duncje stralozâ. Cussì il lancurôs trasferiment intun altri puest e sot di un gnûf paron in Friûl al jere clamât fâ Sant Martin. Il trasferiment di Sant Martin, che al vignive fat suntun cjar tirât di cjavâi o bûs, li che al jere ingrumât dut ce che e veve la puare famee, ma ancje lis personis, il cjan e il gjat, al jere un dai avigniments plui dolorôs pai nestris vons, tant di vignî ricuardât cun cetante maluserie fin al dì di vuê te memorie coletive e inte stesse narative popolâr. ❚