“Ce figurate!’ Chest al è stât il coment plui doprât di buine part dai slovens in ocasion de cuistion dal referendum sul secont reatôr de centrâl nucleâr di Krško. Pardabon une brute figure, fate sei de maiorance di centriçampe dal prin ministri Robert Golob sei de minorance di centridrete, che te Cjamare di Stât di Lubiane a vevin votât adun ai 10 di Otubar stâts un decret par meti in calendari un referendum consultîf pai 24 di Novembar par un pussibil secont nucli di produzion pe centrâl: 65 vôts a pro, 7 contraris. Juste un mês e mieç dopo, la Cjamare e à fat bon un altri decret che al à scancelât il prin: ai 24 di Otubar, un mês prime de date stabilide pe consultazion, 69 deputâts a àn votât par fermâ dut e dome un cuintri, dal partît Levica (Çampe), che al à volût protestâ cuintri la ande balarine de politiche slovene.
◆ E pensâ che ducj i partîts plui grancj in parlament a vevin sostignût a vôs plene il dopleament de centrâl, vâl a dî il progjet dal reatôr JEK2: il partît di Golob Moviment Libertât (Gibanje Svoboda), i socialdemocratics dal SD (Socialni demokrati) e parfin il Partît democratic SDS (Slovenska demokratska stranka), la formazion plui fuarte de oposizion. Par dî il vêr, cuasi ducj, par vie che Vesna, il partît dai Verts, za sul imprin al veve dât cuintri ae forme pensade pe domande scrite su la schede dal referendum, secont lôr par nuie clare: “sêso a pro dal progjet JEK2, che adun cun altris risorsis al puartarà plui energjie cun bas nivei di carboni e un furniment stabil di energjie eletriche?” Dut câs, no je dal sigûr stade cheste lôr posizion a fermâ la consultazion, impen a son stadis cuistions politichis internis inte maiorance come inte oposizion, che a àn fat rivâ il mont de politiche slovene a une figurate che si viôt da râr.
◆ Ai 24 di Novembar e sarà alore une domenie trancuile di là dal clap: il milion 700 mil eletôrs no varan di stâ a pensâ su ce fâ de centrâl nucleâr dongje cjase, a 77 chilometris in rie drete di Lubiane, 41 di Zagabrie e a 140 di Gurize. Za cualchi politic al à dit però che la cuistion referendum e je dome rimandade: l’implant di Krško, gjestît adun dai doi Paîs, al furnìs il 20% de energjie doprade in Slovenie e il 16% in Cravuazie. ❚
Krško, NO al referendum
Alessio Potocco