Interviste cun Oscar Olivo, cumò coordenadôr
dal moviment Patrie Furlane, che al à metût la çate
in tancj dai moviments politics furlaniscj
che a son stâts intai ultins agns
Oscar Olivo, di Basandiele, classe 1956, al è coordenadôr di Patrie Furlane, moviment politic furlanist. Al è stât protagonist de politiche furlaniste za tal diretîf di Front Furlan e cu la union che e à dât vite al Pat pe Autonomie, che cuant che si presentà pe prime volte aes elezions regjonâls dal 2018 al rivà a elei doi conseîrs. Cuant che lui al met le çate intun grup politic, dispès al rive il risultât.
_
Oscar, Basandiele jerie un ambient furlan cuant che tu sês vignût sù di piçul?
O soi nassût a Udin, ma dopo cuatri dîs o jeri za a Basandiele “dal Carmôr” – cu la “a” – come che si dîs ca. Ancje se o sin sul pidignûl di Udin, chi si è simpri fevelât par furlan e jo o ai imparât il talian dome a scuele. Anzit, mê mari mi à contât un episodi che jo no mi visi plui: o jerin lâts a Udin par fâ spese di blancjarie. O sin jentrâts intune buteghe, e stant che si jere a Udin, mê mari mi domandà par talian «Oscar, cosa vuoi comprare?». Ma jo no rispuindevi. Dai e dai a insisti, o soi sbrocât batint il gno pidut di frut: «Se no tu mi fevelis par furlan, jo no ti rispuint!». Insome, o jeri un predestinât (al rît, ndr).
_
Ise stade une persone o un fat che ti àn fat rindi cont che il furlan al è une lenghe e che chel furlan al è un popul cui siei dirits di rapresentance?
Des mês bandis no jerin personaçs che mi àn insegnât alc. Tal imprin la bataie pe lenghe furlane e je stade une reazion di cûr, no struturade cun sintiment o cognossincis: cuant che cualchidun mi diseve che no si veve di fevelâ furlan, jo di bastiancontrari lu fevelavi di pueste. Dopo o ai tacât a informâmi, o ai scomençât a sintî fevelâ di pre Checo Placerean, a sintî fevelâ di pre Toni Beline, o ai comprât cualchi libri di storie dal Friûl che o cjatavi, e cussì mi soi fate une mê formazion.
Come persone, o ai amirât la coerence e la intransigjence di pre Toni Beline par chel che al tocjave il Friûl, ma o podarès dî che chel che mi à insegnât di plui a sintîmi furlan al è stât il Taramot.
_
E a nivel politic ce percors âstu fat?
A 17 agns o ai sintût fevelâ Pertini a Udin, in chê volte al jere president dal Senât. O soi tornât a cjase e i ai domandât a gno pari cui che al jere chel personaç. Gno pari mi à contât alc, di ce storie che al vignive, e par dute rispueste jo i ai dit «O soi socialist ancje jo!». E cussì o ai tacât a fâ ativitât tal PSI e o soi stât elet tal 1985 in Comun a Cjampfuarmit, e o ai simpri fat la ativitât politiche fin di chê volte fevelant par furlan. Po dopo e je stade Tangjentopoli e pe delusion o ai molât il partît. Dopo di in chê volte no ai mai plui volût vê a ce fâ cun partîts talians.
_
Vie par chest percors âstu vût cualchi personaç politic, ancje dal passât, che ti à ispirât?
Leìnt une publicazion li che si fevelave di furlanetât tal Gurizan, o ai scuviert che tal Parlament di Viene, ae fin de Grande Vuere, l’onorevul Bugatto (e cun lui Faidutti) al fasè intervents par furlan. Chest al è stât di grande ispirazion par me. Mi ingropi ancjemò a pensâ a chest, e je stade une sclopetade tal cûr. E cuant che cualchidun in cualchi Consei comunâl mi dîs di fevelâ par talian, mi vegnin iniment lôr doi, e no mi ven di rispuindi cun educazion, ma – disìn cussì – cun passion.
Pal rest no ai vût un mestri che mi à puartât par man, o ai imparât cjatant personis o leìnt: no si puedin dismenteâ, par esempli, Schiavi e Tessitori.
_
A proposit di leturis, isal cualchi autôr che tu consearessis tant che leture furlaniste?
Mi ven iniment «La fabriche dai predis» di pre Toni Beline. Sedi pal so biel furlan, sedi par vie che al è il spieli e une critiche di une di une societât – ancje furlane – avonde resinte. Un altri autôr che mi plâs, un che al spieghe ben ce che al è stât e ce che al varès di jessi il Friûl, al è Agnul Floramo. Ma a son tancj libris che o ai in biblioteche, ancje parcè che la int mi puarte dongje robis. Pense che une volte un muredôr mi à dât un numar vecjo dal 1946 propit de Patrie dal Friûl, cjatât butant jù un mûr di une cjase.
_
Disimi uns pocjis di leturis de tô biblioteche alore.
Par capî di dulà che dut al scomence, «Storia del Friuli» di Pio Paschini e «Storia del Friuli e dei Friulani» di Walter Tomada. Po daspò, par capî “alc e a la svelte”: «Amôr di Patrie» di pre Toni Beline, «Storie dal Popul Furlan» di Pieri Piçul e «Le nestre storie» di pre Checo Placerean (scrite ancje par sloven, todesc, talian e inglês).
Di pre Checo o invidi a lâ a cirî su la rêt cuachi sô omelie, par sintîlu fevelâ. Miôr se preparâts un tic, però. Parcè che, se no tu sês preparât, tu preseis il snait che al à, ma no di plui. Invezit se tu âs cualchi cognossince in plui, tu sintis che il so al è un berlâ aes cussiencis.
_
E cualchi personaç impuartant tant che inteletuâl?
Prin di ducj mi ven iniment pre Pressac che al jere di cjase chi di nô, a cene scuasit ogni setemane: cun lui si fevelave di dut, des sôs scuviertis sui mosaics di Aquilee, di musiche sacre e no. Ta chestis cenis nol vignive fûr nancje un “ciao” par talian. Po dopo Felix Marchi (fondadôr dal nestri mensîl, ndr) al è une figure che le sint dongje ancje se no lu ai cognossût, cul so jessi anarchic, cence confins mentâi: un dai protetôrs dal Friûl cun pre Checo Placerean. Plui che mestris, adiriture une sorte di “beâts” laics.
_
Ultime domande, un autôr o opare che par te al varès di jessi valutât di plui.
O pensi che se al sarès durât di plui Fausto Schiavi, e sarès cambiade la storie dal Friûl. Cualchi volte o pensi a ce che al sarès podût jessi cumò il Moviment Friûl cun chel cjâf lustri e che volontât che al veve. O varessin une regjon a trazion furlane, no al servizi di Triest come che e je cumò. ❚
………………………………………………………………….
FOCUS. Il personaç
FAUSTO SCHIAVI (Pontebe, 1928 – Udin, 1972).
Inzegnîr, imprenditôr, al è stât un leader de autonomie furlane. Al fo president dal Moviment Friûl dal 1967 fin al an de sô muart. Al vuidà une bataie fuarte pai dirits dal Friûl e dai furlans tal Consei regjonâl. Nassût a Pontebe ai 30 di Avost dal 1928, al à otignût un diplome in inzegnarie mecaniche al Politecnic di Milan. Dopo di une esperience politiche cui socialiscj, si notà tal Moviment Friûl (MF) un an dopo de sô fondazion tal 1966. Al lavorà par dâ al moviment une struture istituzionâl e organizative e un program politic plui coerent. Al fo elet president, trasformant il Moviment Friûl di un moviment di opinion a une formazion politiche organizade. Tal 1968 il partît al ve un grant sucès: Schiavi al fo elet conseîr regjonâl, insiemi cun altris doi autonomiscj. Li e scomençà chê che lui al clamà “la bataie pal Friûl”, par fermâ la emigrazion, par promovi la industrializazion, pe agriculture di mont, pe Universitât furlane, pe autonomie complete. Al jere europeist e federalist, al varès volût leâ l’obietîf de autonomie ae rivendicazion identitarie, convint che il Friûl al fos un grup etnic distint de Europe in gracie da lenghe che al fevelave. Al murì a Udin ai 23 di Zenâr dal 1972, a dome 43 agns. ❚