Une gnove fuarce dal ordin: la ciclogjendarmarie!

Intal 2023 la gjendarmarie in bici e à sgnacât dome in Carinzie plui di 200 mandâts e e à metût in vore 127 denunziis, la plui part cuintri di automobiliscj che si jerin fats brincâ cul telefonut o cence cinturis di sigurece o par vie che a corevin masse. Dispès chescj a restin maraveâts di jessi fermâts di polizais in biciclete, che a fasin multis salacor ancje a pedons e a cicliscj. Tante atenzion e je indreçade ai monopatins eletrics e ai e-scooters, tantis voltis trucâts par cori plui de velocitât massime fissade. La polizie in biciclete e je in servizi de Vierte fin ae Sierade, ma simpri tignint cont dal brut timp. Intal rest dal an chescj polizais a fasin il servizi normâl di gjendarmarie.
◆ La vere gnove e sta dut câs intal fat che ancje in Carinzie, tant che in altris regjons austriachis, scomençant de Sierade, chest cuarp speciâl al sarà indotât di un segnâl acustic in prionte. In dì di vuê al somee che no sedin dubis: dutis lis bicicletis in servizi a varan doi ferâi blu: un centrâl devant dal manuvri e une seconde lûs – daûr dal model di biciclete – sot dal sentarin o parmìs dal puartepacs. Par cumò no varan sirenis.
◆ In graciis dal ferâl blu i gjendarmis a vignaran ricognossûts plui ae svelte, come pai autos di servizi. Chest al sarà di jutori a miorâ la sigurece dai polizais intal trafic. Dutun, la lûs blu e varà ancje l’efiet di ridusi i reâts stradâi. Dut câs no bisugne tignî in mancul il fat che, ancje intal câs des bicicletis, si trate di veicui in servizi a ducj i efiets, cjapant dentri ancje la precedence.
◆ In dì di vuê in Carinzie a son in servizi 29 ciclopolizais in monture, che il lôr lavôr nol è diferent di chei altris gjendarmis, ma il vantaç si viodilu propit intal trafic, là che a puedin intervignî bot e sclop intal câs di infrazions o piçui incidents, ma ancje pe prevenzion, par esempli vualmant se a esistin formis di pericul pai cicliscj e pai motocicliscj sui scooters, tant che busis e pidiments su la cjarezade. Un probleme particolâr che al sta saltant fûr intai ultins timps al è chel dai e-scooters, fin cumò parificâts aes bicicletis. Cun di fat a puedin rivâ a cori al plui a 25 km/h e doprâ lis pistis ciclabilis e ancje lis cjarezadis stradâls. Magari cussì no, però, lis statistichis a mostrin un nivel alt di incidents causionâts propit di chescj mieçs, che lis lôr venditis a cressin simpri di plui, tant che ore presint a son il 52% di ducj i veicui parificâts aes bicicletis. I pericui puartâts di chescj mieçs a son dispès tignûts in mancul, propit pal fat che no esist une formazion specifiche: daûr des statistichis uficiâls, 1 ogni 5 pazients ricoverâts par incidents cun e-scooters al risulte positîf al test dal alcul, e cun di plui tancj vuidadôrs no metin sù il casc. Ur vegnin daûr pussibilis lesions cerebrâls grivis intal câs di ribaltons o incidents, par no fevelâ di ducj i intervents sanitaris par roturis di vues e robis similis. Propit par chest, si cîr di fâ deventâ obligatorie une formazion dai vuidadôrs par che lis stradis a deventin plui siguris par lôr stes e par chei altris. ❚