Scandai su lis peliculis che a àn fevelât di nô o che a son stadis ziradis in cheste tiere

Piccolo corpo, al è un film de regjiste esordiente di origjin triestine Laura Samani. Al è vignût fûr in Italie ai 10 di Fevrâr dal 2022 e al è stât presentât al festival di Cannes tal 2021 in concors te Setemane internazionâl de critiche.
◆ Une zovine femine (Agata – Celeste Cescutti) che e à parturît une frute nassude muarte si met in strade, cu la cassute che e ten dentri il piçul cadavar sù pes spalis, par rivâ li di une gleseute in mont dulà che i àn vût dit che i fruts muarts cence batisim a puedin rissussitâ par un moment, dome il timp che al covente par ricevi il sacrament.
E ven di une isole de lagune venite e e fevele dome venit. Si intope intun zovin (Lince, che plui tart si ven a capî che e je une zovine – Ondina Quadri) che i fâs di vuide e che e fevele dome furlan, il furlan cjargnel. No je une peraule par talian, intal film: parfin il plevan de isule i fevele venit ae int cuant che al ten sù il funerâl.
◆ Agata si scuintre cu la tristerie e cu la indiference: nissun che al vedi une vere peraule di confuart e jê no pues rassegnâsi a chel par sempre intal limbo li che e je destinade sô fie, lant daûr de sentence crudêl dal plevan.
◆ E alore e partìs par un viaç faturôs al limit dal impussibil. No disìn nuie de conclusion di chest viaç. Lis secuencis finâls a son une vore intensis e il spetatôr al podarà dâ la sô interpretazion des senis o ben lassâsi traspuartâ des imagjinis che a van a tocjâ moments onirics e poetics.
◆ Biel film, un film di viodi. Scuasi dut feminin, cun atoris bravonis, ancje se no professionistis (fûr che Ondina Quadri, Lince), biele fotografie, bielis lis senografiis. E un altri presi al è chel di doprâ in maniere corete la lenghe furlane.
Films ambientâts in Friûl a ’nd è (no cuissà trops par dî il vêr). Ma scuasi simpri si trate di un Friûl plui di fantasie che no reâl e scuasi mai la lenghe furlane e je doprade in maniere corete.
◆ Ve culì un struc de rassegne puntuâl e ben documentade che al veve vût fat Fabian Ros su la riviste Segnai di lûs dal 2012 (la version complete e merete une leture atente).
◆ Penne nere (1952, di Oreste Biancoli). O sin intal ambit dal Neorealisim e, duncje, si spietaressisi une aderence nete al ambient dulà che si davuelzin i fats. Ma nol è cussì: il film al è zirât inte alte Cjargne, ma i personaçs che a rapresentin il teritori a fevelin venit, no furlan. E chest al contraste ancje cu la presince, intal audio di sotfont, di vilotis furlanis e cu lis scritis furlanis sui mûrs. Al ven di pensâ che il regjist e il senegjatôr no vedin propit spiçât lis orelis avonde par rindisi cont che al jere alc che nol lave inte lôr impostazion.
◆ La Grande Guerra, opare mestre di Mario Monicelli (1959). Film zirât in Friûl, ma i nons des localitâts a son di fantasie (Civitella, Ponte San Fedele). La vicende si davuelç intal teritori, plui o mancul, jenfri la Plâf e chel che cumò al è il confin cu la Slovenie. Ma la gjeografie e je fantasiose e e à pôc a ce fâ cul Friûl reâl.
◆ La ragazza e il generale (1967, di Pasquale Festa Campanile). Chi il Friûl al è reâl, ma la contadine furlane protagoniste e ancje altris personaçs a fevelin venit!
◆ Idem cun Porca vacca (1980, simpri di Pasquale Festa Campanile). Il film al è stât zirât intal Friûl de alte, in puescj facii di cognossi, ma ancje in chest câs i personaçs si esprimin par venit! ❚
Prime pontade – la seconde sul prossin numar.