E je ore di sdrumâ i tancj lûcs comuns
su la nature salvadie e misteriose
di un popul contadin
BisBisugnarà pûr che cualchidun al tachi a scrivi, prime o dopo, un tratât seri e sientific su la tipologjie umane dal Furlan medi. No intint la lenghe furlane, ma l’individui furlan, antropologjichementri definît intal so timp e intal so spazi. L’“Homo Furlanus”, insome, in dute la sô sclete fisiologjie, neurologjie, psicologjie e chê altris “-gjiis” che o volês zontâ, pûr di imparâ a capî chel grant misteri che o sin pal Mont. Un libri che nus spieghi infin cualis che a son lis nestris inclinazions, lis lidrîs dal nestri mût di fâ e di pensâ, che in gjenar al ven pandût tant che ruspiôs e solitari, barbaric e salvadi, fuart bevidôr di vins e di sgnapis, e soredut grant blestemadôr di ogni diu e sant, cence sparagnà ni il diaul ni la Madone, tant par no fâ diferencis. Un individui che al passe plui timp sul puest di lavôr e in ostarie che no cjase, e se mai al ves di cjatâsi cu la famee, al è nome par coinvolzile intun lavôr di ristruturazion statiche de cantine, par meti sù lis “perlinis” ae tavernute o par dâ une man intal ort. Parcè che cussì nus piture la tradizion. Il pinsîr comun. Cjamese di fanele a cuadris, bregonats di vilût a cuestis, cjalcetons pençs ancje di Istât tignûts sù cu la tiracje e scarpons di mont. Mai cence barete ben fracade sul cerneli. Ve chi il Furlan che al sta su la bocje comune. E no dome di chei che nus cjalin difûr, ma ancje stant ae “vulgata” nostrane. Facil che nus vedin dit masse voltis che o sin fats cussì, che aromai o vin tacât a crodilu ancje noaltris, e si sin convints che e sedi propit cheste la veretât. Duncje o sin sotans, “salts, onescj e lavoradôrs”, int simpri pronte a svenâsi di sanc par judâ chei che a àn di bisugne, soldâts perfets di sacrificâ pes bandieris che no son la nestre, dal moment che o sin fats par ubidî cence discuti i ordins di un paron forest. Pôc studiats, che o preferìn doprâ lis mans che no il cerviel, int di sane ignorance duncje, destinade a vocazion pratiche plui che no teoriche. Muredôrs, contadins, operaris. Artesans! Sot dai voi di chei altris o sin un popul di confin, un miscliçot di todesc e di slâf, o adiriture une alterazion malade dal venit. Parfin la gjeografie fantastiche dal imagjinari talian (almancul chel medi e comun) nus plate intune topografie misteriose, simpri definide cuntun “plui inlà o plui incà”: di Vignesie, Viene, Lubiane. E ben za cussì o rivìn ancje a glotile. Piês cuant che i gjornâi e i gjornaliscj nus definissin tant che “entroterra tergestino”. E lu fasin tant dispès che ancje la politiche nostrane, simpri plui vuarbe e puare di intindiment, e somee che lu vedi cjapât tant che indicazion di principi! Al sarà intrigant alore, in chest percors che si scree cu cheste note, cirî di cjapâ sù, un par un, ducj i prejudizis che nus tocjin e provâ a smontâju dopo di vê cirût di capî di indulà che a vegnin fûr e parcè. Un pôc par amôr di Veretât, ma ancje par divertîsi e dâi di nâs a ducj chei che a crodin di cognossinus e invezit no. Se o ves di cirî la fonde di cheste tipologjie umane, o larès a sgarfâle fûr di che “rusticitas” che San Jaroni al ricognosseve ai nestris antenâts “Aquilegenses”, scrivint che la lôr filosofie di vite e jere peade ae tiere, che ur insegnave i ritmis lents de nature, cuntun grant amôr pe vite solitarie, separade dal Mont, cuasi “ana – coreutiche”, ven a stâi “fûr dal côr”. Tant che ancje i nestris cjants a jerin dal dut particolârs, maraveôs e diferents di chei canonics romans. O resti convint che Jaroni al ves la sô reson, ma cul timp il so discors al è stât stracapît. E je vere che o sin malinconics, e che la Nature e i boscs nus plasin: in chest o sin salvadis, peraule che ven fûr di “saltus”, e di “silva”, ven a stâi bosc, juste apont. Dut câs o sintì a fuart la bisugne di condividi i nestris sintiments, magari no propit cun ducj, ma cun chei che nus stan plui dongje sì: o respirìn la “spiritualitât” dal timp di fieste e lu celebrìn cu chê “ebrietas dionisiaca” dai antîcs pagans, che no je la cjoche sporcje, ma il gust di cirî une cundizion di ligrie cui pîts sot di une taule. Une boce di vin e une cjantose che si anime cu lis notis profondis dal ridi e dal vaî, a laressin metudis insiemi fra lis gramatichis di une vision mistiche de vite, e no ridusudis al bacan di une sagre. La grande tratatistiche scrite dai nestris Paris nus conte che i vons “aquilegenses” a cirivin il Spirt di Diu tes robis piçulis, che a sintivin plenis di chê sacralitât che e puarte la firme di un Creadôr inamorât dal just, dal bon e dal sempliç. Par chest no ur plasevin lis cerimoniis in “pompa magne”, la ricjece dai aparâts liturgjics, la sioretât dal rituâl. Al contrari si cjatavin tor dal “focus larium”, il fûc dai antenâts, là che il spirt de cjase si alimentave cul fûc: il fogolâr insome. Che in cheste dimension al piert il fals lusôr de retoriche tributade de tradizion e al devente plui che un simbul: pluitost un mût di jessi. Che al preferìs sielzi la intimitât, il piçul, la condivision: intal preâ, intal gustâ, intal scjaldâ, intal piâ il lusôr dentri dal cûr de prime e plui impuartante comunitât di vivents, ven a stâi la famee. La Storie nus à sculpide muse e sintiment: la fam, la miserie, lis vueris, la puaretât, lis invasions e lis migrancis no nus àn sparagnâts. E alore chê “rusticitas” che si diseve (e che o soi convint che e resti propit la prime fonde par rivâ a capî cemût che o sin fats e di consecuence utile par “demistificâ” i prejudizis ricamâts sui Furlans), o podaressin doprâle come une filigrane par identificâ il profîl de nestre int: al è un mût di jessi che al à a ce fa cui cjamps ben tignûts, cul profum de tiere, il gust pal savôr sempliç e sclet, il plasè di cjatâsi insiemi par “gustâ” ce che al è, contentantsi e gjoldint di ce che al reste cence mai vaî par ce che no si à. Il profum dal fen, l’odôr dal lat a pene molzût, il miracul dal most che al devente vin. Par dîle dute, la anime contadine che si volte intun stîl di vite essenziâl, bon di cognossi ae lidrîs la sô fuarce e ae memorie il veicul par pandile ancje a chei che no le àn compagne de nestre. E dut chest al devente paisaç, architeture, rituâl e mitologjie, blesteme e preiere, incjant e malinconie. Di Fevrâr a Dicembar, duncje, si darìn apontament par cirî di dâi cuintri a ducj chei che a restin ancjemò convints che noaltris o sin simpri chei che “crudeliter eruptuant ces fastu”! E che Diu ju strafulmini se ae fin no nus volaran ben par ce che o sin di simpri braurôs di jessi. Amen. ❚