CULTURE. La triple fortune di Palaçûl

I BINI_ Intal prin, l’autôr al fas la storie de sô famee, i Bini apont (e ancje di chê imparentade strete dai Fabbro), partint dal secul XV. Plui in daûr nol è pussibil di lâ ancje parcè che prime no esistevin i cognons. Anzit, stant che dome cul Concei di Trent, si scomençà a tignî une sorte di anagrafe, al è un grant risultât di sedi rivât fin a un par di secui prime.
Daspò di vênus contade cheste storie cun tant di arbui gjenealogjics, di detais, di anedots, l’autor al fâs une ricognizion di ce che a àn fat chescj Bini di lunc dai secui: intes istituzions (politichis, religjosis, militârs), intes siencis e arts (musiche, gjornalisin, ricercje storiche), intal sociâl (sindacalisin, sport, associazions). Par ultin al scrutine i lôr possidements, terens, cjasis, dotis, tests.
Naturalmentri il libri al è une vore siôr di fotografiis; ben 514 distribuidis su lis passe 350 pagjinis.
La plui part des informazions che si cjatin intal libri a son indreçadis in particolâr ai direts interessâts, valadì i Bini e i Fabbro di vuê. Ma l’interès dal libri al va ben al di là: cun di fat si pues leilu tant che un tratât di etimolgjie (Bini al ven dal non Bernardino e Fabbro dal non dal mistîr) e di onomastiche, un excursus storic suntun teritori e su ce maniere che il paîs al à vivût di rifles la grande storie, un aboç di storie dal costum e v.i. E no mancjin curiositâts: il dean che, unic in dut il Friûl, si opon al passaç di Palaçûl a la Serenissime Vignesie, o ben la femine che in plen ‘700 e faseve part di une assemblee di cjâfs di famee o ancje la zovine Bini che intal 1901 e servì di modele par une statue di femine che e va su in cîl.
E in plui si pues preseâ la ironie e ancje il spirt polemic dal autôr che no si fâs preâ se al è di dâ cualchi patafon a cui no i smeche (spie la p. 277, dulà che al conte di un frut che intune recite al fâs la part di Sindic e che al deventarà pardabon sindic, plui tart…)
PAL STELE_ Il libri dedicât al Stele al partìs di une prospetive globâl, naturalistiche e storiche. Al tache a fevelâ dai prins abitants che si logarin dilunc la aste dal flum, za in ete preistoriche. No par nuie e fo cjatade propi culì la famose “frute di Blancjade”, i plui antîcs rescj umans cjatâts inte nestre regjon.
Il libri al conte daspò dutis lis storiiis che si son davueltis tor dal Stele, di lunc dai secui: i puarts e la navigazion, lis imbarcazions, il zîr dal mont in barcje partît propi di culì, la pescje, i beveradôrs, i lavadôrs, i vâts, i traghets, i puints, lis diluvions, i tais e i rapars (une vore negatîf chel che al à bonificât lis palûds di Codroip par sestâ la stradalte a pro di Palme: intervent che al fo e al è ancjemò la origjin di tantis diluvions), il cantîr di Pressenins, i gjavadôrs, i reperts archeologjics e v.i. Par finî un cjapitul al memoree ducj chei puarins che a àn pierdude la vite ineâts intal flum.
Ancje culì une vore di fotografiis (236 su passe 250 pagjinis), une ironie sutile (spie p. 130 dulà che al fevele de intenzion de aministrazion di intitulâ un gnûf puint al pape)
e la obietivitât dal storic che al fâs justizie di peteçs, come chei che a disevin che
a saressin stâts i titins a fâ saltâ il puint ai 29 di Avril dal 1945 (no je vere) o come la tristerie sui operaris dai cantîrs di Monfalcon, pucefadie che, invezit, a son ancjemò daûr a inmalâsi e a murî pai efiets dal amiant.
LA GRANDE VUERE_ Il tierç libri al è organizât ator di une straordenarie testemoneance storiche. I prins doi cjapitui a incuadrin i aveniments de grande vuere ce maniere che le àn viodude e vivude la int di Palaçûl: lis premessis, i fats plui impuartants, i combatints e i muarts, lis conseguencis (prime fra dutis la teribile fiere spagnule).
Il plat fuart al è intal tierç cjapitul, che al ripuarte integralmentri il diari di Pieri Fabbro, un combatint di Palaçûl, che al fo presonîr in Polonie fra il 1916 e il 1918. Une vore interessant sevi dal pont di viste de esperience umane, sevi di chel linguistic, ancje par vie che il diari al à vudis dôs stesuris.
Il libri al seguite po cu la storie des comemoriazions dai monuments di Palaçûl. E culì e torne fûr la solite ironie: si à scuasi la impression che a Bini i vegni voie di ridi e che al fasi une cierte fature a tignîsi (une eliche cul bûs…).
A completin il lavor una cjapitul su la vuere intes letaris e lis arts locâls e une prionte sul grop dai alpins dal paîs.
Insumis: storie studiade cun rigôr e contade cun sgrimie. Chei di Palaçûl a son cumò obleâts a leiju, pagjine par pagjine, une biele vore! Bon di chel, jo no soi di Palaçûl…
Zuan Laurin Nardin