SPECIÂL. La Universitât dal popul furlan

“La uniche Universitât nassude par iniziative popolâr”: cheste la definizion plui doprade par contâ la nassite dal Ateneu di Udin che di fat lu àn volût in tancj, se si pense che in 125.000 a àn firmât par domandâlu. Ma chest al è dut câs il risultât di un procès lunc e di une bataie che e sameave cence fin. O vin di lâ indaûr di plui 40 agns par lei une vore insot cheste pagjine fassinante de storie furlane.
LA VOIE DAI FURLANS_ La nassite de Regjon Friûl Vignesie Julie e la sielte di Triest tant che cjâf lûc e veve fat restâ mâl in tancj che invezit a pensavin che Udin o Gurize a fossin miôr par rapresentâ chest teritori: Triest no jere rapresentative dal popul furlan. Al coventave alc che al podès riscatâ la dignitât furlane sicu la istituzion di une universitât a Udin. Di fat il numar di universitaris di cheste regjon al jere un dai plui bas di Italie, ma chei che a studiavin a scugnivin lâ a Padue o a Triest, cun grandis spesis. La Universitât in sumis e veve di jessi un imprest pe cressite economiche, sociâl e no un alc di autoreferenziâl.
Tal 1964 e ven domandade la istituzion di une facoltât di Medisine a Udin, stant che li al jere un dai ospedâi miôr de Italie, cun di plui che il ministri Gui al veve intenzion di inviâ une gnove facoltât tal nord est par slizerî chê di Padue. Triest no i sta e, scuasit di scuindon, tal 1965 e invie la sô facoltât di Medisine. Chest al scjadene une schirie di manifestazions di bande dai students furlans che protestin a miârs, tal Dicembar dal 1965, pes viis di Udin. In dut chest ancje la politiche e zuiave il sô rûl: tal Mai di chel stes an, il conseîr regjonâl Renato Bertoli al propon une mozion a pro de facoltât a Udin che però no à sucès par vie che chei che le vevin firmade si tirin indaûr.
LA NASSITE DAL CUF_ Determinante a chest pont, sul finî dal 1967, la nassite dal Consorzi universitari, cun chê di cjatâ struturis a Udin par judâ la creazion di sedis decentradis dal Ateneu triestin. Ta chest Consorzi a jentravin: il Comun e la Provincie di Udin, la Casse di Sparagn, la Cjamare di Cumierç. Il Consorzi al rive a vê pal 1968 la facoltât di Lenghis e leteraturis forestis a Udin, tant che sede distacade di Triest, cun 520 iscrits. Intant i inteletuâi a fasin sintî la lôr vôs sui gjornâi e ancje il Moviment Friûl, nassût tal 1966, al è protagonist te bataie. Dibatits, incuintris, assembleis publichis a pandin la volontât fuarte di rivâ al obietîf, e ancje il clericât furlan, cuntune mozion firmade di 529 predis e publicade su “Friuli sera” tal Dicembar dal 1967, al marche – jenfri altris robis – il dirit dai furlans di vê e di frecuentâ studis universitaris. La mobilitazion e je gjenerâl e e cjape dentri tantis categoriis de popolazion. I agns ‘70 a scomencin cuntun periodi muart: ce che al torne a inviâ il discors al è l’otigniment dai prins doi agns di Inzegnerie a Udin, e o sin tal 1972.
IL COMITÂT DI PETRACCO_ Ma il fat plui impuartant ta chel an e je la formazion, ai 10 di Fevrâr, dal Comitât pe universitât furlane di Tarcisio Petracco. Il professôr Petracco, che al insegnave grêc e latin tal Stellini di Udin, a cjâf di chest moviment al rive a vê la adesion di ordins professionâi e industriâi, dal clericât, dai sindacâts e di tancj citadins. Storiche e fondamentâl la racuelte di 125.000 firmis par une leç di iniziative popolâr, cjapadis sù suntune popolazion di 900.000 personis. La funzion e jere chê di lâ indenant a bati saldo su la idee di Universitât. Tal 1974 il Consei Regjonâl, che nol pues fâ fente di no viodi cheste mobilitazion, al riten fondamentâl la istituzion dal Ateneu di Udin, che al fos autonom ma cence jessi in concorince cun chel di Triest. Chestis però a samein dome promessis e cjacaris, e intant no si môf nuie!
FINALMENTRI LA LEÇ_ Ce che al à scjassât, no dome fisichementri, ma ancje idealmentri la situazion, al è stât il taramot dai 6 di Mai dal 1976, li che la int e à tornât a discuvierzi lis lidrîs cu la solidarietât ancje di tancj inteletuâi che no jerin furlans ma che si sintivin tâi. E propit cul art. 26 de Leç nazionâl pe ricostruzion, la n. 546 dai 8 di Avost dal 1977, e ven costituide la Universitât dal Friûl: imprest pe cressite dal teritori e che e fâs riferiment ancje ae lenghe furlane tant che element ae fonde. Ai 6 di Març dal 1978, cun decret dal president n. 102, e ven istituide la Universitât di Udin cu lis facoltâts di: Lenghis e Leteraturis forestis, Inzegnerie, Siencis matematichis, fisichis e naturâls, Agrarie, Letaris e filosofie cun cors di Lauree in Conservazion dai bens culturâi. Ai 11 di Jugn dal 1979 al ven fat bon il statût de gnove universitât e cussì si invie la storie dal Ateneu, disvilupât e cressût ta chescj agns dimostrantsi bon di sucès ancje a nivel internazionâl.
Elena Zanussi