ATUALITÂT – Pietro Fontanini: «Contile juste» ma no dome

Al è tornât a tacâ Contile Juste: ce novitâts su chest spazi di informazion pe edizion 2010?
La intenzion e je chê di valorizâ lis bielecis dal Friûl, no dome ambientâl, ma soredut di ideis: o fasarìn fevelâ plui int dal popul des lôr ideis. Chest an, par vie dai tais ai finanziaments, o scugnarìn fâ une pontade par setemane: la pontade e sarà in onde ogni sabide a lis 19.45 cun repliche la domedie a lis 22.30. Si podarà viodi la trasmission ancje sul sît de Provincie di Udin www.provincia.udine.it.
Un coment sul 3 di Avrîl 2010 a Lucinîs?
O vin vût un bon segnâl cun rapresentants sedi dal centridrete, sedi dal centriçampe. Une biele novitât e je stade la presince di Enrico Gherghetta, president de Provincie di Gurize che no lu veve mai fat prime e al veve dit plui voltis che mai al sarà stât: chest an al à partecipât preseant la Fieste e confermant che al tornarà ancje pal avignî.
T9, a ce pont sino?
O sin inmò in vie di sperimentazion parcè che o vin di perfezionâlu e par chest o investarìn ancjemò cualchi risorse. Ma chest no mi preocupe parcè che su lis ativitâts a pro de lenghe furlane si metin simpri masse pôcs bêçs. O vin previodude ancje une campagne promozionâl pal ûs di chest imprest.
Ce riscuintri vêso vude in cheste fase?
O pues dî che di Novembar dal 2009 a metât di Avrîl di chest an, nus risulte che a son stâts fats plui di 500 downloads dal software. O vin ancje fate une verifiche a campion e di chest totâl nus è risulte cirche il 15%-20% al è stât duplicât, ven a dî al pues jessi che il stes utent lu vedi fat 2 o plui voltis. Ma ancje scorporant cheste percentuâl si reste simpri sul ordin di passe 400 personis che lu àn discjamât fint a metât di Avrîl 2010 e la domande e continue.
Si isal fat indevant cualchi produtôr di telefons?
Pal moment no, ma o vin intenzion di contatâju noaltris par fâur cognossi il software, in maniere che al podedi jessi inserît za tai celulârs prime che a sedin metût in vendite e cussì vê ancje la lenghe furlane dongje di chês altris che za a son presintis tai telefons.

Sul web la Provincie e à screât un gnûf sît plurilengâl sui museus (http://musei.provincia.udine.it): ce riscuintris aial vût?
Positîfs e o aprofiti par complimentâmi e ringraziâ la Redazion web de Provincie di Udin. La iniziative, volude a fuart de assessore ae culture Elena Lizzi, e fâs cognossi cheste rêt museâl une vore siore, fasint scuvierzi al utent no dome i sîts za famôs, ma puartantlu a viodi dute chês realtâts che a testemonein une grande vivarositât dal nestri teritori. Cumò l’assessôr al turisim Franco Mattiussi al varà il compit di coivolzi i albiergatôrs par colegâlu a la rêt turistiche e fâ sisteme.
Ce disino i albiergatôrs a proposit dal ûs de lenghe furlane?
Dal sigûr al covente sburtâ te sensibilizazion ancje par cheste categorie, in maniere che a sedin propit lôr i prins a cjapâ cussience che la lenghe furlane e je un valôr di spindi pe valorizazion e pe promozion di chest teritori, che al è unic par dut il patrimoni che al à.
Su la riviste “Ladins dal Friûl” di Avrîl 2010 al è stât publicât un editoriâl critic cu la Maiorance regjonâl: cemût comential il segretari de Leghe Nord?
La Leghe Nord no à nuie di rimproverâsi ancje parcè che e à votât la L.R 29/2007 cu la maiorance di prime. O vuei ricuardâ ancje che il ricors cuintri di chê leç al è partît par iniziative dal guvier Prodi di centriçampe e la Cort Costituzionâl e à fat une sentence che le àn un pôc ridimensionade. Ma e reste une leç ancjemò buine e noaltris o vin dit plui voltis al assessôr regjonâl Molinaro di dâsi di fâ par aplicâle, ma il probleme al è chi, parcè che al somee che nol sinti di chê bande. O zonti ancje che la Leghe Nord e à dimostrât atenzion a la cuistion linguistiche ancje cui siei mieçs: su la Padania a vegnin publicadis pagjinis par furlan e la emitente Telepadania une volte par mês e fâs une trasmission in lenghe furlane. Duncje no vin pôre di dimostrâ ce che la Leghe Nord e sta fasint a pro dal furlan.
Ca di pôc e sarà une riunion di maiorance regjonâl: ce fasaraial a chest proposit?
O domandarai di potenziâ la struture de Agjenzie regjonâl pe lenghe furlane, furnintle di une struture stabil e garantint che i vegnin dadis lis risorsis finanziariis che a son stadis taiadis. Parcè che la Arlef e je une agjenzie de Regjon, che e à di crodi par prime ta chest ent. Po dopo, su dute la cuistion cul assessôr Molinaro, jo o stoi pierdint la pazience…
Rapuart Friûl – Triest?
Come che al sucêt in Emilie-Romagne, li la Leghe Nord e à doi segretaris nazionâi e lis segratariis a son separadis. Ancje chi in regjon o vevin fat cheste sielte che o condivît: po dopo a Triest il partît al veve vude cualchi dificoltât e o vin unificadis lis segretariis, ma o pensi che si varès di recuperâ chel model tornant a dividi. Po a nivel istituzionâl o stoi sburtant pe citât metropolitane di Triest par dâ une autonomie plene a chê aree e duncje di chê altre bande creâ une realtât istituzionâl ben definide pal Friûl.
Tornant a la TV: pal furlan in Rai saraie la volte buine?
O sin a pene stâts a Rome pe tierce volte pal contrat di servizi e vê come pal sloven, trasmissions in Rai ancje par furlan. O vin cjatade atenzion di bande de Comission di vigjilance.
Ce disial a proposit de leç 482/99 e parcè il centralisim al met spes dacuardi sedi di une bande sedi di chê altre?
Chest an a son cressûts i fonts pe leç di tutele, ma e je ancje vere che spes i politics locâi no son masse atents a proposit de lenghe furlane parcè che le considerin inferiôr, rispiet a ce che e pues jessi la opinion che a àn pe lenghe slovene, che e somee vê plui poie. E o speri che ancje cualchi furlan, ancje a proposit de polemiche dai triestins sul «Friulano, tipicamente friulano» a alcedin un pôc il cjâf.
Parcè isal cheste situazion difarente cuant che si fevele di Triest o si fevele dal Friûl?
Cheste e je la sotanance dai furlans che si à di superâle. Noaltris furlans no vin di vê pôre di domandâ i nestris dirits e no vin di dismenteâsi che o sin la maiorance di cheste regjon.
E su Sapade? Dopo des elezions Zaia al à sfredât l’entusiasim di un eventuâl passaç in Friûl… a ce pont sino?
O ai in program un incuintri cun lui par spiegâi la particolaritât di Sapade che no je sburtade di pretescj economics o di privileçs, ma di ragjons storichis ben inlidrisadis come che al à confermât il 90% dai sapadins che a àn votât il referendum. O sin pe autodeterminazion dai popui e o sin contents che 11 comuns a vedin vude la pussibilitât di passâ des Marchis a la Emilie-Romagne: no capìs parcè che la stesse pussibilitât no podedi jessi dade ancje al comun di Sapade di passâ in provincie di Udin.
Celebrazions dai 150 agns di Italie: lui ce pensial?
Le viôt une robe cun tante retoriche. Chest paîs al à gambiâ sisteme: il federalisim al funzione come che o viodìn in Gjermanie e in Austrie. Se ricuardâ la unitât di Italie al vûl dî mantignî il centralisim, o vin sbaliât dut.
Christian Romanini