LA INTERVISTE. Il Friûl a Milan

«La mê parone di cjase e crodeve che Sant Denêl al fos un non di fantasie: e crodeve che il persut al fos fat in Emilie». «No rivi a fami clamâ cul gno non, o dîs David e ducj mi disin Davide». E je la dure vite di un furlan a Milan, contade dai tancj che par studi o par lavôr si cjatin a cirî in maniere disperade «un puest par mangjâ il frico» in tiere meneghine. A son cuasi 400 i iscrits al grup «Friulano a Milano» sul social network Facebook. Un spazi virtuâl di Patrie par scambiâsi coments in marilenghe e par fâ, come che si dîs, «community». Al è cui che al organize «une biele curve nord di biris par ducj i furlans a Milan che a tifin Udin» o ancje dome un aperitîf o une cene tra furlans.
MANGJÂ FURLAN_ Il rendez-vous enogastronomic al è un classic pai espatriâts: al Sauris &  Borc da Bria, furniment di len di une tipiche ostarie cjargnele, si puedin cerçâ i otims salums che a à fat la fortune dal paisut de Alte Cjargne, fumâts ancjemò vuê sot il fumulâr cul len di faiâr. Li de tratorie Mandi, no si à fâ di mancul dai gustôs cjarsons e di une specialitât, la sgnape di alaç fate in cjase, par finî cuntun dopocene di autôr: ghitare in man, il titolâr al intone vecjis cjançons di Georges Brassens voltadis par furlan. E, a pene fûr des puartis de citât, une antighe presince di Friûl: la tratorie La friulana di Caponago di plui di vincj agns e  disforne specialitâts di bacalà.
I FOGOLÂRS_ Pes grandis fiestis gjoldosis, si distinc il Fogolâr Sot la Nape di Limbiate: la Vierte e la Frascje a son apontaments aromai insaldâts. E se i zovins si sa che a mancjin al apel, a Bollate il  president dal Fogolâr – che al à 37 agns –  al zonte ai plui classics incuintris di balis o di «scopone scientifico», proiezions e karaoke par svicinâ ancje i coetanis al nestri Friûl.
Ma se no l’om nol vîf dome di pan (e di vin), di plui di 60 agns il Fogolâr Furlan di Milan, tra i plui antîcs e atîfs dal Nord Italie, al è un riferiment pe tutele de lenghe e de culture de int furlane, vâl a dî cuasi 40mil di lôr tra Milan e l’hinterland*. Une vore lis ativitâts organizadis te citât, e fra chês la «Setemane de culture furlane» e i «Incuintris di primevere». E une volte ad an, la magjie dai cjants e des liturgjiis in marilenghe a risunin inte messe  solene di Nadâl in Domo. In vie Ampère 35, la metropoli e lasse spazi a un cjanton crei di Friûl: il Fogolâr al è viert ogni joibe pai cors di lenghe patrocinâts de Societât Filologjiche Furlane. Tante gramatiche ma no dome, des leturis di Padre Turoldo ai grancj poetis furlans, passant pes contis dal Friûl che al jere: chescj incuintris tra lis parêts di une stanze sclete a son bagais di memorie e di culture regjonâl pardabon preziôs. Che ur ven daûr daspò  l’infalibil ghiringhel, altri che «happy hour»: pan, formadi, salam e un bon got di Merlot!
* dâts de Universitât Cattolica di Milan
(Natascia Gargano)