ATUALITÂT. La braure di jessi furlan

La sô famee e à une tradizion di cuatri gjenerazions te produzion di modons (tai ultins agns il grup si è slargjât ancje cuntun un stabiliment che al espuarte vâs di zardin in Cine e Americhe). Giuseppe Morandini, classe 1959, laureât in gjeologje, fint a cualchi mês indaûr vicepresident di Confindustria, dulà che sot de presidence Montezemolo al rapresentave la piçule imprese, al è passât di pôc a la vuide de CassarisparmioFVG (la ex Crup, Casse di Sparagn di Udin e Pordenon).
Ma cuant che i vin domandât un definizion di se stes par presentâsi, la prime robe che al à dit e je stade clare «Prin di dut o soi un furlan, braurôs di jessi furlan, cu la furtune di vê fat esperiencis che mi àn dade une vision internazionâl e di imagjinâ cuale colocazion che e podarès vê une tiere tant impuartante come il Friûl».

Ven a stâi?
La nestre regjon e je il cûr de Europe. Il cumierç, il disvilup a cjalin de bande diestre di Italie: dal Friûl in là… e ancje lontan! O podaressin jessi chei che a gjestiran i spostaments di personis e di prodots di dut il mont: une posizion strategjiche che o vin di sfrutâ.
Ce gambial par lui cun cheste gnove incarghe?
Personalmentri nuie: o jeri e o resti un om libar, usât a cjapâmi lis mês responsabilitâts… se mi capite, come a ducj, o preferìs sbaliâ bessôl cence che nissun mi judi a sbaliâ. Mi plâs sintî e confrontâmi cu la int, ma decidi bessôl.
Ce distance ise tra imprese e bancje?
Ta chest moment di crisi nol à di jessi nissun confin tra chestis realtâts. Dome a fevelin la stesse lenghe, che o clami «industrialês», si pues capîsi e cjatâ insieme la strade par saltâ fûr de crisi.
Ce isal par lui il «leam cul teritori»?
Un concet impegnatîf: un che al fevele di «leam cul teritori» al à di mostrâ la muse, no scjampâ. La nestre bancje e à di metisi cun umanitât al servizi de int che cuant che e ven tai nestris sportei e à di cjatâ 2 robis: bon acet e pussibilmentri une soluzion par risolvi i siei problemis.
Prime si clamave “Casse di Sparagn di Udin e Pordenon” cumò «CassarisparmioFVG»: no ise un tic in contradizion cul concet di leam cul teritori furlan?
O vin di resonâ intune prospetive regjonâl. Tantis prospetivis a son gambiadis e cuant che in bancje si fevele di «marcjât di cjase» come minim o fâs riferiment a dute Europe, intune competizion mondiâl. Duncje al è just tignî lis lidrîs, ma ta chest contest si à di vê prospetivis plui slargjadis: cun nostalgjie mi visi che 30 agns indaûr si diseve «fasìn di bessôi». Vuê o scugnìn fâ ancje cun chei altris.
Dopraiso il furlan in bancje?
Jo simpri! Cuant che o pues sedi cui colaboradôrs sedi cui clients. E si dopre il furlan par fevelâ ancje «l’industrialês». La lenghe furlane e jude une vore ta chest moment che il client al à bisugne di sintî la bancje dongje. E chest al è il plui grant servizi che o podìn fâ cumò. Fevelâ par furlan cu la nestre int o pensi che e sedi la miôr maniere par fâsi sintî dongje.

I problemis de Grecie a tornin a puartâ in prin plan aspiets dramatics de crisi mondiâl che il mont mussulman però, midiant dai bond islamics clamâts «sukuk», al à tignût bot miôr par vie dai principis che a improibissin la finance virtuâl (viôt La Patrie dal Friûl – Novembar 2008 «La bancje islamiche… no sbancje», ndr). Il sisteme bancjari furlan aial o podaressial vê chei valôrs par salvâsi?
Chest al è un argoment che nol tocje dome noaltris. Il sisteme mondiâl al à colassât parcè che si à permetût a bancjis internazionâls di riscjâ, realizant masse operazions virtuâls. A coventin gnovis regulis siguris come cui bonds islamics: si à di impedî a lis bancjis finanziariis di fâ speculazions come che al è sucedût e si à invezit di privilegjâ la operativitât des bancjis comerciâls, come la nestre, che a metin a disposizion lis risorsis a la famee che e à di fâsi cjase o al imprenditôr che al à di investî te sô ativitât.
Ce pensial su la cuistion Multiutility?
E à di jessi funzionâls al servizi par garantî al citadin il miôr servizi al miôr cost: se al covente «deventâ grancj» si à di fâlu, se al è miôr «restâ piçui», si restarà piçui. Ma ocjo: ator pal mont i gambiaments a corin a une velocitât che nissun si imagjine. No volarès un doman cjatâmi cuntune Multiutility masse piçule che no rive a tignî bot a une concorince che ti pues nassi di vuê a doman e che cun dimensions plui grandis e rive a garantîti un servizi miôr.
Ancje Lui al è stât emigrant, la lenghe furlane no podaressie deventâ la «lenghe francje» dai rapuarts jenfri i furlans ator pal mont?
Cheste rêt e je un patrimoni inestimabil che al pues rindi une vore tai rapuarts tra lis comunitâts furlanis e no dome, propit parcè che tancj furlans a àn vuadagnade tante credibilitât tai Stâts dulà che a son emigrâts. E a puedin fâ une vore par judâ a «vierzi lis puartis» par cui che al à voie di lâ ta chei paîs li. Duncje la lenghe furlane e va benon par svilupâ i rapuarts tra furlans di chi e furlans ator pal mont.
Secont Lui si aial fat avonde pai rapuarts cui emigrants?
Si à fat tant ma come par dut si pues simpri fâ miôr. Cun cheste crisi il mont al è deventât plui piçul e duncje ducj i sistemis par cjatâ gnovis oportunitâts a àn di jessi doprâts: noaltris o vin chest vantaç dai furlans pal mont e o vin di pontâ ancje su cheste rêt.
I zovins impreditôrs cemût sintino il leam des lidrîs furlanis?
Lu ai za dit che o ai tant a cûr lis mês lidrîs. Forsit lis gnovis gjenerazions no àn la stesse sensibilitât, ma ur auguri, come che mi è sucedût a mi, di zirâ il mont e cjapâ cussience de impuartance dal patrimoni che al ven de nestre identitât furlane.
Cognossial il nestri gjornâl «La Patrie dal Friûl»?
Sì, ancje se stant fûr dal Friûl massime tai ultins agns, no vevi viodût tancj numars. Ma cuant che o tornavi e mi capitave di vêle pes mans, le gjoldevi cun tant plasê sedi pe cualitât sedi pes emozions che mi deve.
Parcè il capitalisim furlan no aial mai vude une muse autonomiste?
Agns indaûr si veve cirût di meti adun lis tantis piçulis bancjis popolârs par une grande bancje furlane, ma cence furtune… chest mi sugjerìs che o vin di imparâ a fâ scuadre, ma no dome a peraulis: si à di dâ risultâts concrets e cumò o dimostrìn ancjemò masse debolecis cuant che si à di lavorâ insiemit.
I furlans a àn dât tant ai industriâi e chest al è ancje il risultât di valôrs e culture furlanis. I industriâi àno tornât alc di chest patrimoni? A nô nus pâr di viodi posizions debulis su la lenghe, su la unitât dal Friûl…
I impreditôrs furlans ancje grazie a la tante brave int che e à lavorât tes nestris impresis a àn dât tant a la nestre regjon dal pont di viste economic e finanziari. Su la cuistion culturâl ma ancje su la unitât dal Friûl o viôt cualchi volte masse provincialisim e chest nol jude a metisi adun par deventâ fuarts.
Sul furlan a scuele ce pensial?
In dî di vuê no podìn trascurâ lis lenghis che nus coventin par relazionâsi cul mont, l’inglês prin di dut. Ma guai a pierdi la lenghe furlane, che jo o ai imparât in cjase e continuarai a fevelâlu par dute la vite. E mi auguri che lis fameis a continuedin a puartâ indevant cheste ricjece. Ma se chest nol ves di bastâ plui, e mi displasarès une vore, e la scuele e devente la uniche maniere par insegnâ il furlan a lis gnovis gjenerazions, si à di insegnâ a scuele ancje la lenghe furlane.
Cuale ise la funzion de Universitât dal Friûl?
Mai come cumò e à funzion insostituibil. Intun contest gjenerâl o pensi che Universitât, Imprese e Bancje a puedin puartâ chel contribût indispensabil a dut il sisteme regjonâl e o ai grande fiducie che la Politiche e podarà vê une vore di zovament se chescj trê ents a rivaran a metisi adun par cjatâ fûr ideis e prospetivis gnovis.
Christian Romanini