CURTIS E CHE SI TOCJIN. Pôcs RAIs di lûs

Cu la Rai par furlan si fasin doi pas indenant, si pense di scomençâ a cori e invezit si fermisi. Po dopo, cheste benedete Rai tu le pochis e je e torne dome a fâ doi pas come prime. Nol è che noaltris o voledin che e ledi come un fulmin. In Italie al sarès propit sperâ masse… Ma, in sumis, al è un nestri dirit, stabilît de leç nazionâl 482 e des Convenzions europeanis, che ogni dì pe radio e pe television di Stât de nestre regjon a sedin burîts fûr notiziaris e programs culturâi te nestre lenghe. O sin in Italie, ma ancje in Friûl!
Ciert, dal mês di Avrîl in ca, par vie des pressions unitariis dal Comitât pe autonomie dal Friûl, de Glesie di chenti, de Universitât furlane, dal Comitât pe difese de leç 482 e dal Comun di Udin (cu la zonte finâl dal assessôr regjonâl Antonaz), o sin rivâts a otignî dal ministri pro tempore Gentiloni e de Rai di Rome, che la Rai in Friûl e metès adun un progjet pilote cun 20 minûts di coments par furlan sui fats di chenti. Dal sigûr al è stât un risultât storic sintî, dilunc sîs mês par cinc zornadis ae setemane, trasmissions regolârs in lenghe furlane. Ancje jo, che come tancj altris mi soi batût par che la Rai, la radio dal Stât talian, e feveli e e valorizi achì la lenghe dal nestri popul, o ai vût moments di ingropament e di sodisfazion .
Ma chel progjet pilote al jere dome un segnâl, dal sigûr positîf, ma piçul e debil rispiet aes nestris domandis presentadis a Rome. Là vie no vevin domandât di meti al bant il talian ma che, par rispietâ i dirits e la dignitât dal popul furlan, a fossin mandadis in onde par radio e par television  gnovis ancje par furlan, daspò di chês par talian. E che a fossin programadis in continuitât ancje trasmissions di caratar culturâl. Ma par sîs mês o vin scugnût contentâsi di ben pôc, ancje se chel pôc al à dimostrât a ducj che il furlan al è un lengaç che al pues tratâ cantins di ogni sorte e in ogni lûc, e no dome in famee o fra amîs.
Putrop la scjadince di sîs mês (Avrîl – Otubar ) dal progjet pilote e je rivade insiemit al cambi di dirigjence nazionâl, regjonâl e de stesse Rai di Rome. In cheste situazion, si pues parfin dî che o sin stâts brâfs a otignî (simpri in gracie de nestre unitât) che il gnûf assessôr regjonâl Molinaro al trati cu la Rai di Triest e di Rome pal sprolungjament dal progjet pilote par une altre dade di timp. Che e varès di jessi avonde par ricevi di Rome la convenzion che e à di rindi stabilis e organichis lis trasmissions in lenghe furlane, sei par radio che par television. Cussì si è impegnât cun nô l’assessôr Molinaro, ma ancje il President Tondo.
E inalore, curtis e che si tocjin: i furlans a domandin la Rai par furlan in Friûl no dome par rispiet de leç 482 ma ancje in fuarce des cincuante mil firmis, cjapadis sù de Vite Catoliche agns fa. Politics furlans di drete e di çampe, se o volês jessi de bande de int, niçaitsi ben e niçaitsi ae svelte!
ARNALT BARACÊT