LA INTERVISTE. Di «Uosjinton» a Verone, une vite sui cjamps di balon

No cjaparan i bêçs che a cjapin Di Natale o Messi, no si viodaran tes reclams par television come Totti o Cristiano Ronaldo ma lis feminis dal balon a son fuartis e vincentis propit come i oms. In Italie il balon feminin purtrop nol è considerât tant che sport professionistic ma dome diletantistic, e lis feminis che a zuin in dut il Paîs a son dome 19.000 (a pet par esempli dal milion di zuiadoris dai Stâts Unîts, dulà che chest sport inte version feminine al è invezit considerât tant che sport nazionâl). E chi in Friûl, cemût ise la situazion? O vin cjacarât un pôc cun Alessia Tuttino, zuiadore afermade e apassionade che cun costance e volontât e je rivade intai massim nivei di chest sport.
Alessia e je nassude e cressude a Vissandon (che tancj a cognossin tant che «Uosjinton»), in comun di Basilian, intune famee che, nus dîs dute braurose, «e fevele dome furlan». La sô passion pal balon si la visin ben i soi paisans, cuant che za di frutine la viodevin a cori cul balon tai pîts sul cjamput dal paîs; a 7 agns e tacà a zuiâ inte scuadre (masculine, nancje dîlu) dal «Sette Spighe» di Basilian e e restà li fint ai 14. E jentrà intune scuadre feminine cul «Tenelo Club» di Rivignan, dulà che e zuià i campionâts di serie C e serie B. Intal 2000, a 18 agns, e lè a zuiâ fûr regjon, jentrant tal club «Foroni Verona» e restant un an, po dopo e passà intal «Bardolino Verona», scuadre di serie A dulà che e zuie inmò in dì di vuê.
Sul balon feminin Alessia nus dîs che «nol è nancje di paragonâ cun chel masculin, sedi a nivel di imagjine, sedi a nivel economic». Di fat, ancje lis scuadris, come apont il «Bardolino Verona», che a zuin a chescj nivei e che a rivin ancje in Champions League a restin simpri peâts al diletantisim. Cumò in Italie a zuin 12 scuadris (che cul prossim campionât a deventaran 14) e in Friûl o ‘nt vin 2, il «Graphistudio Tavagnacco» e il «Calcio Chiasiellis», dulà che chest an la stesse Alessia e à zuiât par une piçule parentesi prime di rientrâ al «Bardolino Verona».
«Purtrop a son pôcs chei che a invistissin in chest sport parcè che a mancje la difusion di cheste dissipline a nivel popolâr» e dîs la Tuttino, che però e sugjerìs ancje «al sarès ben impuartant che lis grandis scuadris masculinis, come par esempli l’Udin, a creassin la sezion feminine par dâ la oportunitât ancje a lis feminis di dedicâsi a chest sport e dantjur ancje la pussibilitât di vê dut il sostegn, no dome economic ma ancje sanitari». Par Alessia al sarès impuartant che ancje lis scuelis a fasessin la lôr part in cheste direzion.
Ma une note positive, almancul par chel che al rivuarde il Friûl, e je: il public di chenti al è, propit come che nus à dit Alessia, il plui numerôs e afezionât di dut il campionât di serie A, confermant la passion cence prejudizis de nestre int pal sport di ogni gjenar.
(Venusia Dominici)