I CLASSICS. 10 – CUINTRISTORIE DAL FRIÛL La albe de nestre Patrie

La dominazion di Vignesie
Par vie de lontanance  dal patriarcje e par vie de stesse nature dal ordenament feudâl de nestre Regjon, la ocupazion dal Friûl par opare di Vignesie e vignì stabilide midiant di tratativis particolârs cun ognidun dai cjistielans e ognidune des Comunitâts, cence nissune cunvigne e nissun ricognossiment de bande dal princip patriarcje. Ma rivant chenti, la republiche di Vignesie e meteve lis mans suntune Regjon dal dut diferente, par ordenaments politics e aministratîfs, par cundizions, tradizions e mentalitât, par composizion etniche e par lenghe: il Friûl nol veve nissune semeance cu lis istituzions di caratar comunâl e oligarchic de Republiche, ni cul so mût di vivi, ni cu la sô culture. La costituzion dal patriarcjât e jere sù par jù chê dai principâts gleseastics de Gjermanie; il grât di dipendence des vilis, des comunitâts, des gastaldiis, dai cjistielans ministeriâi e di chei libars, denant dal patriarcje, al jere pardut diferent e stabilît par mieç di investiduris o di statûts o di costumancis speciâls par ogni câs.
No ‘ndi voleve tropis a capî ce savoltament che al sarès nassût in dute la vite dal Friûl, se Vignesie e ves volût conformâ l’ordenament de Regjon cul so ordenament o cun chel di chei altris siei dominis di tiere ferme. Cussì la Serenissime no si riscjà a butâ dut par aiar, salacor par pôre che un tâl at di fuarce i fasès deventâ plui intrigade la conservazion de sô concuiste: une grande solevazion dai Furlans, judâts dal imperadôr e jere simpri pussibil. E pensà duncje di rivâ a la unificazion aministrative un pôc a la volte, par grâts. E par intant e lassà in pîts l’ordenament feudâl dal Friûl. Ma par fâ chest tant – cun dute chê sostanziâl diference dal so guvier e fo obleade a costituî la Regjon in entitât autonome, stabilint chei che a vevin di jessi i siei rapuarts cui cjistielans e lis Comunitâts che a mantignivin lis lôr jurisdizions, e no cu la popolazion che no veve nissune figure juridiche. In cheste maniere la nobiltât e conservave la sô preminence tal Parlament e chest al deventave un istitût esecutîf dal gnûf guvier: istitût pôc sigûr e pôc disponût a ubidî, parcè che al jere formât cun elements di çocje todescje, di tradizions imperiâls, di mentalitât contrarie al spirt dal gnûf guvier e simpri tacade a la idee da la indipendence che il Friûl al veve pierdude. Vignesie no si infidave di chest so “organo” e, no olsant sdrumâlu, e cirì prin di imberdeâlu intun grum di gjambadoriis burocratichis, complicant a pueste la procedure des investiduris, gjavant des sôs mans lis plui impuartantis funzions judiziariis, lassant cjarte blancje aes prepotencis dai Lutignints, favorint la formazion di une altre nobiltât che e vignive fûr di Vignesie. E plui tart, co la miserie de int di campagne e fasè nassi il pinsîr e la pussibilitât di creâ une altre istituzion che e ves intindiments e interès contraris a chei de nobiltât, il guvier di Vignesie no se lassà scjampâ e al metè in pîts chê cjosse curiose che e fo la “Contadinance”. Cussì il Parlament nol rapresentà plui il popul furlan, ma dome une minorance priviliegjade e cjalade di neri. Ma di cheste Contadinance o vin tal cjâf di fevelâ une altre volte.
Intant Vignesie, vie pe sierade dal 1420, e proclamà discjadude la sovranitât temporâl dal patriarcje e si risiervà dutis lis funzions relativis.
A rapresentâ la gnove parone al fo mandât a Udin un “Lutignint Gjenerâl pe Patrie dal Friûl” cun autoritât sù par jù compagne di chê dai Proveditôrs di tiere ferme, ma cence mai determinâ publichementri fin dulà che e podeve rivâ cheste autoritât: cussì il Lutignint al restave in pratiche libar di fâ ce che al voleve. Ancje la aministrazion de justizie e vignive cjolte al Parlament e metude tes mans dal Lutignint o dai Tribunâi di Vignesie. Al ven a jessi che il Friûl, intal prin, al podè lusingâsi di vê dome mudât paron: ma cul timp a lâ, al si visà ancje di vê gambiade vite e cjapade une altre strade: chê di cjapâ botis e bussâ la man di chel che lis mole.
Vignesie e i Patriarcjis
La ocupazion dal Friûl par man di Vignesie e scugnive fâ nassi fuartis reazions: il stât patriarcjâl al jere, almancul juridichementri, une part dal imperi e un principât feudâl in man de glesie: e Vignesie, republiche indipendent, lu veve usurpât. Ma l’imperadôr Sigjismont al veve il so ce fâ par vie di berdeis ancjemò plui grues e la sô oposizion cuintri Vignesie no fo ni pronte ni ghiarde, e no puartà nissun risultât positîf. La curie romane invezit subit dopo sistemade la cuestion dal sisme di ocident, si fasè sintî: za tal Setembar dal 1420 il pape Martin V al mandà une imbassade a Vignesie, domandant che il Friûl al vignìs tornât al patriarcje; nol rigjavà nuie.
Chel an dopo al scrivè une letare tornant a bati chel cantin: Vignesie e rispuindè che e veve lis sôs resons par no contentâlu, che al plui e varès lassât al patriarcje il guvier temporâl di S. Vît e di S. Denêl e i varès passât, come indenitât, trê mil ducâts ad an.
Intant il patriarcje Luduì di Teck si mostrave contrari a cualunche intese e al cirive di fâsi judâ dal imperadôr a tornâ paron dal Friûl: si capìs che intant al seguitave a governâ chê part dal patriarcjât di là des monts, fintremai su la Drau, che no jere stade cjapade. Dôs voltis (1422 – 1431) al comparì in Friûl cun cualchi miâr di mercenaris ongjarês, cjapant Manzan, Rosacis, Scluse e rivant fin sot Udin. Ma i mercenaris di Tadiu di Este e dal cont di Carmagnole lu pararin indaûr. A forin fatis un grum di crudeltâts di une bande e di chê altre; e i Furlans che a vevin judât il patriarcje a forin ben cjastiâts.
Alore Luduì al presentà la cuestion al Concili di Basilee, che al mandà la scomuniche al guvier di Vignesie (1435). Il pape Eugjeni IV che nol viodeve di bon voli il Concili, al spesseà a smolâ une assoluzion. Pôc timp dopo al murì, a Basilee, il patriarcje Luduì, e il Concili al nomenà patriarcje Sandri di Marzovie, che al jere vescul di Trent. Il pape, par cont so, al nomenà invezit Luduì Trevisan che al jere di Vignesie: e cussì si capìs cemût che e veve di lâ a finî. Il Trevisan al spesseà a rinunziâ a ogni dirit temporâl sul Friûl sore une buine indenitât in ducâts e il mês di Jugn dal 1445 il marcjât al jere fat.
Ma Vignesie no jere, ancjemò no, contente: e veve tal so teritori doi patriarcjis – chel di Aquilee e chel di Grau – e il so vescul al jere sufragani di Grau! Cussì e navigà tant, cun Rome, che dal 1451 e rivà adore di puartâsi in cjase il patriarcjât di Grau che al deventà patriarcjât di Vignesie, lassant te basiliche di Elie un plevanut cualunche. E cutuardis agns plui tart e domandà la sopression dal patriarcjât di Aquilee e la istituzion di doi vescovâts, un a Udin e un a Cividât.
No vint podût otignî chel tant, Vignesie si contentà di fâ in maniere che il patriarcje al fos simpri un dai siei citadins. E culì al scomence un rosari di manovris di ogni fate, par no lassâsi scjampâ di man chel cadreghin. A forin un cuindis i patriarcjis vignûts dopo dal Trevisan, ducj jessûts des grandis fameis di Vignesie, ducj devotissims de Serenissime e pronts a fâ i siei interès. Nissun o dibot nissun al restà te sô residence, ma a lassarin il Friûl tes mans dai lôr vicjaris. Si passavin il patriarcjât di barbe in nevôt, nomenant cualchi nevôt coadiutôr cun dirit di sucession, par no lassâ jessi di famee la cariche, come se e fos stade in lôr possediment privât: cussì i Grimans, i Barbars, i Gradonics, i Dolfins. Si pues dî che nissune des nominis dai patriarcjis di Aquilee, fatis dopo il Concili di Trent, no fo fate secont lis prescrizions dal Concili: si pues sostignî, cul Dirit Canonic in man, che a forin dibot dutis ilegâls e invalidis, ancje se Rome e lassà cori par doi secui une cjosse cussì scandalose.
Si capìs che i imperadôrs a protestarin e si sfuarçarin di rompi cheste cjadene vergognose di usurpazions fatis tal interès de republiche e in barbe aes leçs dal Concili. La plui part dal teritori patriarcjâl e jere ancjemò sot da la Austrie, massime dopo dal tratat di Noyon (1516), comprendude la sede titolâr di Aquilee; invezit la plui part dai vescui sogjets a la autoritât metropolitiche dal patriarcje e jere di ca des monts. I imperadôrs a domandavin che, almancul une volte ogni tant, il patriarcje al fos un dai lôr paîs e no simpri un venezian. E viodint che midiant de diplomazie no rigjavavin mai nuie, a cirivin di sfuarçâ la man a Rome cul impedî ai patriarcjis di visitâ chê part de diocesi che e jere di là e ancje cul improibî ai predis todescs di ricognossi i patriarcjis e di ubidîur.
Nancje chest nol valè nuie: e l’unic risultât al fo chel di viodi une buine part dai fedêi cence pastôr, bandonâts al disordin morâl e ancje ae propagande protestante. Rome, pitost di fâ un displasê a Vignesie e lassà lâ, par secui a lunc, un grum di animis al lôr destin. E dopo e finì cul contentâ tant Vignesie che Viene a spesis dal Friûl: al ven a jessi cul abolî il patriarcjât di Aquilee, dividint il teritori in dôs diocesis, metint un arcivescul a Udin par chê part che e jere sot Vignesie e un a Gurize par chê che e partignive a la Austrie.
Cussì, juste cumò dusinte agns (1), il mês di Lui dal 1751, ancje chest ultin vanzum di grandece dal Friûl, chest ricuart di timps di splendôr e di indipendence al restave sacrificât par colpe de politiche e par opare di potencis forestis che a faserin i lôr interès su la piel dal furlan.
pre Josef Marchet e pre Checo Placerean