ATUALITÂT. I voi de Europe sui dirits linguistics e nazionâi dai furlans

Tra i 21 e i 24 di Jugn une delegazion dal Comitât consultîf dal Consei de Europe su la Convenzion cuadri pe protezion des minorancis nazionâls e je vignude in visite intal stât talian par cjapâ sù informazions sul rispiet dai dirits des diviersis comunitâts minorizadis. Cun di fat, ogni cinc agns, il Comitât consultîf al è clamât a preparâ un rapuart su lis iniziativis cjapadis intun stât par garantî il rispiet de Convenzion e sui problemis inmò di risolvi. La Convenzion e je l’unic tratât internazionâl su la tutele des minorancis sotscrit e ratificât dal stât talian e chel che il Comitât consultîf al metarà adun dentri di Otubar al sarà il tierç rapuart sul stât talian.
Compagn di ce che a vevin fat cinc agns indaûr, i delegâts dal Consei de Europe, prime di lâ a Rome par confrontâsi cui rapresentants dal guvier talian, a son vignûts in Friûl – Vignesie Julie, dulà che si son cjatâts cui rapresentants de Zonte e dal Consei regjonâl, de VI Comission consiliâr, des Provinciis di Udin, Gurize e Triest, e cun chei des organizazions di riferiment dai furlans, dai slovens e dai todescs.
I rapresentants des istituzions locâls a àn batût massime su lis misuris metudis in vore intai ultins agns a pro des lenghis minorizadis sei sul plan legjislatîf che su chel des azions svilupadis. Regjon e Provinciis a àn duncje cirût di ufrî un cuadri in positîf de lôr ativitât, ancje se no son mancjâts i riferiments a cualchi situazion negative. I à tocjât cussì aes organizazions des trê comunitâts minorizadis scoltadis di segnalâ i ponts critics.
Intant dai incuintris che si son tignûts in Friûl – Vignesie Julie, i membris de delegazion europeane a àn cjapât note cun atenzion dai problemis segnalâts e des critichis fatis indenant, ma a àn ancje marcât doi aspiets che a àn preseât, ven a dî la ativitât legjislative davuelte inta chescj agns (a tacâ des leçs regjonâls sul sloven e sul furlan) e la pussibilitât che a àn vût a Udin di confrontâsi intal stes moment cun rapresentants istituzionâi e des associazions. Simpri a Udin, la delegazion vuidade di Rainer Hofmann e à ancje cjatât a dâi il bon acet un trop di furlans cun bandieris e cuntun strisson che al segnalave la discriminazion patide dal popul furlan.
I slovens dal Friûl, dongje dai problemis condividûts cul rest de lôr comunitât, a àn segnalât in particolâr trê ponts critics, ven a dî la situazion malsigure che l’istitût bilengâl di S. Pieri al vîf sul plan edilizi, la impussibilitât di viodi i programs par sloven de RAI, e i tentatîfs di dineâ la stesse esistence di une comunitât di lenghe slovene in Friûl (massime in Val di Resie).
Par chel che al rivuarde invezit i todescs dal Friûl, i rapresentants de Valcjanâl a àn denunciât soredut i pericui che la cussì clamade riforme Gelmini e puarte pal lôr teritori là che si impon l’inglês tant che lenghe seconde, cence lassâur la pussibilitât di mantignî il todesc. Inmò plui ingredeade la situazion par Sauris e Tamau là che la presince di varietâts todescjis specifichis al domande struments didatics e professionalitâts di pueste.
Il Comitât 482, in rapresentance des associazions impegnadis pal furlan, al à presentât la situazion de tutele de lenghe furlane intal stât talian. Il cuadri che al è vignût fûr nol è masse biel. Cun di fat, la leç 482 e reste letare muarte par chel che al tocje la radiotelevision publiche (chel pôc che si fâs, di fat, al è dut paiât de Regjon), e va indenant une vore a planc intes aministrazions publichis e e cjate grues pidiments inte scuele là che, cundut de presince di cualchi biele esperience, la plui part dai istitûts scolastics no garantìs l’insegnament dal furlan. Sul front des risorsis economichis, dopo agns di tais, inte finanziarie statâl pal 2010 si à vût une inversion di tindince, ma si reste une vore lontans des cifris che a coventaressin par meti in vore pardabon la leç. Dut câs, se di Rome al rive cualchi franc in plui, la Regjon che e za à fat savê che e sbassarà i fonts pal furlan. Cun di plui, la aministrazion regjonâl no à ancjemò dât fûr i regolaments par meti in vore la gnove leç sul furlan che, duncje, di passe doi agns e reste dome su la cjarte.
CARLI PUP