TERITORIS – AUSTRIE. La plui grande aree alpine sot tutele

Il Parc Nazionâl dai Alts Taurs al è il plui grant parc inte Europe centrâl_ La storie dai parcs nazionâi e tache tal Votcent in Americhe dulà che tal 1872 al fo decidût di tutelâ l’ecosisteme di Yellowstone. Diviers agns dopo a vignerin impastanâts i prins parcs in Europe: in Svezie tal 1909, tal 1914 in Svuizare e tal 1922 in Italie.
Siben che la Austrie e sedi un paîs vert par definizion, si è scugnût spietâ a lunc par vê il prin parc nazionâl, nassût dome tal 1981 tal teritori dai Alts Taurs jenfri Salisburc, Carinzie e Tirôl. Il parc si slargje par 100 km di Soreli jevât viers Soreli a mont e par 40 chilometris da Nord a Sud, cuvierzint une aree di 1836 km². I grancj glaçârs dal parc a ocupin 130 km².
Vuê o vin adun siet parcs che a fasin part di progjet comun che si clame Nationalparks Austria.
Il finanziament dai parcs nazionâi al ven cuviert pal 50% dal guvier federâl e pal 50% dai Länder locâi. Tignint cont di ducj i parcs austriacs, ur ven ufiert un puest di vore a 300 personis.
Cuatri parcs pes areis montanis, trê pes aghis_ Dome i centris pai visitadôrs a regjistrin 400 mil presincis  par an, a conferme dal fat che chel leât ai parcs al è un setôr turistic di base. Cun 74 mil visitis di students e doi mil escursions vuidadis, la mission educative dai parcs e je cetant significative.
A son cuatri i parcs nazionâi che a tutelin areis montanis: chei dai Alts Taurs, Gesäuse tes Alps dal Ennstal in Stirie, Nockberge in Carinzie e Kalkalpen tes Prealps de Alte Austrie. Trê invezit a son i parcs che a viodin des aghis: il Lât di Neusiedl, Val di Thaya e Donauauen, vâl a dî il toc de Danau jenfri Viene e Presburc.
Il parc nazionâl dai Alts Taurs al è il plui grant parc de Europe centrâl. Chel dal Lât di Neusiedl e de Val Thayatal a son zonis transfrontalieris protezudis che si cjatin al confin cu la Cechie e cu la Ongjarie. Metintju ducj adun, i austriacs a àn cussì la plui grande aree verde tutelade des Alps.
Lis stradis alpinis spetacolârs_ Dongje dal Friûl si cjatin bielis stradis panoramichis: in Carinzie, pôc di là dal confin, o vin la Villacher Alpenstraße cuntun percors di 16 chilometris e mieç: e partìs di Villach-Möltschach (altece di 550 m) fin su la mont Dobratsch (1.732 m) cuntun panorame su lis Caravanchis e su lis Alps Juliis. Par concuistâ la piche (2.167 m) si scuen lâ indevant a pît. La opare e fo finide dome tal 1965 dopo adiriture 69 agns dal tacâ dai lavôrs par vie des discussions cuintri o a favôr dal progjet. La strade e je costade 23 milions di euros: fin al dì di vuê si regjistrin 5 milions e mieç di visitadôrs.
Nockalmstraße e la mont dai «Nockn» taronts_ Chê altre strade panoramiche carinziane si cjate a 70 chilometris di distance di Vilac: lungje 35 chilometris, e puarte a 2.049 metris di altece traviers dal parc nazionâl dai Nockberge.
L’aspiet inconfondibil dai «Nockn» taronts cuntune altece massime di 2.400 m al è une raritât gjeologjiche, te interie regjon alpine si trate di un paisaç esotic che al somee aes culinis verdis de Irlande.
75 agns pe Großglockner-Hochalpenstraße_ La plui spetacolâr e je la strade alpine che e mene da pît de plui alte montagne de Austrie, il Grossglockner (3.798 m), tal cûr dal parc nazionâl dai Alts Taurs. Procedi sui 48 chilometris cuntun disnivel di 2.504 metris al da pardabon grandis emozions.
Vuê cirche 900 mil visitadôrs ogni an a van a viodi il Grossglockner, la strade e je bielzà deventade une des primis trê atrazions turistichis in Austrie. Propit chest an si celebre il so 75m cjadalan e si spiete il 60milionesim visitadôr. Te stazion alpine Wilfried Haslauer Haus sul Alt Nassfeld (Oberes Naßfeld) si pues visitâ intune stazion di ricercje alpine une presentazion des Alps sot l’aspiet gjeologjic e ecologjic.
Trop costial?
(Presits in euros dome indicatîfs)
Stradis alpinis
Biliet par une zornade (machinis/motos)
Großglockner Carinzie-Tirôl    28/18
Nockalm Carinzie    14/8
Goldeck Carinzie    12/6
Gerlos Salisburc-Tirôl    7,50/4
Il turisim vert te monarchie_ Che la Austrie e vedi tant di ufrî lu saveve za la aristocrazie austriache e todescje tai secui passâts. Il turisim vert cul relax al prin puest al tacà al principi dal Votcent. Tal an 1909 si contarin tes regjons alpinis de viere Austrie za 2 milions e mieç di turiscj, di chescj 880 mil dome tal Tirôl storic.
Janez ERAT