TERITORIS – SLOVENIE. Il sisteme de scuele dal oblic in Slovenie

OSNOVNA ŠOLA_ I fruts slovens, dopo vê passât cualchi an li de scuele de infanzie, a tachin la scuele dal oblic a 6 agns: chest al è un viaç che par lôr al larà indevant almancul fin a 15 agns te osnovna šola (scuele elementâr). Duncje si trate di un troi lunc nûf agns, li che a son metudis adun lis nestris scuelis elementârs e mezanis, prime di frontâ l’esam finâl par podê jentrâ tune srednja šola (scuele superiôr) come i liceus o i istitûts professionâi.
RIFORME_ Une impuartante riforme de scuele dal oblic e je rivade tal Setembar dal 1999, cuant che il Parlament al à votât une leç di pueste par slungjâ l’oblic scolastic di vot a nûf agns (par chest di chê volte la scuele elementâr e ven definide ancje devetletka, des peraulis devet -nûf- e let -an-). I studis tes elementârs a son dividûts in trê ciclis di trê agns ognidun. La frecuence e je gratuite, ma i gjenitôrs a àn di proviodi pal materiâl che ur covente ai fruts e par domandâ in prestit i libris che a partegnin ae scuele.
Stant ai ultins dâts uficiâi, in dut il paîs a esistin 786 scuelis elementârs: di chestis, par fâ un esempli, 55 a son a Lubiane e 11 a Nova Gorica.
LEZIONS_ Te prime classe i fruts a àn 20 oris di lezion, par rivâ a 30 te otave e te novesime classe. L’inglês, tant che lenghe straniere obligatorie, si tache a studiâlu de cuarte; de setime classe indevant si pues zontâ ancje une altre lenghe.
Tes zonis bilengâls come chê taliane tai trê comuns de cueste adriatiche e chê ongjarese tal nord-est dal paîs a son ancje scuelis elementârs li che lis lenghis veicolârs a son il talian (tes trê scuelis di Koper/Capodistria/Cjaudistrie, Izola/Isola/Isule, Piran/Pirano) e l’ongjarês (tal Prekmurje).
Cui che al à chê di deventâ insegnant des elementârs al scuen laureâsi tun cors di Pedagogjie ufiert des universitâts dal paîs: i studis a durin 4 agns plui un an di tirocini, in ultin si à di frontâ un esam di abilitazion.
In DI SETEMBAR_ Come ogni an, lis scuelis dal oblic in Slovenie a son tacadis te prime zornade dal mês corint. Il calendari de anade 2010/2011 al è stât decidût a nivel statâl dal ministeri de Educazion e dal Sport (Ministrstvo za Šolstvo in Šport: il sît internet – par sloven e par inglês – al è www.mss.gov.si). Lis lezions pai students che no varan i esams dai ultins agns di scuele a finaran ai 24 di Jugn dal 2011.
VACANCIS_ I arlêfs des scuelis slovenis a podin gjoldi di dute une schirie di zornadis libaris par fiestis civîls e religjosis ben distribuidis dilunc l’an. Si tache ai 31 di Otubar (che però chest an al cole di domenie) cul Dan Reformacije («Zornade de Riforme») in ricuart de stesse zornade dal 1517 cuant che Martin Lutêr al picjà su la puarte de glesie di Wittenberg in Gjermanie lis innomenadis 95 tesis a pro de riforme de Glesie catoliche. Il Prin di Novembar al è subit un altri dì di polse pal Dan spomina na mrtve («Zornade dal ricuart dai muarts»).
FIESTIS PAR SIERÂ L’AN_ Pai students slovens l’an no si siere come pai nestris fantats cun 15 dîs di file di vacancis pal Nadâl, pal Prin dal an e pe Epifanie. In Slovenie i arlêfs a van a scuele fin ae vilie di Nadâl, po a tornin l’an dopo tacant di lunis ai 3 di Zenâr. Dopo dai 25 di Dicembar, ai 26 no cole une fieste religjose in ricuart dal prin martar cristian Sant Stiefin, ma ben si fiesteze il Dan samostojnosti in enotnosti («Zornade de indipendence e de unitât»), par memoreâ il plebissît che al fo votât ai 23 di Dicembar dal 1990 pe indipendence dal paîs: il 95 par cent al votà a pro dal distac de Jugoslavie, e il risultât al fo comunicât juste ai 26. I fruts a staran po a cjase, come dit, fin ai 2 dal prin mês dal 2011.
SETEMANE BLANCJE_ Une altre fieste nazionâl e colarà martars ai 8 di Fevrâr dal an che al ven cul Prešernov dan-Slovenski kulturni praznik («Zornade di Prešeren-Fieste de culture slovene»), in memorie de muart di France Prešeren, il plui impuartant poete sloven, te stesse dì dal 1849. Simpri in Fevrâr i arlêfs a gjoldaran de classiche «setemane blancje», une vere istituzion tun paîs alpin che i ten une vore a praticâ i sports su la nêf: il prossin an lis zimske pocˇitnice (vacancis invernâls) a laran dai 21 ai 25.
ULTIMIS FIESTIS_ I students in Slovenie no fasin vacancis di Pasche: si sta a cjase dome il lunis dopo, che tal 2011 al colarà ai 25 di Avrîl. Metint dongje lis fiestis che a vignaran subit dopo (ai 27 il Dan upora proti okupatorju-«Zornade de insurezion cuintri dal ocupatôr» e ai 28 e 29 il Praznik dela -«Fieste dal lavôr»), i arlêfs a podaran gjoldi di une interie setemane di polse prime de fin des lezions par chei che no varan di sostignî i esams finâi.
ALESSIO POTOCCO