CULTURE – ART-Â. Luciano Lunazzi, l’artist dal riûs torzeon

Cjargnel di origjine – al è nassût tal 1952 a Davâr –, Luciano Lunazzi, cressût in Svuizare li che la famee e jere emigrade, a 16 agns al jere za ator pal mont, sburtât de voie di scuvierzi culturis gnovis e diferentis. Dopo vê zirât la Europe in autostop cuntun sac a pêl, tor dai 21 agns al è partît pe Grecie, po al è lât in Turchie, passant daspò par Iran, Afghanistan, Indie, Pakistan, Nepal. Po la sô voie di zirâ lu à puartât in Indie e in diviers paîs araps e dal sud est asiatic, e ancjemò in Afriche, Americhe centrâl, Messic, Tailandie, Stâts Unîts e Australie. Simpri di bessôl e cun pôcs bêçs te sachete, si è rangjât a fâ tancj mistîrs che i àn permetût di continuâ a viazâ.
Ae fin dai agns Novante al è tornât in Europe, a Barcelone, e propit te citât catalane al à scuviert la art dal ricicli. Doprant la robe che la int e butave vie, al à tacât a fâ i siei prins lavôrs. Ju vendeve par pôc su la Rambla. Tal 2004, dopo une vite passade «on the road», plen di esperiencis, vivudis ad implen cul spirt de «beat generation» e de culture hippy, Lunazzi al è tornât in Friûl, a Udin, dulà che al vîf, fasint il pitôr, l’artist di strade. Di agns aromai al à decidût di «fâ alc par chei altris», di trasmetiur emozions a traviers de art, «dopo vê vût tant dal mont». Cussì, al à tacât a piturâ sogjets tribâi cun plui tecnichis. E vuê, cul stes spirt di aventure che lu à compagnât tai siei viaçs, cence fâ programs, Lunazzi al piture su materiâi riciclâts che al recupare di cualchi bande, in particolâr tocs di carton, len, truciolât, sacs di jute, telis e vinîls. Ur tache parsore tocs di plastiche, di stofe, imagjinis di rivistis vecjis. Al misclice colôrs acrilics, cole, scarts di ingjustri par stampantis e al dopre matitis, penarei e evidenziadôrs par contâ su cartons i «Bamboccioni» – nassûts daspò de famose butade di Tommaso Padoa-Schioppa – o i «Cjagnuts gnervôs». Mintri vinîls piturâts a deventin lis ruedis di corieris e furgons, olmis dal passât, dal stîl libar di viaç.
Lontan di une ricercje estetiche pure, Lunazzi al da vite a personaçs stranîts, creaturis disformadis a dôs dimensions, protagonistis di collages di piture e tescj, misturot di art figurative e astrate, grafits, disens ispirâts ae art tribâl africane e australiane, decorazions di savôr psichedelic e scritis, dispès cun strambolots, in plui lenghis: dal spagnûl al inglês, dal francês al furlan. Vuai a dismenteâ la lenghe mari («E je un toc di nô»), parcè che ancje intun mont globâl «tu âs di jessi di un puest», al dîs Lunazzi, che, daspò vê fat miârs di chilometris par cognossi, supâ e vivi il mont, nol à dismenteât lis sôs lidrîs, la sô identitât.
Grês e dissacrants, i lavôrs dal artist furlan a contin lis miseriis dal om o i segrets dal paradîs. Critiche fuarte cuintri lis strassariis, il lus, il consumisim, a scjassin rapresentant caricaturis di int comune, vitime incussiente di modis e convenzions. A sgrifin cu la lôr ironie. La capacitât di riciclâ e di mudâ intun fuart messaç artistic ce che la societât e bute vie, e rint unichis, fûr des convenzions, lis sôs oparis, mai scontadis e banâls.
Erika Adami