L’EDITORIÂL – Un Friûl che nol vûl sbassâ il cjâf

Al sarà ancje scontât ma mi vegnin dal cûr i auguris di bon Nadâl e bon an, a voaltris letôrs prime di dut, e po dopo a ducj i furlans.
Nol è stât un 2010 facil pal Friûl: si sperave intune riprese de nestre economie, ma chel pôc che si è viodût nol baste a cuietâ la pôre di pierdi il puest di vore, di meti i dincj su pe gratule ancjemò di plui pal an che al ven.
Ma chest al capite in dute Italie, un paîs par altri sbarlufît e cuntun guvier che al clope, dulà che il pinsîr no si sburte sul doman par cirî soluzions, ideis, risorsis in maniere strategjiche, ma al cjale dome ai interès dal moment de sô clape politiche.
E il Friûl, che si puartave daûr la definizion di laboratori politic, ven a stâi di un lûc privilegjât di pinsîr e di elaborazion, cu la fantasie di cirî ancje trois gnûfs tal interès de int, al è la copie spudade dal »Biel Paîs» tal pantan dal imobilisim.
Par dîle dute no je vere che no si môf nuie, ma chel che al ven indenant al fâs vignî i sgrisui.
Prime di viodi chei che a son i imprescj doprâts, fermìnsi un moment sul pinsîr di fonde di chestis manovris.
Strucje, strucje e ven fûr la concezion che il Friûl nol esist, se no dome come espression aministrative leade a Vignesie Julie, tant che Regjon in sumis.
In font nancje plui cussì speciâl, viodût che te riforme federaliste a stan miôr chês altris regjons.
Une volte glotût de Regjon, ce che al è il Friûl vîf, e no su la cjarte o sul computer, al conte pôc e nuie.
Salacor al pues jessi doprât par fâ passâ eletrodots, Tav. Al pues jessi un lûc ideâl ancje par une centrâl nucleâr, dut, nancje dîlu, in non dal progrès e presentât tant che un vantaç pai furlans che in tancj a vuelin fâ passâ par sotans, ma che invezit tant gnognos no son e duncje i lôr calcui a àn scomençât a fâju. Si son acuarzûts che la alte velocitât al Friûl e puarte pôc e nuie, e tal stes timp no si svilupe la ferovie Pontebane, che la energjie che o vin e je avonde par nô e dute chê altre e vignarà vendude dai privâts.
Si podarès lâ indenant. Dut câs la conseguence e je dome une: cualchidun nol sta fasint i nestris interès! Che al sedi ancje lui furlan nol impuarte, di esperiencis di chel gjenar a ‘nd è avonde te nestre storie.
Ce restial alore di bon in chest 2010? Prime di dut che o sin ancjemò chi a contâle, anzit a scrivile, e in seconde che fint cumò no son rivâts a passâ.
Une lezion grandone nus rive de manifestazion di Paluce e prime ancjemò dal Comitât pe difese dal Friûl rurâl. Cence dismenteâsi che a àn cjacarât tant di fusion des dôs universitâts, ma ancje chi no son rivâts adore a cumbinâle.
Un an di resistence, un an di tantis bandieris ator pes stradis dal Friûl. Simpri pocjis, ma simpri di plui. Auguris.
Dree Valcic