TERITORIS – SLOVENIE. A Piran il prin sindic di colôr de slovenie

208 SINDICS_ 134 domenie ai 10 di Otubar tal prin turni, altris 74 dôs setemanis dopo tes balotazions. Si è dividût cussì il vôt dai slovens par sielzi i sindics e i conseis comunâi in ocasion des elezions aministrativis 2010, rivadis sul tacâ de Sierade dopo di une lungje campagne eletorâl, par un apontament pluitost sintût massime dal guvier di centri-çampe di Borut Pahor. Disìn subit che a vinci ma cence straçâ i aversaris al è stât il principâl partît di oposizion, il Partît democratic di centri-drete, cul 18,7 par cent cuintri dal 12,1 dal Partît Sociâldemocratic dal premier Pahor.
MANAGER_ In chestis elezions a vinci e je stade soredut la figure dal candidât sindic: cun di fat, tancj prins citadins confermâts o di frescje invistidure popolâr si son presentâts tant che indipendents. Cussì al è stât par esempli par Zoran Jankovicˇ te capitâl Lubiane, candidât su la cjarte indipendent ma poiât di dut il centri-çampe, che al è rivât a concuistâ lis preferencis dai siei citadins adiriture cul 64 par cent dai vôts: il so sproc te campagne eletorâl al è stât Jankovicˇ dela («Jankovicˇ al fâs» ma ancje «Jankovicˇ al lavore»). A àn pontât dut sul lôr carisme Franc Kagler e Bojan Šrot, confermâts sindics di Maribor e Celje pal centri-drete. No si è votât chest colp a Cjaudistrie/Koper/Capodistria par vie di une decision de Cort costituzionâl su la pussibilitât de frazion di Ankaran/Ancarano di podê stacâsi e fâ un comun par so cont.
NO SLOVENS_ La conferme di Zoran Jankovicˇ e à fat disparî dal dut i dubis di cui che nol varès mai pensât che a Lubiane si podès vê un sindic no sloven «doc». Di fat, come che al pant il so cognon, Jankovicˇ al è di lidrîs serbe; si viôt che però i lubianês a àn badât soredut ai tancj lavôrs che a son stâts metûts in pîts in citât par fâle deventâ simpri plui europeane. Il câs de capitâl nol è nuie però a pet di ce che al è capitât a Piran/Pirano te balotazion dai 24 di Otubar: une date pardabon di meti tai libris di storie, par vie che la citadine di incjant su la cueste adriatiche e à sielt un sindic di colôr, il prin no dome in Slovenie ma in dute la Europe di Soreli Jevât.
GHANÊS_ Chê di Peter Bossman e je pardabon une storie che e pant cemût che il mont nol è plui chel di a pene vincj agns indaûr… Une storie che e fâs part ad in plen de globalizazion che e sta caraterizant il Tierç mileni, ma che però e nas di lontan, passe trente agns indaûr, te Jugoslavie dal maressial Tito. Ae fin dai agns Setante dal secul passât il zovin Peter al sta studiant medisine tal so paîs, il Ghana. Peter al stave spietant di podê vê une borse di studi par lâ un periodi in Ingletiere, ma un amì, a pene tornât di Novi Sad, in Serbie, i conseà di lâ in Jugoslavie. L’obietîf al jere la capitâl Belgrât, ma il zovin student ghanês si cjatà a jessi a Lubiane. Dilunc dal periodi di studi, Peter al cognossè une fantate cravuate compagne di cors, che po e à sposât: cussì e rivà la decision di stabilîsi in Europe.
SINDIC_ Prime de balotazion cul sfidant dal centri-drete Tomaž Gantar, Bossman al veve dit che «la Slovenie e je pronte par vê un sindic di colôr» (e il Friûl, si domandìn noaltris, li che aromai e vîf tante plui int di colôr rispiet ae Slovenie?). Candidât tant che indipendent ma cu la poie dal Partît Sociâldemocratic, il miedi di lidrîs ghanese, za sorenomenât «Obama di Piran», al veve za vût plui vôts di ducj tal prin turni (31,1 par cent) devant di Gantar, fer al 25,4, ma te sfide decisive al à batût di cuasi 200 vôts il so rivâl sierant cul 51,4 par cent.
E cussì Peter Bossman, che al à vivût 33 dai siei 55 agns in Slovenie, al è il gnûf sindic di une des localitâts slovenis plui cognossudis par vie dal turisim. «Za di agnorums la int no bade al colôr de mê piel, dome agns indaûr a pene rivât culì o viodevi che cualchidun al veve dificoltât a acetâ cheste diference, ma cumò al è dut a puest» al à dit tun perfet sloven Bossman.
Ae sô vitorie si son interessâts cetancj mieçs di comunicazion forescj, come l’inglês The Guardian e l’israelian Jerusalem Post.
CUISTIONS VIERTIS_ Magari cussì no, chestis elezions a àn vût dôs pecjis. Une e je stade la basse afluence: 51 par cent tal prin turni, a pene il 44,9 tai balotaçs. La seconde cuistion vignude fûr al è stât il bas numar di feminis votadis tant che sindic: dome 10 su 208, un numar pardabon misar. Cifris che a àn di fâ pensâ dut il mont politic sloven.
ALESSIO POTOCCO