ATUALITÂT – Mauro Ferrari e la nanotecnologjie

La nanotecnologjie e je un ram de sience aplicade e de tecnologjie che si ocupe dal control de materie in scjale inferiôr al micrometri (di solit di 1 a 100 nanometris) e de progjetazion e realizazion di dispositîfs di chestis dimensions.
CURRICULUM DI DUT RISPIET_L’espert mondial dal setôr, pari de nanomedisine, al è il professôr Mauro Ferrari. Nassût tal 1959 a Udin, dulà che al à fat il liceu Stellini, al è laureât a Padue in Matematiche tal 1985, PhD in Inzegnerie tal 1989 in Californie inte Universitât di Berkeley. Ricercjadôr de Universitât di Udin par doi agns, cjapant sù dutis lis ocasions a man a man che si presentavin, al è po dopo tornât te Universitât di Berkeley tant che “assistant professor”. Come che al ricuarde in tantis sôs intervistis, intai Stâts Unîts i sienziâts a van indenant cu la meritocrazie e se no si produsin studis che a conventin pe societât a van a cjase. No si fâs ricercje dome par stâ suntune biele poltrone. E la sô cariere e je lade indenant.
Tal so curriculum al vante plui di 200 articui su rivistis sientifichis, 7 libris, 50 brevets internazionâi, onorificencis, e tante, tante ativitât di ricercje (cul contribût economic specificât par ogni ricercje) e di insegnament. Dopo vê lavorât in istituzions prestigjosis tant che il National Cancer Institute, la Universitât dal Texas (Health Science Center), la Rice University, cumò al è deventât President e aministradôr delegât dal Methodist Hospital Research Institute, un dai principâi ospedâi in Americhe, une leiende dulà che si fâs ricercje in dutis lis specialitâts (U.S. News and World Report).
LA FUARCE DAL SAVÊ FÂ GRUP_ Al somee di viodilu, cui siei colaboradôrs di dutis lis bandis dal mont, resonâ di un mont cussì piçul, dulà che lis distinzions tra lis difarentis competencis de sience a sparissin. Ma la fuarce de sô iniziative e je propit tal confront e te integrazion di variis dissiplinis sientifichis. In chestis riunions, la union di gnovis metodologjiis di matematiche e inzegnerie a  fasin nassi gnovis ideis e soluzions pe medisine. Propit pe medisine, dulà che lis terapiis simpri plui personalizadis a son la sperance par vinci malatiis dal nestri timp. Bisugne puartâ la medisine juste tal puest e tal moment just, jessi sigûrs che e funzioni e podê monitorâ ancje la vuarison (Nature Reviews, 2010). Chest al è impuartant parcè che il nestri organisim al è plen di barieris che a impedissin aes medisinis di rivâ aes celulis maladis. La tierce gjenerazion di nanofarmacs e rive tai vâs dal sanc, e ricognòs lis celulis maladis e e mole fûr, daûr di dulà che si cjate, ce che si à programât (PLos ONE 5(9):e13050). Une sperance di cure che o stin ducj spietant…
UN RICOGNOSSIMENT FURLAN_Cussì, ancje la ricercje di un mastic par fâ vuarî ae svelte lis fraturis dai vues plui gravis. Intune des sôs ultimis publicazions, si presentin i svilups plui resints di nanotecnologjie aplicâts aes malatiis di cûr (Trends in Pharmacological Science 2010:31;199). Ma in Italie? Masse invidis, gjelosiis, burocrazie, dificoltâts aministrativis, normis par regjistrâ i brevets complicadis, cuntune Universitât indaûr rispiet a chei altris paîs plui svilupâts, e indaûr ancje rispiet a paîs emergjents tant che Indie e Cine… No cate dut chest, il professôr Ferrari al colabore cul Centri di Nanomedisine in Lombardie, cui distrets tecnologjics in Friûl, cul Politecnic a Turin e  al à creât a Gagliato (Calabrie), il paîs da Nanosience «Cun cheste iniziative il paîs al è tornât a animâsi, si sta lavorant par miorâlu e cualchi paîs dongje al somee che al ciapi sù l’esempli. Cuissà se si podarès fâlu ancje in Friûl…» nus dîs. Ma in Italie, la mancjance di investiments su disvilup e ricercje a puartaran tancj altris zovins ricercjadôrs a emigrâ, sul so esempli. Ma si à di lâ indenant a lavorâ e a colaborâ par vinci ciertis sfidis, cence scoragjâsi, magari cuntun piçul pinsîr al Friûl: tal curriculum grandiôs dal professôr Ferrari al è il puest pal Premi Furlan de Diaspore dal Fogolâr Furlan di Milan dal 2009: «Un onôr», al declare cun braure.
Mara Piccoli