CULTURE – CUSINE. Une speziarie te cjanive

In dì di vuê, al prin colp di tos si cor in speziarie, par fâ scorte di pirulis, vitaminis e altris striaments che a prometin di rinfuarçâ lis difesis imunitariis dal cuarp. E ancje se i miedis a continuin a spiegâ che no esistin medisinis miraculosis, che imbotîsi di pirulis al pues jessi parfin pericolôs e che un mangjâ san a al è la miôr garanzie par preservâ la salût, al semee cuasi impussibil vivi cence dute cheste complicade (e costose) farmacopee.
I RIMIEDIS DI UNE VOLTE_ Al ven ben di domandâsi cemût che a fasevin lis nestris nonis, che di sigûr no vevin a disposizion dut chest armamentari di cidelis e polvarins. Scuvierzint cussì che la lôr “speziarie” ben dispès a jerin la cusine, la cjanive e l’ort.
Naturalmentri, plui che di curis par malans seris (che par chei, une volte come cumò, la uniche e je  clamâ il miedi), la femine di cjase e veve dute une schirie di soluzions pai tancj piçui fastidis, magari leâts al fat di vivi a contat cu la nature e tal frêt. O ancje cualchi ricete di emergjence par compensâ une diete no simpri masse complete (la plui famose e je il vueli di riç, une vere bote di chês vitaminis e di chei oligominerâi che la cusine contadine e jere puare).
E tai ingredients de cusine, si platavin ancje i segrets de bielece des feminis che, ancje cence estetistis e profumariis, a vevin ducj i lôr trucs par un cimi di vanitât, come la aghe di camomile par sclarî i cjavei, il limon par sblancjâ lis mans e magari un toc di crodie di purcit par amorbidî la piel induride dal lavôr tai cjamps o i poleçs di frêt.
Un grum di chescj rimiedis a vevin in realtât une base sientifiche, discuvierzude tai secui in maniere empiriche, e che dopo e je stade doprade ancje de industrie che e à sintetizât i principis e ju à voltâts in prodots plui comuts di doprâ.
In altris câs, al tocje dîlu, spes a jerin pôc plui che une liende, e la validitât di une “cure” e stave plui tal “efiet placebo”, magari rinfuarçât cuntun biel surplus di preieris (che mâl di sigûr no fasevin) o di nainis rituâls che a vevin il savôr velât di une medisine pagane.
CUALCHI RACOMANDAZION_ Par cui che, in dì di vuê, al ves voie di metisi a scoltâ nonis e agnis par riscuvierzi cheste biele tradizion, al va dut câs ricuardât ben il fat che la nestre vite, a confront cun chê dal secul passât, e je avonde cambiade, e che forsit ce che al lave ben cent agns indaûr fa par une persone che e lavorave tai cjamps, che e viveve tal frêt e che e mangjave pôc, magari nol è propit l’ideâl par int che e fâs une vite sedentarie e iper alimentade (al ven par esempli iniment il bocon di ardiel par cuietâ il mâl di stomi, che no je propit une idee sane par un che al vedi il colesterôl alt…).
In plui, tocje ameti che ciertis soluzions “industriâls” a dan plui garanzie di igjene, e che cuant che si trate di robe di mangjâ o di passâsi su la piel, miôr no butâsi intun pericolôs “fâ-di-bessôi”, parcè nol è dit che un robe, dome par vie che e je naturâl, no puedi ancje fâ mâl.
Ma – dut câs – la prossime volte che us ven la tos, prime di implenâsi di pirulis, provait a bevi une tace dal bon vecjo lat cjalt cu la mîl e la salvie (se no sês fruts, ancje un got di sgnape che e scjalde…). Forsit scoltâ la none, ogni tant, nol è propit une brute idee…
Margherita Timeus