ATUALITÂT – Friûl: 145 – 93 agns de Italie

Come cristians che a crodin te dignitât di ducj i oms come fîs dal unic Pari e, duncje, tal dirit di ducj i popui a guviernâsi sfrancjâts di prepotencis esternis, in fraternitât e strenzûts te prospetive di un distin unic, no podìn no gjoldi di cheste circostance che nus impegne, scomençant des resons di fede, a cirî l’acuardi e la passion pal ben di ducj i talians. Ma par nô cheste fieste no pues jessi complete e serene, par vie che chê che e veve di jessi la nestre “cjase comugnâl” no je, dut a vuê, vierte a lis nestris sacrisantis spietativis di int e di popul, come che la stesse Cjarte Costituzionâl dal Stât Talian e intindarès professâ. E che a varessin di fânus dî: achì mi sint a cjase, achì o stoi ben! Cun dut l’articul 6 de nestre Costituzion, di fat, o stentìn un grum a sintîsi onorâts di chest tipo di unitât statâl, par vie che la nestre configurazion culturâl e spirtuâl, che e reste par nô une ereditât irinunciabil, e ven invezit saldo sbeleade e continuamentri cjapade tant che un afront a la integritât dal Stât. Une situazion di minorizazion insensade che e stone inmò di plui se o pensìn che la Europe unide e à tant che element di fonde il principi “in diversitate concordia”. Si cjatìn cussì inte paradossâl situazion che a Bruxelles e je la cussience dal valôr di chest cjanton di Europe dulà
che te ereditât dal Patriarcjât di Acuilee
si cjatin a convivi lis trê principâls culturis
dal continent; a Rome, invezit, a ignorin il
patrimoni di cheste tiere.
In particolâr:
• Emblematic al è il tratament che si fâs a la nestre lenghe – simbul di fonde de nestre identitât – che, cun tant di leç in proposit, i ven ancjemò inibît in maniere vegognose chel puest che i spiete te scuele e te vite publiche. O onorìn la lenghe taliane, che nus permet di intindisi cun chei altris popui dal Stât, ma no volìn che la lenghe che par seculorums e à segnât la nestre storie e mueri par colpe di chê vignude dopo. O paìn lis tassis pe culture, ma no volìn che chestis a servissin dome pe monoculture statâl, che e cope lis diviersitâts.
• O viodìn che la scuele e continue a mortificâ lis espressions plui emblematichis dal nestri stamp culturâl. Tant a dî che – fale il câs di cualchi insegnant inluminât – i nestris zovins no san nuie dal Friûl, che uficialmentri za dal 1077 al à tacât a scrivi une pagjine lustre e civîl di esperience politiche autonomiste. E che, cul so Parlament de Patrie, si presentave inte ete di mieç come cuasit un preludi des formis di democrazie partecipade, che in chê volte no jerin par nuie scontadis. Cuntune liende storiche che no à nuie ce invidiâ a altris regions, che a vegnin però spampanadis tant che unichis e straordenariis.
• La retoriche nazionaliste, massime chê riferide a lis vueris, e impedìs ancjemò a la nestre int di cjalâ cun voli seren a chei popui dal Nord e di Jevade che, par gjeografie, politiche e culture a àn fate storie cun nô e che la nestre int e à simpri incuintrâts, par vie che il pan lu à vuadagnât simpri di chês bandis.
• Une considerazion a part al mertarès il fat de problematiche convivence inte regjon là che il Stât nus à sgnacâts e dulà che dut al conzure cuintri l’aspirazion dal Friûl di sintîsi une unitât, clamade cul so non e atente ai siei dirits e problemis. Un fat che al spiete une urgjente rimeditazion logjistiche-struturâl ad hoc.
• Par clarece e onestât storiche no podìn no fâ presint che, di fat, il Friûl di soreli a mont al è stât anetût a l’Italie tal 1866 e il Friûl di soreli jevât tal 1918. Duncje un toc 145 e chel altri 93 agns indaûr, no 150. Dut chest al mortifiche la nestre cussience di comunitât segnade di une identitât storiche e culturâl e nol pues no gjenerâ, in cui che al à rispiet pes resons profondis de dignitât umane, un sens di disafezion ancje pes problematichis dal Stât dulà che si cjatìn a convivi. Ribatint, alore, la nestre lealtât a di chest Stât che al ricuarde il so secul e mieç, o scugnìn però ancje dî che la nestre partecipazion a lis celebrazions no je par nuie complete e scontade, parcè che e mancje di chel traspuart che e varès di vê une robe che le sintìn nestre, pal fat che nus onore e parcè che nol è pussibil celebrâ nissune unitât, cence insieme ricognossi dutis lis particolaritâts che la componin e parcè che la vere unitât e je di tancj – difarents – e no afermazion dome di un o dai plui numerôs. E stant che tai confins de Italie ind è ancje altris popui che, come il nestri, no si sintin dal dut a cjase lôr, o ricuardìn ancje che, ai fins di une vite plui partecipade, serene e armoniche e par superâ tant dal malstâ ch’al esist tal nestri Stât, tocje ancje meti man a disberdeâ i problemis ch’o vin segnalât.
Lu disìn cun lealtât e, massime, cun perentorietât!
Patrie dal Friûl
Vençon, ai 20 di Fevrâr dal 2011
GLESIE FURLANE