STORIE DI CUVIERTINE – CUINTRISTORIE DAL NÛFCENT 1910-1920

Popui che par secui a son stâts in pâs, si son cjatâts nemîs par colpe dal nazionalisim
Bielzà tal Otubar dal 1912 il bataion Tumieç, cun volontaris dal Cividât e dal Glemone, incuadrâts sot il colonel Antonio Cantore, propite chel de caserme di Udin, al scjale lis dunis di savalon dal altilplan dal Gorian, dongje Assaba. A son oms dal VIII Reziment. Alpins tal desert! E ce po? Par dimostrâ la impreparazion e la stupiditât dai gjenerâi talians, se tu âs di mandâ cualchi soldât a scombati tal desert l’alpin al è propite adat! “Artiliarie di Mont”. Cuasi un film che al tornarà a plui ripresis, ancje te seconde vuere, fintremai cumò, su altris claps ma su deserts cetant compagns. E tal ’15, cuant che la Italie finalmentri si decît di ce bande che i conven stâ, cusins, parincj, amîs, di ca e di là dal confin segnât de linie di Cormons, a metin sù divisis di colôr difarent. Di une bande ti insegnin a berlâ “Vive il Re”, di chê altre a cjantâ “Serbi Iddio l’Austriaco Regno”.
FURLANS DI CA E DI LÀ DAL CONFIN_ E par evitâ che i furlans si copin tra di lôr, Gurizans e Valcanalots a vegnin mandâts sul front Galizian, te becjarie cuintri i Rus. Dodis dîs di tren dome par rivâ sul front. Une epopee ancjemò cetant pôc studiade: in tancj di lôr, cjapâts presonîrs dai soldâts dal Zar a vegnin depuartâts fin in Siberie, di là dai Urâi, par lavorâ su la ferade transiberiane, là che a cjatin chei altris furlans, chei che a jerin là fin de fin dal ‘800. E la lôr storie e je chê di une vite salvadie brusade tai boscs de Taighe, spierdûts tal blanc di une nêf che no finìs plui in Invier e mangjâts vîfs dai moscjins jenfri i pantans di Istât. A finissin sul Bajkal, sul confin cu la Mançurie, adiriture sul Mâr dal Gjapon. La rivoluzion russe dal 1917 ju taie definitivementri fûr de Storie, involuçâts dentri chê grande burascjade orientâl. In tancj a sposaran fantatis di là vie. A varan frututs che a fevelin par rus cu la mari e par furlan cul pari, dismenteantsi par simpri di tornâ a cjase.
LA OCUPAZION TALIANE_ No son stâts tirâts sù monuments ai muarts talians de Grande Vuere vie pal Gurizan, ni parsore Pontebe. Ancje parcè che cuant che Gurize e cole, tal 1916, “chei de manteline”, come che a clamavin i soldâts talians, no si compuartin propite benon cu la popolazion civîl: la retoriche nazionâl fassiste nus à insegnât che chei soldâts a liberavin “tiere iredente”, invezit a àn fat dispès i comuts dai invasôrs, a àn ocupât, cjapât int, robât, fat violence, massime cuintri chei che a fevelavin furlan o sclâf, confondûts insieme come ignorants e grubians di civilizâ, anticipant ce che al sarès sucedût cualchi an plui indevant. E di cheste altre bande dal confin compagn: massime tal ribalton di Cjaurêt, compagniis militârs, sedin mucs o talians, a ocupin fatoriis, cjasis, a copin gjalinis, purcits, a robin vidiei, vacjis, cjavai: “predis di vuere”, a disin se a son nemîs; “rifurniments pal front”, se a son amîs. Ma il risultât nol cambie. Plui di cualchi bestie – uniche risorse de famee – e ven sepulide vive intune buse cuvierte cun ramaçs fûr pal bosc. Ma se lu cjatavin si riscjave la fusilazion. Il curtîl al devente acampament, cun tendis, magazins di provisions, sentinelis e turnis di vuardie; i gjalinârs (aromai vueits) a son une straordenarie santebarbare par tignî munizions, fusîi, bombis e metraiadôrs.
UNE TRAGJEDIE DI POPUI_ E in citât, a Udin, si vierzin i casins, là che une frute, se in salût, a pues puartâ a cjase cualchi bêç in plui, che la fam e fâs dismenteâ ancje la vergogne. Cualchi volte i soldadats a son zentîi. A ufrissin tabac ai vecjos, marmelade ai fruts. Specialmentri i mucs, che po dopo a son Slovens, Cravuats, Bosniacs, Ongjarês, che cjalâts di dongje no somein “l’orit e barbaric nemì” piturât te cuviertine ilustrade de Domenica del Corriere, ma cetant compagns di chel om di cjase che ancje lui al è a scombati sepidiu dulà, in cjadaldiaul: stesse muse, stesse cragne, puce, pedoi e miserie compagne. Tant che a voltis cualchi zovine, restade di bessole, ingropade dal marum e de disperazion, i vierç la cjamare par scjaldâsi insieme cuintri un frêt che al è plui morâl che corporâl. La lûs studade e jude a sconfondisi un pôc e lui al podarès propite someâ a chel sul cuadri dal ritrat des gnocis. La statistiche dai fruts nassûts par amôr o par violence te retrovie furlane dal front no je mai stade fate. A son cierts argoments che si à miôr tasê. Gloti par tirâ indevant. Come che a àn simpri fat cun grant coragjo lis feminis, almancul di cuant che Eve e à robât chel miluç.
Partencis e spietis
E je dute achì la grande metafore de seconde decade dal Nûfcent. Un aiarat che al tache a soflâ adore, propit tal principi dal deceni, improvîs: disìn un garbin che al bughe insieme pôris e savalon dal desert african fintremai in Cjargne. “La grande proletaria si è mossa”, al zigà il poete Giovanni Pascoli, cuant che i prins soldâts a partivin pe Libie, tal 1911. Pal Re e Imperadôr di une corone cuasi a pene rivade (dal 1866) e za cussì golose di cjar frescje e zovine di brusâ di cualchi bande. Ma e sarà dome la prove gjenerâl dal montafin che al sclope subit dopo, tal 1914, cuant che l’Arciduche di Austrie Francesco Ferdinando al vignarà copât in chel di Sarajevo. La Italie no je ancjemò fate dal dut, e chi in Friûl il confin al è di chei impuartantons. Come che al è simpri stât fin chê altre dì e forsit, dentri tal cjâf di cualchidun, al resist ancjemò cumò. Furlans di ca e di là de linie duncje. E a cjase? Cui restial? Vecjos e fruts, e soredut feminis, che cun coragjo e fadie a scombatin une bataie cence fusîl, ma cetant complicade, cuintri fam, miserie e orôrs. Parcè che fûr de retoriche des bandieris, des medaiis, lontan des fanfaris, a son propite lis feminis che a restin, che a resistin, che a spietin: l’om in vuere, o un frut che al à di vignî. Ancje cence pari. Cuntune fuarce che e fasarès pôre a dîs mil canons e a un milion di gjenerâi in divise.
Angelo Floramo