SPECIÂL. Cuant che de passion tu fasis il to lavôr

Massimo, ce sumiavistu di piçul? Varessistu mai pensât di lavorâ di regjist? Di dulà vegnie fûr cheste passion?
Di frut o volevi fâ tantis robis ma no pensavi di fâ il regjist ancje parcè che no savevi nancje ce che al fos. Un frut al vûl deventâ Clint Eastwood, no Sergio Leone.
Come ducj i fruts o ai creât lis mês storiis di fantasie che mi passionavin, che o insioravi e i lavoravi parsore. Cun dut achel, il moment precîs li che o ai decidût di passâ ae azion al è stât dopo che o ai viodût il film di Aki Kaurismaki: “La Fiammiferaia”.
Tu âs studiât Siencis Politichis a Triest, po dopo tu sês stât a scuele di Ermanno Olmi. Dôs robis dal dut difarentis, cemût cheste sielte?
Siencis Politichis mi à dât une formazion che mi à coventât une vore te vite. O ai cjapât la lauree cuntune tesi in Sociologjie des relazions etnichis, une materie che mi varès dât dopo lis fondis par frontâ cun plui sigurece e competence tancj documentaris.
Daspò de lauree, la passion pal cine e jere masse fuarte e chest mi à sburtât a cirî une formazion specifiche. Par fortune o ai podût frecuentâ la Scuola Ipotesi Cinema di Ermanno Olmi a Bassan, che e à rinfuarcît dentri di me la voie di lâ indenant su chê strade. O ai decidût alore di trasferîmi in Ingletiere par frecuentâ la Northern Media School di Sheffield, là che dopo di un cors post universitari di doi agns o ai cjapât une lauree cuntun Master in Regjie e Senegjature.
E il to percors professionâl, di indulà isal partît?
Dilunc dal periodi universitari a Sheffield o vevi fat un curtmetraç che al è stât notât di un regjist di Cardiff. Al è restât cussì cjapât de storie che mi à dât di fâ une senegjature par un film. Alore o soi lât in Galles li che o soi restât cuatri agns e o ai lavorât tant che regjist senegjatôr freelance. Alì o ai imparât la cure dai detais, la preparazion e l’ategjament di rispiet viers il lavôr che si fâs. La cussience che al è necessari, par un professionist, misurâsi cul mont e no cu dome cu la piçule realtât che al vîf.
Probabilmentri al sarès stât plui facil vierzi une cjase di produzion intune grande citât e invezit tu âs sielt di inviâ la ativitât a Udin. Parcè?
Prin di dut par vie de volontât di fâ il gno lavôr cirint di restâ te mê tiere, metint in vore la esperience fate tal forest. E je une sielte dificile ma che ancje e da une vore di entusiasim, ancje se lis dificoltâts a son cetantis. Il Friûl nol è ancjemò cognossût tant che realtât audiovisive in Italie e tal forest, cun dut achel al à cetantis potenzialitâts tal setôr.
La tô specialitât e je chê dai curtmetraçs e dai documentaris. Cemût si rivie a contâ alc in pôcs minûts?
Il scugnî contâ une storie in pôcs minûts o adiriture in pôcs seconts, come te publicitât, e je par me une disfide che mi cjame di entusiasim. Si à di vê ben tal cjâf l’obietîf finâl, jessi curts, essenziâi, stiçâ, e no dismenteâsi che il prodot finâl al à di jessi par ducj.
Cuâl dai tiei lavôrs ti aial fat plui divertî e ridi tal fâlu e cuâl invezit ti aial dât plui problemis e pinsîrs?
Dal sigûr la realizazion di “Buris, libars di scugnî vignî” mi à divertît cetant, ancje pe sô nature sureâl. I problemis po tal fâ cine o documentaris a son simpri, ma i fastidis di caratar tecnic a son un sburt e une disfide, invezit i problemis vêrs a son simpri di nature esterne al prodot audiovisîf.
Dai tiei lavôrs e ven fûr une passion pe storie furlane. Cuale la prossime pagjine che tu nus contarâs?
Dopo il documentari su la storie dal Friûl e chel sui Cjastelîrs furlans o vorès lâ indenant a contâ la storie dal Friûl. Tal imprin l’obietîf al jere chel di une storie in cjapitui: i Celts, i Romans, i Langobarts e vie indenant, un progjet che o crôt ancjemò bielonon, dut câs cumò o pensi che al vegni miôr il contâ episodis “furlans”, che par altri a rivin a vê un rimpin ancje fûr dai confins de Patrie, e al è il proponiment che i stoi daûr al moment.
E la lenghe furlane? Ce impuartance aie dentri tes tôs produzions?
Il gno prin curtmetraç al jere par furlan e in marilenghe o ai fat cetancj lavôrs, une vore di chest autoprodots. Il vantaç e il svantaç dai lavôrs par furlan al è che mi cjapin dentri in maniere une vore fuarte, forsit masse. Il furlan al lavore ben tant che lenghe veicolâr dal prodot, se doprât te sô naturalitât, e pai titui al à potenzialitâts grandononis.
Ma Massimo, sêstu sigûr di vê mandât un to lavôr almancul a une edizion dal premi de Mostre dal Cine Furlan? Al pâr fin dal impussibil che no tu vedis mai vinçût!
O ai cjapât part trê voltis ae “Mostre dal Cine Furlan” e al è vêr che no ai mai vinçût, però ce che mi da plui sodisfazion e je la reazion dal public che, almancul fin cumò, e je simpri stade une vore positive e che mi à dât simpri une cjarie fuartonone. O pensi che al sedi impuartant ricuardâsi che i nestris lavôrs, ancje chei par furlan, a son indreçâts a un public.
Ise une reson parcè che lis dopleaduris dai films par furlan (Star Trek, i Simpson, Supercar…) a àn tant sucès? Di fat e je tante int che ju cjale ma ancje tante che si met a fâju.
O ai viodût ancje jo une grande ativitât di dopleadure di seriis televisivis fortunadis in lenghe furlane, la plui part in maniere ironiche. Une ativitât goliardiche che si fâs preseâ une vore se juste apont e ven cjapade cussì. Oltri ai problemis dal pont di viste de tutele dai dirits des seriis dopleadis, al pues vê la sô uniche fuarce tal cjatâ comic il doprâ la lenghe tun contest inimagjinabil: cualchi volte si rît dome pal ûs dal furlan ma no cul furlan.
Il voli dal regjist al è chel che al rive a viodi a 360 grâts la realtât. Ce viodial il to voli in chest moment, dulà isal daûr a lâ il cine furlan?
Considerant il cine furlan tant che il cine in lenghe furlane, o pensi che chest, come cine prodot in Italie, al partissi di une condizion che e je za contrarie. Po dopo, il doprâ la lenghe furlane al pues rapresentâ o un svantaç in plui o forsit une clâf par une diferenziazion positive. Bisugne, secont me, tignî i pîts ben salts par tiere ma fâ svualâ i siums plui adalt che si pues.
Tal scansel dal tô ufici tu âs dal sigûr un progjet par alc che tu volaressis realizâ. Nus spiistu ce che al è?
O ai cetancj progjets che o vorès meti in vore, a vê avonde timp; ogni volte che o ‘nt fâs un la liste si scurte ma e reste simpri masse lungje. Un puest ben clâr e sigûr in chest elenc al à un luncmetraç par furlan che no dîs nuie a proposit, par no puartâ scalogne.
Par no riscjâ duncje che dut al vadi in malore no i vin domandât plui nuie e cussì o restìn in spiete di chest luncmetraç, ma sperìn che Massimo Garlatti Costa no nus fasi spietâ masse, che fin cumò nus à abituâts plui che ben!
Elena Zanussi