ATUALITÂT. Liet e Friûl, provis di trasmission

O vin fevelât tal numar stât de Patrie (inte fotogallery, n.d.r.) de V edizion dal Liet International, il plui impuartant festival musicâl european pes lenghis minoritariis. Tierçs i nestris Carnicats, mentri che prin al è rivât il cors Jaques Culioli. Il so toc «Hosanna in Excelsis», al fâs part de grande tecniche vocâl tipiche de tradizion polifoniche corse. Par sigûr, a meti dacuardi la jurie al è stât il contignût fuart dal test de sô cjançon: un invît aes fazions indipendentistis de Corsiche a metisi adun.
Ai 28 e 29 di Novembar, Jaques al è stât ospit di Musiche/Premi Friûl. Cheste presince e je dal sigûr un segnâl dai bogns rapuarts di colaborazion jenfri il Liet International e la nestre regjon, che si svicine simpri di plui a une candidature par ospitâ un event che al è daûr a cjapâ simpri plui pês a nivel european.
Lu vin sintût par che nus conti di cheste esperience.
Cemût ise stade la esperience dal Liet? Ti spietavistu un trionf dal gjenar?
Une esperience uniche che o speri che si ripetarà. Chest gjenar di manifestazions al varès di cjatâ spazi in dutis lis grandis citâts de Europe.
Partint cun cheste cjançon, o jeri fidançôs. Cuant che Bruno Susini me à presentade, o soi stât inmagât sedi dal test che de musiche. O jeri duncje otimist partint pe Svezie, ma no mi spietavi di cjapâ doi premis.
Cemût isal stât cjatâ altris grups che a àn decidût di cjantâ intune lenghe minoritarie?
La atmosfere e jere di fieste: cun ducj i rapresentants des lenghis minoritariis lis rivendicazions a son compagnis, indipendentementri de divignince. Duncje nol jere nissun sintiment di rivalitât leât al showbiz (contrariementri ae eurovision tradizionâl, par esempli) e chest al è stât une vore positîf.
«Hosanna in excelsis» al podarès semeâ il titul di un toc religjôs, ma invezit al à un fuart significât politic. Di ce fevelial?
La cjançon e conte dal periodi – tai agns ’90 – cuant che in Corsiche une tension fra personis cuntun stes sintiment identitari e politic si è trasformade intune vuere tra fradis.
Si è passâts a doprâ lis armis, intune vuere che e à causionât cetantis vitimis. Un sium si è sfantât e la sperance e je deventade inutile. Ma il coraç e la volontât di cualchidun e àn viert une puarte viers la riconciliazion, tornat a puartâ la pâs. Cheste cjançon e je une preiere di sperance pai oms che a àn savût superâ il mâl.
La Corsiche e va indenant a vivi un fuart isolament, par colpe de pocje atenzion dal stât centrâl francês. La musiche e la culture, puedino svicinâle al rest de Europe?
Dopo 240 agns di presince francese, a son nassûts e si son disvilupâts leams, ma inmò in dì di vuê i francês a fasin fature a capî ce che e je la Corsiche e cui che a son i Cors: i media a rimarchin plui i aspiets negatîfs che chei positîfs.
Par esempli, no cate che a fossin presints un breton e un cors a chest concors in eurovision, nissune rêt televisive francese e jere presint, e no crôt che Parîs e sarà mai interessade a dâ acet ae kermesse. Ma i paîs che no àn ancjemò ratificade la cjarte des lenghis minoritariis a varan di cedi: ducj i musiciscj dal mont a san che la musiche no à frontieris e che i oms, di cualsisedi bande che a rivin, se a àn la volontât, si tornaran a svicinâ.
Jo o saponti la idee di une Europe multiculturâl, li che la ricjece e je rapresentade de sô diviersitât.
– – – – – – – – – – – – –
Te suaze de stesse manifestazion, o ai sintût Sonia Parayre, aministradore de Direzion Gjenerâl dai Afârs Juridics dal Consei di Europe di Strasburc, par chel che al inten la Cjarte Europeane des Lenghis Regjonâls o Minoritariis. Chest an, il so ufici al à decidût di colaborâ cu la organizazion dal Liet festival.
Mandi Sonia, chest an al è l’aniversari dai 10 agns de Cjarte europeane des lenghis minoritariis. Ise la ocasion juste di scomençâ a colaborâ cuntun festival come chest?
Dal sigûr. Par dî il vêr, la colaborazion cul Liet e jere za stade cjapade in considerazion dal gno predecessôr, ma in chê volte nol jere stât pussibil, duncje o soi une vore contente che o vedin podût tacâle a ducj i efiets propit in ocasion di chest aniversari. O pensi ancje che al sedi une vore impuartant meti adun i aspiets plui sientifics che o sin daûr a tratâ tes cunvignis, cuntun festival musicâl. Chescj doi aspiets a son pardabon complementârs.
Îr o vin passât une biele serade scoltant une schirie di bands zovinis impegnadis intune jam session (conciert improvisât ducj insiemit, n.d.r.). Une situazion come cheste, nus trasmet la idee di un bon stât di salût des lenghis minoritariis tes gnovis gjenerazions. Ce pensistu?
Sigûr, cheste e je ancje une des motivazions che nus àn fat decidi di sostignî il Liet Lavlut chest an. Ce che o viodìn in Europe, fevelant di lenghis minoritariis, al è che o vin une pierdite di trasmission intergjenerazionâl de lenghe te famee. Il pont al è che par fâ vivi une lenghe no àn di fevelâle dome i vecjos, ma ancje i fruts e i adolessents. In cierts paîs de Europe, o sin a bon cui programs educatîfs ma chest nol è avonde. O vin di dâi la pussibilitât ae zoventût di doprâ la lenghe inte vite di ogni dì, par mieç de musiche e di internet. Par esempli, lis gnovis tecnologjiis a son une vore impuartantis.
In cheste prospetive, la musiche e rapresente la maniere plui popolâr di dâur braure aes lenghis minoritariis e e permet ae zoventût di considerâ sul seri chestis lenghis e di doprâlis in maniere gnove.
Podìno duncje sperâ che il vuestri supuart a chest festival al ledi indenant?
Sì, sperin di vê la pussibilitât di lâ indevant su cheste strade. Viodarìn ce che al sucedarà ma o pensi propit di sì.
Leo Virgili