I CLASSICS. 11 – CUINTRISTORIE DAL FRIÛL La albe de nestre Patrie

Nobiltât e contadinance sot di Vignesie
Ce che Vignesie no veve crodût di podê fâ intun sôl colp, al moment da la ocupazion dal Friûl, e rivà adore di fâ daspò, a planc a planc, in doi secui di politiche interne avonde furbe. La bestie nere, pe Serenissime, e jere la nobiltât furlane, che e rapresentave il principi feudâl, la tradizion indipendentistiche, l’element todesc de popolazion. Cun cheste nobiltât Vignesie e veve scugnût fâ i siei conts, cuant che e veve pleât il Friûl; par vie di cheste nobiltât e veve scugnût instituî une forme di autonomie te Regjon; a cheste nobiltât e veve scugnût lassâ jurisdizions e prerogativis. E di cheste nobiltât no si infidave fregul; e no veve tuart: i cjistielans si jerin pleâts cu la intenzion di tornâ a dreçâsi subite che al fos stât pussibil.
Intal prin, Vignesie si contentà di scurtâ la autoritât judiziarie dai cjistielans e dal Parlament, risiervant al Lutignint o al guvier centrâl lis causis plui impuartantis e dutis lis apelazions; e lassà ai siei Lutignints libertât di fâ regolaments e riformis tal funzionament des assembleis parlamentârs; e lassà che la Comunitât di Udin, indulà che i Savorgnans a jerin parons, e cjapàs une posizion di contrast cuintri il Parlament de Patrie e i creàs berdeis di ogni fate.
Ma la furbarie di Vignesie e fo ancjemò plui fine tal profitâsi de miserie dai contadins e dal lôr malcontent cuintri la nobiltât, par fâ nassi une istituzion, a sindacât vie, in difese dai interès des vilis restadis sot jurisdizion feudâl. E scomençà cul scoltâ lis protestis e i laments di cualchi delegât mandât dai contadins di un o di plui paîs; cul dâ spali a chestis delegazions smolant cualchi piçule concession ogni volte che si presentavin; cul mostrâsi pronte a considerâ lis lôr tristis condizions e lis propuestis che a fasevin. Un pôc a la volte chescj ricors ocasionâi a deventarin une cjosse ordenarie, e lis vilis a finirin cul nomenâsi une rapresentance stabil di “sindics” par difindi denant dal Lutignint e dai magjistrâts di Vignesie, e cuintri il Parlament, i lôr interès. Cheste rapresentance si clamà “Contadinance dal Friûl”. Nol fo un sindacât di categorie come chei di cumò, parcè che la sô azion no podeve mai rivolzisi cuintri dal guvier di Vignesie, ma dome cuintri la nobiltât e il Parlament de Patrie che le rapresentave; si podarès dî  pitost, che parlament e Contadinance a vignirin a costituî une “Corporazion”, di tipo fassist, cun dôs fuarcis contrariis che, se no cjatavin la fate di lâ in cunvigne tra lôr, a scugnivin pleâsi ai ordins dal Lutignint o dal guvier. In cheste maniere il Parlament nol rapresentà plui il Friûl, ma  dome une classe, une minorance privilegjade e cjalade di neri dal alt e dal bas.
La Contadinance, cui siei sindics gjenerâi, cui siei cassîrs e esatôrs, cui siei revisôrs e avocats e finì cul cjoli di man al Parlament la uniche vere prerogative che i restave: chê di scompartî il pês des fazions e prestazions imponudis dal guvier e di scuedi lis tassis.
Un pas a la volte, tra discussions, ricors e barufis, lis competencis e i dirits de Contadinance e dal Parlament a forin stabilîts e ancje lis causis di litigâ a vignirin a mancjâ: ma intant la nobiltât e jere restade esautorade, il Parlament al veve pierdude ogni ingjerence sui afârs politics e ministratîfs e, in companie de Contadinance, al jere deventât juste une esatorie, che e lavorave sore nuie pal guvier. Cussì, in pratiche, viers la metât dal ‘600 la autonomie lassade al Friûl no jere plui che un non cence significât.
La nobiltât, scjafoiade des tassis, e scugnive dispès vendi terens e titui, che a vignivin comprâts dai marcjadants di Vignesie; e chescj a vignivin chenti a formâ une gnove aristocrazie foreste cence tradizions, plene di palanchis e di supierbie cuintri la nobiltât locâl scunide, disanimade e stremade, che e veve aromai bandonade ogni sperance e ogni dignitât e si jere ridusude in chel stât che Ipolit Nievo al conte tes sôs “Confessions” coionantle cu la sô stupide ironie (1).
I beneficis di Vignesie
Daûr di ce che e dîs la storie uficiâl, Vignesie e puartà in Friûl la pâs, l’ordin, la sigurece, il moviment comerciâl e il progrès de agricolture. Viodìn mo ce che al è di vêr in chest discors!
Cuarante agns dopo la ocupazion dal Friûl par cont di Vignesie, si scomençà a fevelâ dai Turcs che si fasevin indenant des bandis de Bosgne. Vignesie no si scomponè di plui di cussì. Dal 1472 i Turcs a rivarin fin a Monfalcon e po fin a Cividât: lis guarnizions Venezianis a taiarin la cuarde, ben sveltis.
Dal 1477 i bosgnacs, menâts di un Scanderbey, a rivarin ca fin sul Tiliment: i Venezians a scjamparin, il Friûl al fo roseât fin sul vues, i cjistiei e i paîs murâts si difinderin di bessôi ( no ‘ndi volevin tropis a difindisi cuintri chês mandriis disordenadis). Dal 1478 a tornin i Turcs: i venezians si sierin tes lôr fortificazions sul Lusinç e a lassin che i Turcs si gjavin dutis lis voiis tal cjanâl dal Lusinç, in Val Cjanâl e fintremai tal Incjaroi. Dal 1499 a tornarin i Turcs pe ultime volte, dopo di jessi stâts mês fers di là dai confins: il guvier di Vignesie nol savè fâ nuie altri, dome che al ordenà ai contadins di scjampâ tes citâts muradis, dopo di vê brusât dut ce che no podevin puartâsi daûr. Cheste volte, no vint cjatât passon di ca da la aghe, i Turcs a passarin di là, si dividerin in piçui trops, a devastarin ducj i paîs, a coparin miârs e miârs di furlans e a tornarin cjase lôr cjamâts di robe e di presonîrs: intant che a fasevin chestis impresis, no vevin dibisugne nancje di meti lis vuardiis di gnot, di tant che e jere tremende la difese dai Venezians (2).
Pôcs agns dopo (1508) e capità la vuere cuintri l’imperadôr Massimilian: dute chê part de Furlanie che e jere sot i conts di Gurize e fo devastade dai mercenaris di Vignesie. Subit dopo e scomençà la vuere de Leghe di Cambrai che e durà siet agns (1509-1516). In chescj siet agns i paîs de Furlanie a vioderin a cori indenant e indaûr todescs e venezians cuissà cetantis voltis, a passarin di un paron sot chel altri, lis cjaparin di chescj e di chei, a pierderin nemâi, racolts, implants, cjasis. Plui che di combatiments, la vuere e jere fate di avanzadis e ritiradis, cun robariis e maçalizis de popolazion, che no saveve a ce sant votâsi.
Par zonte, tal unvier dal 1511, che al jere un moment di padin, e capità la balfuerie dai Strumîrs e dai Çambarlans: Strumîrs a jerin i cjistielans che a puartavin la part dal imperadôr; Çambarlans a jerin i partesans di Vignesie (3).
Joibe grasse di chel an (27 di Fevrâr) i Çambarlans a Udin a sbudielarin ducj i Strumîrs che ur capitarin sot, ur brusarin lis cjasis, ur robarin ce che a vevin di miôr (4).
Tra il 1615 e il 1617 e fo la vuere di Gardiscje: vuere sconclusionade e cence risultât, pal possès di chê fuartece che, comandade di Riçart di Strassolt, e resistè ai Venezians fintremai che il tratât di Madrid al fasè fermâ lis ostilitâts e dut al tornà come prin. Ma intant altris paîs dal Friûl a forin sdrumâts o brusâts, altre int copade, altre robe strassade o puartade vie. Cheste e sarès la pâs e la prosperitât vignude par merit di Vignesie. Il maçalizi dai Strumîrs al puartà daûr une lungje storie di svindics e di disordins che a durarin passe un secul. Lis tristis relazions di Vignesie cui imperadôrs no permeterin di inviâ mai un fregul di trafic cu la Austrie. Lis distruzions causadis des vueris a faserin cressi simpri plui la miserie; lis tassis cence misure che Vignesie e meteve, a rosearin fin sul vues la regjon. Nissun lavôr di publiche utilitât in trê secui e mieç, nissun provediment par fermâ lis aghis che a jessevin pes campagnis; mai une sigurece su lis stradis; mai une provedence pes anadis di cjaristie o par epidemiis. Biâts furlans: e ancjemò si laudin di Vignesie.
pre Josef Marchet e pre Checo Placerean