VIERZIDURE – E cumò ce sucedial?

E cumò ce cambiaraial inte politiche de nestre Regjon daspò di chestis elezions? Dut il dibatit politic al zire ator a un sôl teme: ce efiet varaie la stangjade patide de coalizion di maiorance sul guvier dal Friul – Vignesie Julie? Ore presint lis fuarcis de aleance jessude vincidore tal 2008 no àn ancjemò prontade une strategje comun, ma al covente tornâ a meti a plomp la azion dal esecutîf soredut par ce che al inten lis rispuestis ae crisi economiche. Al covente niçâsi e bandonâ lis divisions, se no pal 2013 il Palaç de Regjon di Triest al gambiarà incuilins.
DISFATE DAL CENTRIDRETE_ “E je finide intun bagn di sanc” al à ricognossût cun scletece il governadôr Renzo Tondo. Dongje di cheste amission al à vude dut câs la premure di sigurâ: “Nuie pôre. La zonte no vignarà tocjade e o continuarìn a lavorâ cui stes ecuilibris di prin”. Ma al sa che si varà di voltâ vele, parcè che a mancjin doi agns aes Regjonâls e i procès di lunc periodi scomençâts di Tondo (tierce corsie de A4, puarts di Triest e Monfalcon, Alte Velocitât de ferade) a riscjin di no vignî tacâts prin di in chê volte. La economie e spiete jutori soredut tal cantin dal lavôr e la zonte e scugnarà fâ di plui. La Leghe traviers da so segretari politic Pietro Fontanini e à domandât plui voltis un scat indevant, e no dome in cjamp economic: ai oms di Bossi ur fâs riçâ il nâs la lentece de zonte su la riforme dai ents locâi (soredut la soluzion ibride cjapade su lis comunitâts montanis). A volaressin meti dongje plui Comuns piçui par sparagnâ cualchi franc, ma soredut a pretindin di vê plui considerazion pe tutele de lenghe furlane: aspiet che fin cumò nol è stât par sigûr une prioritât par cheste zonte. E se la Leghe e cîr gnûf snait, ancje la Union di Centri no po vê braure dal andament di chestis elezions. Se la sô aleance cu la maiorance e je un tic clope, no si pues dî che i esperiment alternatîfs a sedin lâts miôr. In particolâr il Tierç Pôl nol à vût acet masse bon di bande dai eletôrs e no si sa ce avignî che al podarà vê di cumò indevant.
IL PD AL SCJALDE I MOTÔRS PAL 2013_Chei che a cjalin invezit chestis elezions cun sodisfazion e a fevelin zaromai di “ipoteche sul 2013” a son i esponents de çampe, soredut dal Partît Democratic. Debora Serracchiani, segretarie regjonâl, e cjante vitorie e e à lis sôs resons. Al contrari di ce che al è capitât a Milan e a Napoli, dulà che i candidâts lâts a vinci a jerin peâts a Vendola e Di Pietro, culì in Friûl – Vignesie Julie i gnûfs sindics di Pordenon, Triest, Monfalcon e Palme a son ducj targâts Pd. Intai centris plui grues dome la presidente de Provincie di Triest Maria Teresa Bassa Poropat e je di une liste indipendente: la Serracchiani e pues duncje tacâ il lavôr par prontâ une alternative par cheste Regjon, ma il grop plui penç di disgredeâ al sarà la sielte dal candidât president. In vantaç l’ex sindic di Pordenon Sergio Bolzonello, ma la decision e larà par sigûr cjapade traviers de consultazion popolâr des primariis.
CUISTION FURLANE BANDONADE_Spietant ce che al sarà, al reste un got di marum intal cjalâ cemût che in dut chest panorame politic la cuistion furlane e je stade dal dut bandonade. Nissun partît, nissune liste si son riclamâts ae storiche tindince dal autonomisim furlan: cuasi che a vessin fevelât e lavorât dibant Pasolini, D’Aronco, Marchet daspò de vuere, Schiavi, Cecotto e il Moviment Friûl tai agns dal boom, dal taramot e de concuiste de universitât e Sergio Cecotti e Marzio Strassoldo tai ultims vincj agns. Ce restial di chês ideis? A cjalâ il cuadri des formazions politichis furlanis, pôc lui di nuie. Sconsolade conclusion: ancje parcè che nol è che il Friûl nol vedi bisugne di jessi tutelât e difindût, anzit! La specialitât regjonâl forsit e sarà scancelade inte riforme federâl dal Stât, lis jentradis a son simpri di mancul par vie de crisi, la lenghe e la identitât no son tignudis in nissune considerazion. Intun panorame plui larc, la globalizazion e je un flum in plene che al lasse vivi dome i popui che a tegnin ben plantadis par tiere lis lôr lidrîs: e alore cemût mai in Friûl nissun sintial plui la dibisugne di interpretâ il mont cjalantlu cun voi furlans? Isal propit lât jù par simpri il soreli di un pinsîr che al viôt inte Patrie il centri di gravitât dal fâ politiche? Dome il timp nus disarà se sot la cinise di chestis ideis e je ancjemò cualchi bore di stiçâ.
Walter Tomada