CUINTRISTORIE DAL NÛFCENT 1950-1960. Friulianboom? Une rivoluzion!

Il secont dopovuere furlan tra emancipazion, inovazion e entusiasim
La vôs de modernitât e jentre tes cjasis dai furlans e si clame “Scandinavia”. E ven fûr dal famôs ufici “design” de Zanussi di Pordenon, che bielzà dal 1954, propite cuant che ancje la RAI e tache lis sôs trasmissions, al bute fûr ideis cuntun anticip straordenari a pet dal rest de Italie. O podaressin definîlu pardabon futuribil, no dome par chel che al rive a fâ, ma ancje pe bielece e pe inovazion de sô forme e dal so dissen, fasint concorince ai prodots todescs e americans: tal 1957 il monobloc pal fûc “Unirex 724”, ven a stâi il mitic fornel che al dispodeste in maniere definitive il spolert; tal 1959 il “Supermarket”, il prin frigorifar in Europe cuntun sisteme automatic par disglaçâ, che al mande in pension par simpri la vecje glacere; e tal stes an la “Superautomatica”, che no je une metraie ma une laveblancjarie che la publicitât e definive adiriture a lavaç “termograduâl”: nissun al saveve ce che al voleve dî ma si capive ben che e jere la ultime gjenerazion di une serie za scomençade cualchi an prime cu la Rex 250. La vere grande rivoluzion di chei agns, par vie che e regale timp libar, massime aes feminis, par podê sostignî un lavôr fûr di cjase, par imparâ a lei e a scrivi, par vuadagnâsi une gnove indipendence. E vie a clamâ la none, par che e viodi cemût che e funzione la laveblancjarie!
CJASIS GNOVIS, VITE GNOVE_ Progjets par un gnûf model di famee moderne, mononucleâr, liberade de cort contadine patriarcjâl e pronte par une vite spindude tai apartaments di une citât di gnove concezion, in cressite, tant che Udin o Pordenon, che e divente simpri plui centri di buteghis, servizis, uficis, fabrichis, e gnûfs mistîrs. Une citât che e gambie muse, che e cres simpri di plui, tant che bielzà tal 1949 il Parlament talian al fâs bon il famôs plan “Ina Case”, firmât dal senatôr Amintore Fanfani: e pardut il Friûl, tai agns Cincuante, lis “Cjasis Fanfani”, dutis compagnis, cul lôr zardinut, ortut e puest pe gnove utilitarie, si sparnicin di ogni bande, screant il concet di perifarie urbane, cetant gnûf des nestris bandis, là che la perifarie si clamave pluitost “taviele”. Un mont in grant cambiament. Par fortune no jerin dome i gjeometris di Fanfani a tornâ a dissegnâ il paisaç: chi in Friûl si cjatin in chei agns i archites plui modernis, bogns di miscliçâ insieme e di meti adun lis tindincis de inovazion americane cu la anime profonde e vere de lôr tiere furlane. Cussì fabrichis, cantîrs, laboratoris di creativitât a nassin pardut: baste pensâ a ce che al à fat Ermes Midena, o Marcello D’Olivo che – cjalant la opare di F. L. Wright – al dissegne palaçs e cuartîrs di Grau e di Udin, che al vuadagne une muse une vore plui europeane di Rome o di Torin. E la lagune di Lignan, fin a chel moment un borc di pescjadôrs, e devente un laboratori straordenari par insumiâsi di une citât gnove, vignude sù dal nuie, cuntune planimetrie a spirâl uniche al mont. E pûr, cun tante inovazion e convîf ancjemò une fuarte anime paisane: cussì, dongje il plaçâl Cjavedalis, devant de ostarie là che un veteran de vuere de Libie al veve plantât “Dôs Palmis” (che a àn ancje dât il non al ambient “Alle due palme”, ndr), là che si podeve passâ il timp zuiant di balis, tal 1956 a tirin sù un edifici moderni e funzionâl, sede di une scuele prestigjose, l’Istitût Tecnic e Comerciâl Antonio Zanon, che al varès formât i fîs dai contadins par che a deventassin impiegâts, segretaris, dipendents des impresis che a nassin aromai par dut il Friûl: dai stafets di Sant Denêl aes manifaturis di Glemone, là che a lavorin principalmentri lis feminis, finalmentri libaris de influence di vons, madonis, agnis e nevôts.

LIS NESTRIS FEMINIS_ Bandonade la cjase coloniche contadine e sotane, a lavorin in aziende e si vuadagnin une indipendence economiche mai gjoldude prime. E a rivendichin la lôr bielece, la zoventût e il dirit al divertiment, ae autodeterminazion. Cussì, finît il turni di lavôr, a sprintin in Vespa, simbul dal deceni, in direzion di une straordenarie emancipazion. E di sere si cjatin a balâ, cul sigaret in bocje, tal prin gnûf “gratecîl” di Udin, che cui siei dîs plans di altece al cuche parsore di Place XX di Setembar, su la elegantissime vie dal Gelso a pene vierte: un palaç cun tant di galarie pal cine teatri, l’Astra, e cuntun magazin plen di machinis “mangje bêçs”, impuartadis diretementri di Las Vegas, cussì almancul al fâs crodi il paron dal locâl.
VIE CU LA MUSICHE!_ Ma la vere novitât si cjate propit tal ultin plan, là che dopo des dôs di gnot al “Mokambo dancing club” si sune il “Be bop”, il “Jazz cool”, une musiche gnove par un public une vore rafinât e di avanguardie, tant che intindidôrs e cultôrs dal gjenar a vegnin sù adiriture di Triest e di Padue par sintî un cuintet straordenari metût insieme dai impresaris udinês Meroi e Dollinar: Umberto Cesari daûr dal piano, Miro Graziani ae batarie, Riccardo Laudenzi al trombon e al liron, Aldo Masciolini al clarinet e al sax e Walter Notari al violin e vôs dal grup. Cuant che sui breârs talians si balave ancjemò la mazurche o il “bal dal modon”, o il massim de sperimentazion al jere Renato Carosone, chei cinc mats achì a scoltavin i discs di Parker, di Gillespie o di Goodman, a voltavin par scrit la musiche e le sunavin par dute la gnot. Udin come Manhattan, insome! Ma dute cheste fiere vivarose no podeve durâ par simpri. Il deceni al finìs, in maniere emblematiche, cul sierâsi dai “casins”. Chei vêrs, ae miezegnot dai 20 di Setembar dal 1958, par volontât de Senatore Socialiste Lina Merlin. Parcè che ducj chei altris ju varès ereditâts il deceni che al stave par rivâ.

Il riscat dal popul furlan daspò agns di soferencis
E ce agns! Ducj di inventâ. E chel che al crôt che il cjâf dai furlans al sedi conservadôr e reazionari al varès di studiâ un pôc di plui il periodi che al va dal ’50 al ’60. Une vuere di dismenteâ. Tante fam e miserie di butâ vie cul patùs e il paltan di une memorie tremende, ma finide, finalmentri passade vie, come se e fos stade un mâl di gnot. Un paîs di tornâ a fâ sù des maseriis. Al voleve duncje cetant vueli di comedon e une grande fantasie par rivâ a tirâ sù cjasis e paîs, ma ancje par provâ a pensâ a un Friûl difarent, vivarôs di novitâts e golôs di gnovis oportunitâts. I voi dai inteletuâi nostrans a son curiôs, sperimentâi, atents ai cambiaments che a stan rinovant la umanitât. E je vere che tancj a àn di cjapâ ancjemò une volte la vie dal forest, emigrâ in Svuizare, o in Argjentine, o in Canadà. Ma la lôr e je une valîs plene di ideis, di professionalitât, di braure e di dignitât. Il mont al cjalave cun grant interès la abilitât e il snait dai muradôrs nostrans, organizâts in piçulis impresis, il sens dal dovê dai nestris operaris, la fantasie dai progjetiscj, e ju clamave par fâ ce che a vevin dimostrât di savê fâ a cjase lôr: tirà sù ce che lis bombis a vevin distrut. Mûrs e dignitât. Cussì ancje chei che a restin a deventin cjâf e mans di une progjetazion che no à vût nissun confront in dute Europe. E lis feminis a butin vie gabanis e façoletats neris, e in cotulute floride tu lis viodis in Vespa, sore sere, une volte finît il turni in fabriche. A vadin a balâ. Che tant in cjase, a lavâ la blancjarie, e reste la machine di lavâ.
Angelo Floramo