FURLANS, DIGJITAIT FURLAN – LICÔF. Scuele e TIC

Di tant timp o sin usâts a sintî fevelâ ben de cualitât dal sisteme scolastic dal Friûl – Vignesie Julie. La situazion gjenerâl taliane no je ciert des miôr, se paragonade a altris paîs europeans, e lis statistichis dai sistemis di rilevazion PISA-OCSE a son li a dimostrâlu.
Ma des stessis classifichis di valutazion, o dai dâts resints ufierts dai test INVALSI dal Ministeri de Istruzion talian, la nestre Regjon e risulte simpri tant che contrassegnade di bogns risultâts, paragonabii a chei che si otegnin tes scuelis dal Nordeurope, val a dî un grum superiôrs a pet de medie di chês altris regjons talianis.
Di là dai insegnants, provìn a resonâ sui dirigjents scolastics: a son lôr che, magari restant par agns a cjâf de stesse Istituzion, “a detin la linie” di ogni singule scuele, a promovin il disvilup didatic e organizatîf in ciertis direzions plui o mancul inovativis, daûr dal propit pont di viste, de proprie culture personâl.
SCUELE E GNÛFS MEDIA IN REGJON_Cemût si ise compuartade la Scuele regjonâl, cualis strategjiis aie  adotât al prevanzâ des inovazions tecnologjichis in classe? Dal videoregjistradôr tai agns Otante, al ordenadôr dai agns Novante, fin a rivâ ai ebook readers dal dì di vuê e aes lavagnis interativis multimediâls LIM, i dispositîfs di supuart ae Cognossince a àn cjatât dispès lûc e sens intes pratichis cuotidianis relativis al aprendiment, cualchi volte cun sucès, cualchi volte mancul. Parcè che l’ordenadôr conetût a Internet, strument che al riassum in se chei altris, al impon al insegnant la acuisizion di gnovis competencis e ancje une organizazion dal dut divierse dal propri “fâ scuele”; e cui che al continue a viodi inte Rêt e intal pc un strument di aiût didatic par inricjî cuntun pocje di multimedialitât lis vecjis formis classichis di insegnament, nol capìs lis potenzialitâts des gnovis tecnologjiis che a van a cambiâ di plante fûr i ambients formatîfs stes, chês aulis scolastichis aromai colegadis simpri cul mont midiant il barcon dal schermi eletronic. Anzit, Internet stesse e je di calcolâ tant che lûc formatîf, e no dome tant che “biblioteche universâl”: in graciis dai blog, di youtube e dai social network, lis pratichis cuotidianis di aprendiment a si davuelzin dentri la Rêt, intal jessi a stâ in spazis di espression personâls e di creativitât che i insegnants a àn in curt di capî e di pleâ, in graciis de lôr professionalitât, in oportunitâts educativis, metint lis basis par une cussiente Citadinance digjitâl dai plui zovins.
Il web sociâl, i ebooks, i videogames, la television conetude a Internet e il telefon celulâr a son realtâts che vuê a furnissin in maniere stabile la vite dai plui zovins, a son “ogjets” comuns che o sin ducj simpri cenglâts, e chest nus puartin par necessitât a ricalibrâ il pês dai aprendiments informâi – chei dâts dal cuotidian – a pet des educazions formâls furnidis de Scuele che cualchi volte al somee che no sepi o no vueli riorganizâ se stesse par acetâ une  modernitât fate di messaçs complès, multimediâi, di scambis sociâi mediâts des Tecnologjiis de Informazion e de Comunicazion (pensìn dome al ûs particolâr che i adolessents a fasin dal telefonut).
UN LIMIT PROFONT_ La Scuele in realtât no à mai savût cun serietât alçâ a dignitât educative une riflession su lis implicazions psicologjichis e sociologjichis dai massmedia (nancje di chei tradizionâi, stampe e tv), metint duncje une serie Media Education – educazion ai media, no dome cui media – al centri des propriis ativitâts didatichis, cundut che di decenis lis ricercjis e lis statistichis su la fruizion mediatiche dai minôrs a mostrin la centralitât di chestis fonts informativis inte lôr vite, che vuê ur van zontâts i social networks tant che lûcs dulà esprimi se stes otignint sintiments di apartignince e identitât.
Forsit cualchi dirigjent scolastic atuâl al patìs masse dal propri personâl gap gjenerazionâl a pet di dutis chestis inovazions tecnologjichis resintis, nol à une culture digjitâl in stât di gjestî il cambiament socioculturâl atuâl e duncje di progjetâ cun previdence il “fâ scuele” dai agns prossims.
I PERICUI_ La consecuence no je di pôc cont: la Scuele, pûr vint tant che compit sociâl propit chel di preparâ lis gjenerazions zovinis a vivi in maniere cussiente tal propit timp, inte pôre di acetâ lis gnovis tecnologjiis – e duncje lis gnovis formis di partecipazion ae socialitât ample – e somee volêsi sierâ in se stesse, tradint in chest mût la sô stesse mission educative.
Giorgio Jannis