CUINTRISTORIE DAL NÛFCENT 1960-1970. Bisugne di identitât

Screade la “gnove regjon”, si impiin i moviments autonomiscj e inteletuâi
Cu la leç screade ai 31 di Zenâr dal 1963, il Stât talian al decît di unificâ al Friûl il teritori di Triest, che dome tal 1954 al jere definitivementri tornât in Italie: di fat, prime a jerin dome la provincie di Udin e che di Gurize; Pordenon al varès otignude la so autonomie tal 1968.
Il prin president de Regjon Autonome Friûl-Vignesie Julie, che e somee une robe mostruose e inaturâl bielzà tal non – al sarès stât Alfredo Berzanti, triestin, democristian e partigjan osovan: cuasi une programazion segnade pal avignî di cheste istituzion cence anime, nassude cu la imposizion di un miscliç dal dut artificiâl, inventât di un stât centralizât e fuart che cu la burocrazie, cui uficis e cui ents, al voleve scjafoiâ ogni forme di identitât e di diference.
LA “VOCAZION” MILITÂR DAL TERITORI FURLAN_  Di plui, cu la scuse che propite par chi al passave il confin de “tendine di fier” che e spacave la Europe di Danziche fin a Triest, il Friûl al devente tiere di casermis, sparniçadis par dut il teritori, jempladis di fantats in divise ristielâts par dute la Italie cul dopli intent di “protezi l’Ocident dal pericul comunist e sclâf”, ma ancje di judâ une inevitabile e simpri plui fuarte presince de Italie tai nestris paîs: une Italie autoritarie, armade, in divise, che magari e varès ancje concuistât i confins dai jets nuviçâi, fasint maridâ soldaduts toscans, romans, o sicilians cun fantatis furlanis, par gjenerâ finalmentri fîs di une Patrie che si imponeve simpri di plui, ancje sot des cuviertis e dai linçûi. E a son i agns de “vuere frede”, e lis rostis dal Tiliment a platin lis testadis nucleârs orientadis cuintri Mosche. E ti vegnin i sgrisui a pensâ che Mosche e pontave lis sôs su di nô!
LA SBURTADE AUTONOMISTE_ E pûr, forsit par reazion a dut chest, e nas une grande bisugne di identitât, une Resistence di popul cuintri la violence brutâl di un Stât, chel talian, che si impon simpri di plui. Pre Bepo Marchet, svilupant une idee bielzà coltade dal 1946, al met adun su la Patrie dal Friûl la “Cuintristorie”, che e ispire ancje tal non cheste nestre indegne rubriche. Pre Checo Placerean, tra il 1962 e il 1963, judât di un grup di predis iluminâts, al fonde la associazion “Int Furlane” che e sarà la base, tal 1966, de nassite dal “Moviment Friûl”, screât ai 9 di Zenâr di chel an. Simpri tal 1963, Davide Maria Turoldo al zire il film “Gli ultimi”, cuadri realistic di un Friûl contadin une vore lontan de dimension bucoliche e idealizade che e faseve une vore comut ai sorestants politics dal timp. Tal 1962, ae XXXI bienâl di Vignesie, si impon l’artist furlan Luciano Ceschia cu la opare “Grande Porta di Hiroshima”, vuadagnant premis e lauts di critiche: rivoluzionari tal doprâ la materie, poleant la forme e la energjie, al sarà anticipadôr, ancje cul so stîl di vite anticonvenzionâl, di tante gnove ricercje artistiche a nivel european, come che i gjornâi talians e stranîrs a scrivaran pe sô mostre screade tal 1968 a palaç Kechler di Udin. Tal 1963 al torne in Friûl ancje Marcello De Stefano, regjist e inteletuâl che si jere formât cun Vittorio De Sica, Michelangelo Antonioni, King Vidor. Di formazion cristiane ma ben lontan dal jessi un “mangjeparticulis”, une vore dongje dal teolic francês Teilhard de Chardin, considerât eretic dal Vatican, al capìs che in Friûl l’articul numar 6 de costituzion taliane, là che si dîs:”La Republiche e tutele cun normis di pueste lis minorancis linguistichis”, nol ven metût in pratiche. E cussì , tal 1965 al fonde il “Centro Ricerche e Studi” di Udin (C.R.S.), produsint filmâts, trasmissions e documentaris ancje pe tutele de lenghe e de culture furlane. Un Centri che al sarà cetant impuartant pes ideis de contestazion zovanîl dal Sessantevot – e no dome par chê furlane –, ispirât a une dimension atipiche, anti marxiste e contrarie a ogni forme di violence.
Agns rabiôs duncje, creatîfs, che a dimostrin cemût che la fuarce di un popul no pues jessi sierade jenfri i limits imponûts di chei altris.
VOIE DI RISCAT_ Cussì la grande aluvion dal Tiliment, tal 1966, e je cuasi une profetiche prefigurazion di dute cheste voie di ribelâsi. Stuf di tantis fufignis patriotardis, il flum al ven fûr propite te zornade dai 4 di Novembar, fieste des fuarcis armadis talianis, inneant dute la Basse furlane e fasint un fisc di oms, cjasis e nemâi. Cussì in chei agns Franco Basaglia, adun cunt Antonio Slavich, al scree a Gurize la prime comunitât terapeutiche mondiâl par malâts mentâi, contade tal 1968 tal libri “L’istituzione negata. Rapporto da un ospedale psichiatrico” che, tradusût in dutis lis lenghis dal mont, al darà al ospedâl di Gurize une nomee pardabon internazionâl. E cussì ancje l’ospedâl di Udin – che tal stes timp si vuadagne une prestigjose nomee e al ven considerât tra i plui di avanguardie in Italie – al domande cun fuarce la pussibilitât di vierzi une facoltât di Medisine.
LA UNIVERSITÂT FURLANE_ Si sint cuasi la bisugne di dâ a dut chest grant movimenti ideâl une struture buine di produsi culture, ancje a nivel une vore alt. Triest nol mole, e cussì si scjadene une schirie di manifestazions gjestidis dai students des scuelis di Udin, capofile Malignani e Stellini, che a dilaghin a ducj i setôrs de societât furlane. Students, ma ancje operaris, feminis, predis animâts di une gnove sensibilitât, sindacaliscj, inteletuâi. Un popul che nol voleve jessi  ridusût a numar di inventari su la partide di regjistri di un paîs che lu voleve scjafoiâ. Cussì, ai doi di Fevrâr dal 1968, si riunive la prime Assemblee dal Consorzi pe costituzion e pal disvilup de Universitât di Udin. Cuasi une promesse. Che nissun al varès podût permetisi, aromai, di dineâ. Al someave di vê concuistade la lune. Come che pardabon Tito Stagno nus varès contât, in blanc e neri, la gnot dai 21 di Lui dal 1969. Sierant il deceni.
_______________________________________
Gnovis lotis cence armis pe nestre autonomie
Laboratori straordenari là che la imagjinazion e je floride intune stagjon di ideis, di sperimentazions, di curiositâts e di lotis che àn coinvolzût insieme inteletuâi e popul come che mai al jere sucedût prime e come che di râr si sarès viodût daspò. Al somee cuasi che la inaturâl costituzion de Regjon Autonome – volude di Rome propite sul tacâ dal deceni par fâ un plasê a Triest, citât di pôc tornade in Italie – e vedi stiçade une grandissime bataie a pro de identitât furlane, che e jere in pericul di pierdisi intune struture rigjide e burocratizade par nuie autonome, tes mans di une Democrazie Cristiane peade mans e pîts a Rome par vie di Andreotti e de Curie Vaticane, e avonde indiferente aes necessitâts locâls, ae specificitât sociâl, storiche, culturâl e linguistiche dai Furlans. A son duncje i agns di une grande riflessiôn corâl, partecipade, dibatude, bataiade, ma no tes aulis de academie che tant – stant che e jere a Triest – si interessave pôc di teritori, ma insieme cu la int, cui students, cui operaris, cu lis feminis, tes placis, tai curtîi, pe strade, e ancje in cualchi glesie, là che une gnove gjenerazion di predis furlans, formâts ae scuele di pre Bepo e di pre Checo, e tacave a sposâ la mission di vuide di un popul che, come che al veve insegnât ancje Martin Lutero cinccent agns prime, nol podarà mai crodi in nissun Diu se al dismentee di fâlu cu la sô lenghe e cu la sô storie.
Angelo Floramo