CULTURE – Il vin gnûf, de cantine la prime cerce dal an

Le vendeme e je a pene finide e bielzà si tache a fâ pronostics su cemût che al sarà il vin che si podarà bevi di ca a cualchi mês, cuant che la cantine e il mistîr dal roncâr a varan fat il lôr.
Par chest an, si dîs che il mês di Lui frescut e il cjaldon che al à durât fin dopo Setembar,  a fasin ben pensâ a une anade di vin bon, ancje se la produzion no semee che e sedi rilevante dal pont di viste de cuantitât. Al è clâr che, po dopo, si varà di viodi…
Une prime cerce de cualitât de ue dal 2011, dut câs, si pues za vêle di chest mês di Novembar cul prin “frutin” che al ven fûr de cjanive, il “Vin gnûf” (o “Vin novel”), che al sarès il vin a pene fat, il risultât di un masarament carbonic de ue rosse madure, filtrât cence lassâi il timp di vignî vecjo.
Parint dret dal celebrât “Beaujolais Nouveau” francês, il Vin gnûf in Italie – a diference dal famôs “cusin” di di là des Alps – nol corispuint a une cualitât uniche di ue, ma – di regjon in regjon, di cantine in cantine – si lu interprete doprant tant uis internazionâls che ue autoctone, creant cussì une panoramiche di savôrs e di odôrs ducj di discuvierzi (e ancje une cierte confusion, par podê fâ un discors di cualitât che al sedi, di an in an, valit in maniere universâl).
In maniere simile a chel che al sucêt par altris tradizions enogastronomichis (tant che la purcitade te zornade di Sant Andree in Novembar o di Sant Antoni a Zenâr), la cerce dal Vin gnûf si identifiche cu la fieste di Sant Martin (ai 11 di Novembar), che te nestre regjon e je ancje une date che in tancj lûcs e je la dì dal marcjât de Sierade. Marcjât di Novembar che, par tradizion, al coventave a la int par fâ scorte di provisions pai luncs mês di frêt, e che e jere ancje la ocasion par cerçâ il Vin gnûf, cuasi tant che un “cordialut” (insieme a un scartòs di bueriis bulidis) par scjaldâsi intant che si stave al marcjât, e ancje come cerce par decidi cuâl roncâr sielzi par lâ a comprâ il vin vie pal an.
Par rinovâ in cualchi maniere cheste vecje tradizion, e doprâle tant che scuse par jentrâ a viodi cemût che e funzione une cantine ae fin de vendeme, il Moviment dal Turisim dal Vin (pardut in Italie e specialmentri chi in Friûl, dulà che la tradizion dal vin gnûf e je une vore sintude), di cualchi an in ca si è inventât “Sant Martin in Cantine”, une edizion autunâl de iniziative fortunade de fin di Mai “Cantinis viertis”, pensade par dâ a la int la oportunitât di viodi di dongje i lûcs dulà che al nas il vin.
A saran 50, chest an, lis aziendis agriculis che a vierzaran lis lôr cantinis, tes zornadis di sabide 12 e domenie 13 di Novembar (des 10 aes 18, o su prenotazion), cu la pussibilitât di cerçâ tant il vin gnûf che vins deventâts vieris te cantine, di preseâ insieme cun altris savôrs di stagjon (massime formadi, cjastinis, coce, in cualchi câs presentâts ancje intun past complet, a misdì o sore sere, sot il titul “A taule cul Roncâr” – informazions su www.mtvfriulivg.it, ancje cu la pussibilitât di durmî in struturis convenzionadis).
Margherita Timeus
_______________________________
La cjarte di identitât
Il vin gnûf al à une tradizion une vore antighe, che si è inlidrisade prime che la industrie enologjiche e tacàs a vendi il vin tes butilis (pensadis par rivâ plui lontan e par durâ plui a lunc), pluitost che in damigjanis, par un marcjât plui dongje e di consum plui svelt.
Si fevele dut câs di “un prin vin, morbit, lizêr, sutîl e no masse alcolic” bielzà al timp dai Romans, il “Gauranum”, nomenât ai timps di Tiberi e di Caligola. E te Ete di Mieç, une vore di documents a contin di cualitâts diferentis di vin, cualchidune di consumâ subit a pene fate, altris di finî prime di Pasche, e altris invezit di destinâ aes “apotechis”, lis cjanivis dulà lassâlis deventâ vieris.
In mert aes cualitâts di savôrs dal Vin gnûf, al è dificil fâ un discors organic, parcè che i savôrs a dipendin massime de ue doprade, che e pues jessi cetant diferente (e nol è dit che e sedi simpri la miôr, che par solit si lasse in bande pal vin di “lavorâ”: cussì, al è simpri miôr cirî il Vin gnûf dal roncâr di fiducie).
Di sigûr, in gjenerâl, il Vin gnûf al à une sentôr “carpe diem”, par solit plui fresc, cuasi “crût”, cuntun savôr che al puarte plui aes pomis e aes jerbis, e cuntun tas di alcul pluitost bas. (M.T.)
_______________________
Il nobil cusin francês
Il famôs Beaujolais Nouveau al è il corispondent francês dal nestri Vin gnûf e, te sô patrie, al è un dai prodots enologjics plui preseâts. Si trate – a diference di ce che al sucêt ca di nô – di un prodot codificât in maniere rigorose, che al previôt il masarament carbonic di uis de zone dal Beaujolais AOC (la nestre Dop). La sô origjin, tant che le cognossìn vuê, e je dai agns Trente, cuant che – cuasi par câs –, cirint manieris gnovis di conservâ il vin, a son stâts provâts contignidôrs jemplâts di anidride carboniche che a davin un most une vore particolâr, che fermentât al devente l’innomenât vin zovin.
La fortune di chest vin, in France, e dipent dal sigûr dal so jessi fresc e lizêr, une vore plasevul di bevi, ma ancje di une operazion intense di marketing e di tutele. Che e dimostre trop che i talians a varessin di imparâ dai cusins francês, al cjapitul “valorizazion de industrie agroalimentâr”… (M.T.)