CUINTRISTORIE DAL NÛFCENT 2000-2010. I pericui in cjase

Si tache une vore mâl. Ai 28 di Avost dal 2000 la Zonte Regjonâl e aprove il plan par meti in sigurece il flum Tiliment, assegnant ae Technical Spa il progjet par tirà sù lis “cassis di espansion”: un polmon di ciment par incanalâ lis aghis, copant un dai ecosistemis plui interessants da la Europe.
Par salvâ Tisane e la sô int? No.
TERITORI ASSEDIÂT_ Lis grandis oparis a son simpri un afaron di beçons là che pôcs a mangjin, cence preocupâsi des conseguencis te vite di chei altris. Il flum de Patrie, l’agâr di une civiltât di mil e mil agns, scjafoiât, dumiesteât, sierât jenfri un capotat, une bare grise, al deventarès un canâl. Ma, a sintî i sienziâts che a àn firmât il progjet, dut al è stât studiât tal segn di une grande modernitât. Come che a disevin in chê volte dal Vaiont! Ma sì, a cui interessino miârs di plantis e di rosis, lis difarentis cualitâts di uciei, di animâi salvadis, di pes che di simpri a vivin tra lis aghis, i baraçs, i boscuts dal Tiliment? Une splanade di modernitât nus salvarà di dute chê carampane puce di salvadi! Pensìn pluitost ai cantîrs che si vierzaran, al lavôr garantît, al riscat sociâl de nestre int! No volarìn migo sei acusâts di jessi “passatiscj”, di vê il cjâf simpri voltât indaûr! Il mont al cor, e nô o varessin di stâi daûr. Cussì nus contin, cirint di convincinus. Che anzit, la plene de Fele, jessude rabiose tal 2003 a mangjâ fûr Valcjanâl e Cjanâl dal Fier, nus servissi di insegnament. Se l’om al bandone la mont, almancul che al sepi cimentificâ i siei flums! Un paradòs che ancje mê none, bavarese, e ripeteve cuant che si rabiave cul nono, e par evidenziâ che dut al leve mâl e predicjave: “i wurstel a son frêts, mancul mâl che la bire e je cjalde!”. E nancje cinc agns dopo e rive une altre propueste gjeniâl: tal 2005 al ven presentât al public il progjet dal fantastic “eletrodot aeri”, che di Wurmlach, in Austrie, al varès di passà jenfri la val de Bût, sbusant fûr par fûr lis comunitâts di Paluce, Çurçuvint, Sudri, Darte, Zui, Tumieç, Cjavaç e Somplât. Dute energjie di rive jù pes Ferieris Nord di Osôf. Toratis di fier altis dai 30 ai 60 metris, cuntune lûs di 300 metris di une gjambe a di chê altre, sgarfant il bosc dulinvie par un curidôr larc almancul 60 metris.
Un spetacul de inovazion tecnologjiche, bon di fâ cori sul cjâf di ducj chei che a vivin sot la bielece di 220 kvolt di energjie.
E se cualchi tumôr al vignarà fûr par vie des ondis eletromagnetichis, po ben, o vin pûr il CRO di Davian, che al è a la avanguardie par cierts mâi! Chei a son i malans de modernitât, migo come la pelagre o il tif che a nassevin de miserie e dai pedoi. Che a setin i puarets a murî di imbolsiment: nô, siôrs e modernis, o vin miôr vê il cancar.
MÛRS CHE A COLIN E CHE A VEGNIN SÙ_ No je finide. Dut chest si metarès insieme ae vision futuribile de autostrade che ben o mâl e passe bielzà pal stes percors. Che se po dopo si rive a tirâ sù ancje la strade de alte velocitât Cimpiel-Glemone, il Friûl al torne sù come gnûf, pardabon: tant i gravons dai magredis a son cussì salvadis e lunârs che il paisaç al vuadagnarès cetant in bielece cui sorepàs, cui puints, cui svincui e i racuardis di asfalt. Une muse gnove pal cûr pulsant di une gnove Europe des comunicazions, chês che a partissin di Lisbone par rivâ a Kiev. E nô tal mieç, juste par servî di pedane ai afârs di chei altris. Tant plui che il prin di Mai dal 2004 la Slovenie e jentre in Europe. E la fiestone e continue ai  21 di Dicembar dal 2007, cuant che ancje il vecjo confin al ven dismantelât. A vain dome i doganîrs di Pontebe, che cu la vuere frede a àn fat i beçons e cumò a sierin i barachins. Ma se un fîl spinât al cole, altris si tirin sù parsore di gnûfs muraions, come chei che a vegnin screâts tal 2006 a Gardiscje par gloti i stranîrs “sottoposti a provvedimenti di espulsione e o di respingimento con accompagnamento coattivo alla frontiera”. Cjamps di concentrament dal gnûf mileni. Cuissà mai se fra cincuante agns no si vergognarìn ancje di chescj, imponûts di Rome a nô, tant che a Lampedusa, che tal imagjinari coletîf talian il Friûl al sune come la isole che no esist.
UN POPUL CHE NOL SBASSE IL CJÂF_ Il 2007 al è l’an dai muarts. Pre Toni Beline, inte gnot di domenie ai 22 di Avrîl, al cole denant de glesie di Visepente. E restarà la sô vôs, fuarte e anarchiche come chê dai profetis che al veve tradusût in Marilenghe. Cualchi mês daspò, ai 5 di Novembar, al mûr ancje Zorç Ferigo, iluminât pinsîr libar e indipendent di ogni costrizion e pôre. Cjargnel cence Diu cuntune anime grande, sperimentâl, golose di cognossi e di fâ. A vevin insegnât a la lôr int a no molâ mai. E ancje gracie a lôr il Friûl dal gnûf Mileni nol è sotan. Al à cjapât gust a scombati par difindi la sô storie, la sô identitât, la sô lenghe, i flums, i boscs, i pascui, là che si è formade la sô anime, poleade te fadie di une miserie vistude di dignitât.
E se tant o vin pierdût tai ultins dîs agns, ancje amîs e mestris che nus àn insegnât a tignî il cjâf alt, la nestre vôs si alce clare e fuarte a berlâ cuintri ogni forme di prevaricazion: cussì si moltiplichin lis manifestazions popolârs di proteste, i comitâts di difese, come chel pal Tiliment, o di lote, come chel di une Cjargne in Moviment che si opon al fisc de sô identitât. E cun lôr tancj altris. Segn che la cussience si è maduride, e no mole. No vûl molà. E vîf.
E cres. Libare e Sovrane.
Angelo Floramo
____________________________________
Cjapâ sù i insegnaments dal Nûfcent
Ve chi i ultins dîs agns de nestre Cuintristorie dal Nûfcent, che forsit a son i plui tormentâts, i plui a risi par ce che al compet la nestre Tiere e identitât, ancje se cussì nol pararès, cjalant in muse ducj chei altris decenis che a son vignûts prime, come che o vin cirût di fâ cun onestât inteletuâl fintremai cumò. Forsit parcè che il Nemì nol rive plui sberlant in divise, cu la musate triste dal soldât. Nol dopre bombis, canons e metraiis. Insidiôs, rispetabil, parfin legri, confidenziâl, al promet une ete gnove, sigurece economiche, afarons che mai prime si sin insumiâts di fâ: progrès, modernitât, lusôrs, velocitât, energjie. Un nemì che al à tancj nons: globalizazion, marcjât mondiâl, economie creative, bancjis internazionâls… Il risultât? Ribaltons sociâi e politics di risonance mondiâl a butin lis boris fintremai chi di nô. Une frenesie di grandece cence criteri e provoche diluvions che a scancelin borcs e paîs, segn che o vin dismenteât di tignîsi buine la Nature che i nestris vons a veneravin tant che une Mari. La tiere e je violentade, violade, tradide e striçade jenfri interès che no podaressin zovâ gran ae nestre Patrie ma che a sticin un grum la scarsele di chei altris che – us parie une novitât? – a cjatin golose pussibilitât di marcjât a puf di un popul, il nestri, che al somee pardabon imolât a jessi ancjemò teritori di concuiste, colonie di sfrutâ, bocon di mastiâ e di gloti, o di spudâ, come che ancje te Storie passade o vin viodût masse dispès. Ma il Nûfcent nus à insegnât almancul a resisti: fin cuant che o savarìn berlâ il nestri “no”, o vin ancjemò la sperance che o sarìn un stât libar e responsabil tal mieç di ducj chei altris popui che a cjaminin par tirâ sù la lôr Storie, tai secui che a saran. Amen.
Angelo Floramo