ATUALITÂT – La Republiche Partigjane dal 1944: une lote ancje par furlan?

Gjiso Fior, non di bataie Mion, poete di Verzegnis e comandant partigjan dal bataion Tiliment, a la fin di un comunicât ae popolazion civîl de Republiche Partigjane de Cjargne, al zontave in marilenghe: “Din sot a chê gjarnazie / cun sclopis e falçârs / pe Libertât de Italie / pai nestris fogolârs”. Là che il fogolâr al rapresentave une evidente fuarce identitarie, di popul, inte lote pe liberazion de tiere dai vons, ven a stâi il Friûl o plui precisementri chê Cjargne che si jere di pôc costituide Tiere libare di oms e feminis libaris: un invît fat ai siei fradis, doprant la lenghe identitarie, a scombati ducj chei che le volevin gloti o jenfri lis sgrifis de love romane fassiste, buine erede dal Ream talian che za dal 1866 al steve proviodint a scjafoiâle, o in chês de acuile gjermaniche naziste, che daspò dai 8 di Setembar dal 1943 le veve bielzà trasformade in Adriatisches Küstenland.
CUALCHI GOTE DI IDENTITÂT_Interessant duncje l’apel dal comandant Fior. Cuasi che la libertât de Italie no podeve no proviodi ancje chê dal Friûl, intindût come Patrie dal Popul furlan. Une clare e evidente prioritât: no sarà mai libare la Italie che no rivarà a ricognossi la libertât dai Popui, di ducj i Popui, comprindût ancje chel Furlan, che al dimostre gjenerositât tal scombati dutis lis tiraniis, comprendudis chês che cumò a frucin la Italie. E propit “Pai nestris fogolârs” al jere il titul dal periodic de prime division di assalt “Osôf – Friûl”, cun tant di fogolâr stampât come un logo in prime pagjine, ven a stâi un simbul fuart che al voleve dî “cjase, lenghe, culture, tradizion, libertât”. E se nol fos avonde bastarès vierzi ancje un numar di “Carnia”, il setimanâl de Cuinte division Osôf-Cjargne: a scorte dal titul si lei ancjemò: “Pal nestri Fogolâr” e “Se tu vens ca sù tas cretis”, là che lis peraulis di Zardini a confermin cuasi une volontât di inlidrisâsi sui chei crets par pandi la condivision di une civiltât alpine, dure come la sô fierece dimostrade cuintri dal Nemì. Fermo Solari, vice comandant dal cuarp dai volontaris pe libertât, za tal 1988 intun discors fat ai students des scuelis superiôrs di Tulmieç, ricuardant la sielte partigjane al diseve: «Mi soi simpri sintût un furlan, ancje se o soi stât ator pe Italie e pal Mont a vore, a studiâ, a produsi e, cuant che si è presentade la ocasion, a scombati pe libertât. Ma a la fin o soi simpri tornât a cjase, par cjatâmi cu lis mês lidrîs». La Libare Republiche de Cjargne e je stade une esperience durade il timp di un lamp, dal Lui al Dicembar dal 1944 (di un pont di viste istituzionâl ancjemò di mancul, ven a stâi dal 26 di Setambar, date de sô creazion, ai 10 di Otubar, la zornade nere de operazion militâr naziste, fassiste e cosache che le à studade), cul so altissim profîl di civiltât, pe difese de dignitât dal om, che si riflet te espression incondizionade dal so estro, te scuele publiche, tal rispiet de nature e dal ambient, de libertât di peraule, pinsîr e stampe. Pe abolizion de pene di muart. Pe dignitât de Femine, considerade paritarie a chê dal Om. 2.500 chilometris cuadrâts di indipendence jenfri Friûl e Venit: 90 mil citadins che a votavin, si aministravin tramite i lôr rapresentants, a gjoldevin di chei dirits che in Italie no jerin mai stâts gjoldûts prime o che di almancul vincj agns e jerin stâts scancelâts dal Regjim Fassist.
UNE ESPERIENCE CONCRETE IN SLOVENIE_ Une volte Peter Handke, il grant scritôr Sloven Carinzian, fevelant de resistence slovene, che e fo fuartementri identitarie e di popul, tant che i partigjans slovens a puartavin un cjapiel a trê pontis clamât “Triglavka” in onôr dal mont Triglav, simbul de lôr Tiere, al disè che in chê vuere tremende i slovens a scombatevin par ogni malghe, par ogni fîl di fen, par ogni arbul e par dutis lis peraulis de lôr lenghe. E anzit lis feminis bielzà dai agns Vincj, cuant che il regjim fassist al cirive di snazionalizâ la culture slovene, a tignivin scuelis clandestinis tai boscs parcè che i fruts no pierdessin il contat cu la lenghe mari. Parfin i Cosacs, mandâts de lontane Russie a tignî a bade i partigjans cjargnei, a vevin il lôr gjornâl in cirilic.
CJARGNE DUTE DI INDAGÂ_ Mi pâr dal impussibil che no sedi nassude une esigjenze compagne pe lenghe furlane te suaze de lote partigjane. Romano Marchet, un dai plui autorevui paris fondadôrs de Republiche de Cjargne, al scriveve ai 2 di Jugn dal 1945: “La Cjargne e je une piçule regjon: la lenghe, il sintiment, lis usancis dai siei fîs […] a fasin di jê une unitât”. E la unitât e fâs la fuarce. E cu la fuarce si vincin lis vueris. Se a Dimpeç si scombateve ancje pe libertât di peraule, la peraule scrite par Cjargnel o par Furlan e varès vude la fuarce di un Popul. No mi risulte che al sedi mai stât fat un studi sistematic sui documents, i gjornâi, i avîs, i tescj eventualmentri scrits in marilenghe in chei mês sflandorôs di vite de Libare Republiche Partigjane. E pûr, come che o vin viodût, a ‘nd jere. Un censiment atent e sientifichementri validât, une inchieste serie, profitant di chei onorevui scombatents che par nestre fortune a son ancjemò vîfs e a mantegnin la memorie di chei dîs, al disvelarès plui di cualchi sorprese. Ma la Academie, si sa, e à altri ce fâ.
Angelo Floramo