Bot e sclop, onorevul Baracêt, di ce isal plui braurôs tant sô lungje cariere politiche?
Des trê leçs pe ricostruzion dal Friûl che o vin fatis pardabon cence tantis fufignis e de leç 482/99 pe valorizazion de identitât de lenghe, de storie e de culture dal Friûl e dal popul furlan.
Tant de sô azion, ce lu aial sburtât di plui, la politiche o il so sens di partignince a une tiere?
Il popul furlan. E al è simpri il popul daûr di dut. Tacant de nassite de nestre Universitât. Cjapait ancje la cressite di cumò sul sens di identitât che e burìs fûr dai scandais: a dimostrin che al è il popul furlan che al sburte. I politics, invezit, si disin dacuardi ma po no fassin nuie.
Cemût ise cambiade cheste identitât tal timp?
Soredut tai paîs e jere plui fuarte in passât rispiet a cumò.
Paìno un cont aes vicendis storichis?
Il domini talian nus à obleât a fevelâ talian. Par esempli, sot il Fassisim tu paiavis la multe se tu vignivis becât a tabaiâ par furlan o par sloven a scuele. Vuê o assistìn a une altre campagne tes fameis.
Apont: la liende dal furlan che nol covente a nuie e dal inglês che al jude par zirâ il mont e je dure a murî.
A nd è cualchi stupit che nol à capît e al insist su chê contraposizion. Sbaliant. Nô o sin pal furlan, sloven, todesc, talian. O vin di movisi intune direzion plurilengâl.
Il concet di identitât smicjal plui a drete o a çampe? I fâs cheste domande ancje parcè che al ven sbandierât soredut a drete. E lui, Baracêt, invezit, al è di çampe.
Al è un concet che al parten a ducj i furlans, che e sedin di drete o di çampe. Al sarès come dî: jessi talians isal plui di drete o di çampe? No. A son talians ducj, talians di drete o di çampe. E dopo chei che no son ni di ca ni di là. No vin di lâ a cirî il pêl tal ûf, che nol esist.
Però a fâi fieste a Palaç Belgrât a son corûts i politics di drete e çampe. Ma soredut di drete. Fontanini lu à pontificât. Tondo compagn. A lui, cussì “ros”, no i aial dât fastidi?
Figuriti! Mi varès dât fastidi se e fos stade une iniziative che e ves dividût il popul furlan! Jo o sei stât un che al è simpri stât pe unitât sui interès dal Friûl. Chest no mi à impedît di mandâ lôr un messaç.
Cuâl?
Che nol baste dîsi a pro dal Friûl, ma si scuen batisi, impegnâsi in concret, par otignî risultâts.
Fasìn un pas indaûr. Anìn a cuant che al sentave in Parlament. Oltri la cronache e i zûcs politics, ce ricuarts aial di chei agns?
Pe prime leç sul furlan o soi partît dal 1977, leç che dopo e je lade in nuie cu la disfate de legjislature. Alore, daspò il 1979, o ai tornât a scomençâ cu la cussience che e coventave une leç par dutis lis minorancis, se no, no si sarès passâts par nuie. Ma o ai disvilupât la strategjie dal movisi insiemit.
E cheste e je une altre robe che e zirave a Palaç sul vuestri cont. I furlans de Prime Republiche si movevin in bloc, cuant che si tratave di puartâ indevant lis esigjencis dal Friûl.
Ma e je stade penze! Lis resistencis lis cjatavin ancje dentri dai nestris stes partîts. Par vê la facoltât di medisine a Udin, pôc al mancjave che o tiràs il gno bancut intor dal president de Comission. I triestins no volevin savênt. Pe cuistion de lenghe, la Glesie locâl, invezit, nus à dât une grande man. Specifichementri, il vescul Battisti.
E lui, comunist, al è lât a cirî la Glesie?
Dentri de Dc a jerin dôs liniis: i favorevui, a cjâf Santuz, e i critics, a cjâf Bressan. Il gno intervent sul Vescul al mirave al convinciment dai democristians. E al fo cussì. In chê ocasion al coventave tabaiâ ducj insiemit, cjatâ unitât e meti in bande lis ideologjiis.
Cuâi altris politics locâi lu àno judât in chei agns?
Ten presint che al bisugnave simpri cjatâ la intese cui comuniscj e i socialiscj. Mi àn dât man fuarte, sedi il puar onorevul Loris Fortuna, pai socialiscj, e apont Santuz, pe Dc. E a àn sburtât viers lis intesis, su dutis lis leçs a pro dal Friûl: la cuistion de lenghe, ma ancje de ricostruzion, dal disvilup de cooperazion internazionâl, pal dopleament de Pontebane e pe universitât.
Ce messaç i volaressial lassâ a un zovin che al ves voie di seguî lis sôs olmis?
Di jessi combatîf, vîf, di cjalâ cun fiducie ae politiche. Al è inutil lamentâsi se la politiche no fâs. Che si protesti cun vivarositât, che si fasiur mancjâ il vôt. Ma guai a gjavâsi fûr dal zûc politic che al è chel che al decît la vite democratiche di un Paîs e dal Friûl. ■
Oscar Puntel